Klei Aê Diê Blŭ: Klei Mphŭn Dơ̆ng 9:1-7
Êlan kliăng: “Aê Diê hơêč hmưi klei jăk jĭn kơ Y-Nôê leh anăn kơ phung anak êkei ñu, leh anăn lač kơ digơ̆, ‘Brei diih jing lar êngŭm leh anăn bi bŏ lăn ala.’ ” (Klei Mphŭn Dơ̆ng 9:1)
Klei êmuh ksiêm mĭn: Leh êa lip, ya klei Aê Diê mtă kơ mnuih? Mbĭt hŏng klei mtă anei, ya klei Aê Diê brei mnuih ngă? Ya drei mĭn kơ klei mphŭn dơ̆ng mrâo Aê Diê brei?
Leh bi kmhal lăn ala hŏng êa lip, Aê Diê brei kơ mnuih sa klei mphŭn dơ̆ng mrâo găn hŏng gŏ sang Y-Nôê: “Aê Diê hơêč hmưi klei jăk jĭn kơ Y-Nôê leh anăn kơ phung anak êkei ñu, leh anăn lač kơ digơ̆, “Brei diih jing lar êngŭm leh anăn bi bŏ lăn ala” (êlan 1). Klei mtă brei “bi bŏ lăn ala” lŏ mñă hlăm êlan 7, leh anăn anei mơh jing klei Aê Diê čiăng tơdah Ñu hrih mjing mnuih mơ̆ng hruê mphŭn dơ̆ng (Klei Mphŭn Dơ̆ng 1:28). Aê Diê čiăng mnuih jing lar êngŭm leh anăn bi bŏ lăn ala čiăng kiă kriê lăn ala Ñu hrih mjing leh. Wăt tơdah klei soh mŭt leh anăn bi kgăn ƀiădah hdră Aê Diê čiăng mnuih ngă amâo mâo mlih ôh.
Mbĭt hŏng klei mtă anei mơh, Aê Diê brei mnuih dưi ƀơ̆ng čĭm jih jang mnơ̆ng hdĭp kpư̆ hiu, ƀiădah mtă kơ digơ̆ amâo dưi ƀơ̆ng êrah ôh (êlan 3-4). Aê Diê ghă amâo brei ƀơ̆ng êrah kyuadah êrah bi hmô kơ klei hdĭp kyuanăn brei mnuih mpŭ kơ klei hdĭp Aê Diê mjing leh anăn brei leh. Gưt kơ klei mtă anei jing klei bi êdah kơ klei mpŭ kơ Pô mjing leh klei hdĭp. Ti tluôn anăn Aê Diê lŏ mtă brei mnuih mpŭ kơ klei hdĭp pô mkăn jing pô Aê Diê hrih leh tui si rup Ñu pô (êlan 6). Ngă jhat kơ mnuih mkăn jing ngă jhat kơ rup Aê Diê pô yơh. Wăt tơdah Aê Diê ruah gŏ sang Y-Nôê čiăng mjing sa klei mphŭn dơ̆ng mrâo kơ phung mnuih dưn, digơ̆ ăt jing mnuih amâo klă ênŭm hdĭp ti krah lăn ala bi bŏ leh hŏng klei soh. Aê Diê čiăng digơ̆ dưi hŏng klei soh, klei jhat ƀai, čiăng dôk dơ̆ng hŏng mnuih mkăn hŏng klei mpŭ, leh anăn dlăng yuôm, kyuadah anăn jing êlan digơ̆ huĭ mpŭ kơ Aê Diê.
Klei bi kmhal hŏng klei êa lip prŏng ruê̆ leh, mnuih kmưn mŭt hlăm sa klei mphŭn dơ̆ng mrâo, lŏ dơ̆ng hlăm hdră leh anăn klei Aê Diê čuăn leh kơ mnơ̆ng Ñu hrih mjing mơ̆ng hruê mphŭn dơ̆ng. Mâo wưng hlăm klei hdĭp, drei srăng tuôm hŏng klei lông dlăng, amâodah wăt tŭ klei Aê Diê bi kmhal mơh. Ƀiădah klei mơak jing Khua Yang amâo tuôm lui drei ôh. Khua Yang ƀuăn: “Kâo amâo srăng lui ih amâodah hngah kơ ih ôh” (Hêbrơ 13:5). Ruê̆ mlam mmăt, ang dar srăng truh, leh anăn Khua Yang ăt čiăng yua drei čiăng bi leh hdră Ñu. Amâo djŏ Khua Yang brei kơ drei knŏng klei mphŭn dơ̆ng mrâo ôh, ƀiădah Ñu brei wăt klei jăk jĭn leh anăn klei Ñu blŭ ktrâo atăt čiăng drei dưi hdĭp leh anăn mâo boh kơ Ñu. Bi mni bĕ kơ Khua Yang leh anăn kăp êbat tui hlue klei mphŭn dơ̆ng mrâo Ñu brei.
Si drei srăng ngă tơdah Khua Yang brei kơ drei mmông myun čiăng lŏ dưi đru bruă hlăm hdră Ñu?
Wah lač: Ơ Khua Yang, kâo lač jăk kơ Ih kyuadah wăt tơdah Ih bi kmhal klei soh mnuih ƀiădah klei Ih khăp leh anăn hdră Ih pioh kơ mnuih amâo tuôm tuč ruê̆ ôh. Bi mni kơ Khua Yang brei leh kơ kâo mmông myun pioh mă bruă kơ Ih. Đru kâo thâo mpŭ kơ klei hdĭp leh anăn knang kơ klei ktang Ih čiăng kơ kâo hdĭp gưt tui si klei Ih čiăng grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Mika 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
