I Kôrintô 6:1-8
“Ning-mônh bơ̆n gơh sek tơdrong linh jang. Dah bơ̆n gơh sek tơdrong linh jang ning-mônh lei bơ̆n kư̆m gơh sek tơdrong bơngai ala teh âu ‘bônh loi.” (I Kôrintô 6:3)
Nơ̆r jet tơchĕng pơwao:
– Tơdrong anat khul bơngai lui pơlei Kôrintô lăm Hla bơar Nơ̆r ‘Bok Kei-Dei năr ‘nâu ‘noh tơdrong kiơ?
– ‘Bok Pôl bơtho lu sư kăl kơ pơm tơdrong kiơ?
– Yua kơ kiơ na đei tơdrong anat âu oei đei truh lăm Khul Bơngai Lui dang ei?
Minh tơdrong wă tơ’bôh kơ Khul Bơngai Lui tơ Kôrintô hrĕnh tĕnh dêh tơhiong lê̆ tơmam ‘băt ‘boh lăm lu bơngai tơmoi ‘noh tơdrong anat hơmet tơdrong đei hơtŭt dih băl . Lu bơngai lui ưh kơ hiôk dih băl, tơgar dih băl lăm Khul Bơngai Lui na ba truh tơdrong sek tơlang. Bơngai Juđê đei tơdrong juăt sek tơlang đei tơdrong truh kơ kon pơlei sek tơlang tơ Hnam Akŭm lu sư , ưh kơ ăn lu bơngai tơmoi sek tơlang tơdrong anat truh lăm lu bơngai Juđê mă đei hơtŭt băl. Mă khan lei ră, lu bơngai Grĕk pơma pơyum đĭ păng lu bơngai Athel pơma kơdrô̆ sư ưang gah sư juăt kơ kêng kao tơ lu ‘bok sek tơlang. Păng lu bơngai lui tơ Kôrintô đei hơpoh đơ̆ng ei.
Hăm đei lơ nơ̆r đei jet ưh kơgan ‘lơ̆ng: “Liơ iĕm chă kră ưh kơ lui sek tơlang kơ iĕm, kuă kiơ kơ chă kră bơngai lui sek ăn.” (trong 1). “Lu bơngai lui gô sek tơdrong lu bơngai ưh kơ lui ning mônh, lei iĕm kư̆m gơh sek tơdrong buăl iĕm iĕ ioch dang ei mơ̆n.” (trong 2)…. ’Bok Pôl tơ’bôh hơđăl kơjăp gah tơdrong âu: Tơdrong lăm hnam dơnŏ iĕm lui kơ Kră Yang na gơh hơmet pơhiôk tơduă mă hiôk hơiă păng mă hơnơ̆ng. ‘Bok Pôl đei tơ’bôh pơsĭt khan bơngai lui gơh pơm ‘lơ̆ng tơdrong âu đei tơ’bôh hăm ‘bar tơdrong sĭt tơpăt. Mă mônh, tơdah lu bơngai lui gô sek tơlang lu bơngai ala teh, lei tơdrong iĕ hloh ‘noh tơdrong tơgar dih băl, hơtŭt băl rim năr ‘noh jơ̆ tơdrong lu sư gơh pơm tôm tơdrong (trong 2). Mă ‘bar, lu bơngai lui gô sek tơlang lu linh jang, đei akâu gah bơhngol, na “tơdrong ala teh” lăp ‘bônh đĕch hăm lu sư (trong 3). Hăm ‘Bok Pôl, Khul Bơngai Lui ưh kơ’bah bơngai hơgei wă sek tơlang tơdrong đei hơtŭt băl tơduă (tr.5). Sư khan bơngai lui đei jâu băl truh tơ ‘bok sek tơlang ‘noh đei “tơdrong yoch” dah “ưh pă gơh bơih” (trong 7). Tơdrong lu sư jô̆ jâu băl ‘noh, mă khan jei bu hĭ, kư̆m pôm pơm pơ’mê̆ anăn Kră Yang, păng ‘noh ăn kơ yang kơnê̆ kĕ jei đĕch, lăm trong 7 păng 8, sư khan kơtrơ̆m kơdih akâu chu iŏk tơdrong glăi ‘noh hloh kơ kơdih akâu pơm glăi wă khan pơ’mê̆ Anăn Kră Yang.
Sơ’ngon dêh tơpă, dang ei oei đei tơdrong ưh kơ hiôk dih băl tơduă bơngai lui lăm Hnam Akŭm, đei tơdrong ưh kơ hiôk băl tơduă kơtum kơtŏng ‘nhŏng oh lăm bơngai lui kơ Kră Yang, dah đei tơdrong tơgar pơjah pơjăng băl lăm Hnam Akŭm, phŏ sư ba ăn kơ lu bơngai pơgơ̆r teh đak sek tơlang. Kư̆m đei lu mơ’nah wă kơ tơpăt hơnơ̆ng kiơ̆ tơdrong juăt mă hơnat dêh kiơ̆ kơ tơdrong tơpăt, mălei lu sư hiơt minh tơdrong mă kăl dêh dah sek tơlang thoi noh lei tơhiong lê̆ tơdrong ‘mêm, tơdrong huay kơ jô̆ yo kiơ̆ kơ Nơ̆r Kră Yang bơtho. ‘Bok Pôl bơtho pơlung lu sư kơtrơ̆m chu hiong tơdrong kơdih bưh wă kơ bơwei tơdrong hiôk hơiă dih băl ‘noh ‘lơ̆ng hloh. Kră Yang băt đĭ păng Sư gô pơm ‘mong ăn kơ lu bơ̆n.
Ơ Kră Yang, lu nhôn jơ̆ kon bơngai yoch, ưh kơ gơh pơm tơdrong kiơ thoi noh kư̆m đei lơ tơdrong hơtŭt băl, ưh kơ hiôk băl. Apinh Yang Bơhngol ‘Lơ̆ng pơchrang hơdah tơgŭm inh gơh hơmet dôm tơdrong hơtŭt băl lăm tơduă kơtum kơtŏng ‘nhŏng oh lăm Kră Yang wă ư-ang anăn Kră Yang păng inh gơh tơiung dih băl. Yua anăn Kră Yang Yêsu Krist, Amen.
Lu bơ̆n juăt kơ hơmet tơdrong đei hơtŭt dih băl hăm tơduă ‘nhŏng oh bơngai lui hăm tơdrong thoi yơ?
Đŏk Sơ̆p Hla ar ‘Bok Kei-Dei lăm pêng sơnăm: Hơriso 104.
Kênh Youtube BHKTHN:
