Blŭng a 9:1-7
“Kră Yang ‘Bok Kei-Dei ăn pŭn hiôk kơ Nôê păng lu kon drŏ-nglo sư, Sư khan thoi âu: “Athei pơjing adrĕch adrung hrôh-ngôh rai lơ ding ‘bĕnh ‘bang kơpal teh.” (Blŭng a 9:1)
Nơ̆r jet tơchĕng pơwao:
– Đơ̆ng rŏng kơ đak lơ̆p, Kră Yang đei nơ̆r tơtă ayơ ‘măn kơ kon bơngai?
– Hơdai hăm nơ̆r tơtă ‘nâu, Kră Yang pơkă kon bơngai athei pơm kiơ?
– Bơ̆n tơchĕng kiơ gah tơdrong pơtơm tơdrong ‘nao blŭng a Kră Yang ăn?
Đơ̆ng rŏng kơ phak kon bơngai hăm đak lơ̆p, Kră Yang ăn kơ kon bơngai tơdrong pơtơm tơdrong ‘nao blŭng a đơ̆ng lăm hnam dơnŏ ‘bok Nôê: “Kră Yang ‘Bok Kei-Dei ăn pŭn hiôk kơ Nôê păng lu kon drŏ-nglo sư, Sư khan thoi âu: “Kră Yang ‘Bok Kei-Dei ăn pŭn hiôk kơ Nôê păng lu kon drŏ-nglo sư, Sư khan thoi âu: “Athei pơjing adrĕch adrung hrôh-ngôh rai lơ ding ‘bĕnh ‘bang kơpal teh.” (trong 1). Nơ̆r tơtă “athei pơjing adrĕch adrung hrôh ngôh rai lơ ding ‘bĕnh ‘bang kơpal teh ” đei pơma pơlơ̆k lăm trong 7, păng ‘nâu bơih kư̆m tơdrong Kră Yang lăp đon kơplah Sư pơjing kon bơngai đơ̆ng blŭng a sơ̆ (Blŭng a 1:28). Kră Yang wă kơ kon bơngai chek lar rai lơ păng ‘bĕnh ‘bang kơ teh wă wei lăng dêh char Kră Yang pơjing. Mă khan tơdrong yoch đei mơ̆t tơ lăm noh păng pơgăn lê̆ lei na tơdrong jang Kră Yang ‘măn kơ kon bơngai oei ưh kơ layơ tơplih.
Hơdai hăm nơ̆r tơtă ‘nâu, Kră Yang ăn kơ kon bơngai gơh sa ‘nhĕm sem dơrong, mălei pơkă kơ lu sư ‘nĕ kơ sa pham sem dơrong (trong 3-4). Tơdrong mă Kră Yang khă tơdrong ‘nâu yua pham pơm kơmĭl kơ tơdrong arih lei na kon bơngai kăl kơ lăng gĭt tơdrong arih Kră Yang đei pơjing păng ăn kơ bơ̆n. Pơm kiơ̆ nơ̆r tơtă ‘nâu ‘noh tơ’bôh jơhngơ̆m pơyom kơ Tơ’ngla mă pơjing tơdrong arih. Tơdrong pơtrơp dơ̆ng Kră Yang pơkă kon bơngai athei lăng gĭt tơdrong arih bơngai nai jơ̆ lu bơngai đei pơjing hơbŏ thoi rup Sư (trong 6). Pơm pơrăm bơngai nai noh bơih pơm pơrăm rup Kră Yang ‘Bok Kei-Dei. Mă khan hnam dơnŏ Nôê Kră Yang rơih wă pơjing minh tơdrong pơtơm blŭng ‘nao kơ kon bơngai, lei na lu sư kư̆m bơngai ưh kơ kĕ pơm ‘lơ̆ng arih lăm dêh char đei tơdrong yoch. Kră Yang wă kơ lu sư kĕ jei đơ̆ng tơdrong yoch, pơm kơnê̆, wă kơ arih sa hăm bơngai nai hăm jơhngơ̆m pơyom gĭt găt, yua kơ noh bơih trong mă lu sư pơyom kơ ‘Bok Kei-Dei.
Tơdrong phak hăm đak lip hlôi đĭ bơih, kon bơngai mơ̆t lăm tơdrong pơtơm ‘nao blŭng a, pơtrơp dơ̆ng tơdrong tơdă păng tơdrong Kră Yang hơmet ‘măn kơ dôm tơmam Sư đơ̆ng blŭng a sơ̆. Đei lu kơnao lăm tơdrong chăl arih, bơ̆n athei hlôi mơn tơdrong pơlong lăng, dah chu iŏk tơdrong Kră Yang phak hloi tăm. Mălei tơdrong hiôk ‘noh Kră Yang ưh kơ layơ achăng lê̆ bơ̆n, nơ̆r Kră Yang pơkă: “Inh ưh kơ đei layơ achăng lê̆ iĕm ôh” (Hêbrơ 13:5). Đơ̆ng rŏng kơ măng klăm, măt ‘năr lĕch, păng Kră Yang kư̆m oei ‘maih yua bơ̆n. Wă pơm keh tơdrong Sư tơdă. Ưh kơ sĭ Kră Yang ăn kơ bơ̆n tơdrong pơtơm ‘nao blŭng a đĕch ôh, na Sư kư̆m ăn tơdrong pŭn hiôk păng ăn nơ̆r bơtho tơ’bôh wă kơ gơh arih păng đei yua kơ Kră Yang. Athei bơnê kơ Kră Yang păng wă yak năm kiơ̆ Kră Yang ăn kơ bơ̆n tơdrong pơtơm ‘nao blŭng a.
Ơ Kră Yang inh kơkuh kơ Ih, inh bơnê kơ Ih yua kơ mă khan đei phak tơdrong yoch kon bơngai, lei na tơdrong ‘mêm păng tơdrong Ih hơmet ‘măn kơ kon bơngai, ưh kơ đei layơ đĭ ôh. Bơnê kơ Ih đei ăn kơ inh jơ năr wă bơ̆jang dơ̆ng kơ Ih. Apinh Ih bơtho inh băt kơ gĭt kăl kơ tơdrong arih păng gơnang kơ tơdrong pran Ih rim năr wă kơ arih chu kiơ̆ Ih lăp đon. Krao khan yua anăn Kră Yang Yêsu Krist, Amen.
Bơ̆n gô pơm tơwih thoi yơ kơplah Kră Yang ăn đei jơ năr wă kơ gơh đei lăm tơdrong tơdă Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Mika 5
Kênh Youtube BHKTHN:
