Klei Aê Diê Blŭ: Y-Yôhan 16:5-11
Êlan kliăng: “Leh anăn tơdah Ñu truh, Ñu srăng kčŭt lăn ala kơ klei soh, kơ klei kpă ênô, leh anăn kơ klei phat kđi:” (Y-Yôhan 16:8)
Klei êmuh ksiêm mĭn: Ya klei tŭ dưn truh tơdah Khua Yang Yêsu đuĕ wĭt? Ya bruă Yang Mngăt Jăk ngă? Si drei wĭt ngă tơdah Yang Mngăt Jăk bi êdah klei soh, klei awăt êdu drei?
Ai tiê phung ƀĭng kna bŏ hŏng klei ênguôt tơdah hmư̆ klei Khua Yang đuĕ wĭt, kyuanăn Khua Yang lač: “Jing jăk hĭn kơ diih tơdah Kâo đuĕ wĭt” (êlan 7). Klei jăk hĭn anei jing klei Yang Mngăt Jăk, Pô Bi Juh srăng trŭn hriê. Hŏng Ñu yơh, bruă Khua Yang Yêsu bi mtlaih amâo knŏng jing klei truh hlăm hƀuê ênuk ôh, ƀiădah jing klei bi knal hdĭp ngă bruă hlăm ai tiê mnuih đăo. Yang Mngăt Jăk srăng trŭn hriê “Ñu srăng kčŭt lăn ala kơ klei soh, kơ klei kpă ênô, leh anăn kơ klei phat kđi:” (êlan 8). Tlâo mta bruă anei amâo djŏ kăp pioh phat kđi anak mnuih ôh, ƀiădah čiăng pŏk êlan kơ klei kmhal kơ klei soh leh anăn klei bi mtlaih, sa klei hưn mdah êlam lĭn kơ klei khăp klei pap Khua Yang.
Tal sa, Yang Mngăt Jăk kčŭt ƀuah anak mnuih “Kyuadah diñu amâo đăo kơ Kâo ôh” (êlan 9). Phŭn knhal kơ klei soh amâo djŏ knŏng jing bruă ngă soh ôh ƀiădah klei amâo đăo, klei hngah kơ Yang Krist. Boh blŭ “kčŭt ƀuah” hlăm boh blŭ phŭn, amâo knŏng brei ƀuh klei soh, ƀiădah wăt čiăng lač “brei đup gưt” mơh. Yang Mngăt Jăk mblang ală anak mnuih brei thâo kral klei ktrŏ kjham klei soh leh anăn atăt diñu truh kơ klei čuăn ai tiê kmhal kơ klei soh.
Tal dua, Yang Mngăt Jăk kčŭt ƀuah kơ klei kpă ênô “kyuadah Kâo đuĕ wĭt kơ Ama” (êlan 10). Klei hdĭp Khua Yang ti lăn ala jing sa jar bi hmô klă kluôm kơ klei kpă ênô. Hlăk Khua Yang đĭ wĭt kơ adiê, Yang Mngăt Jăk ăt dôk ngă nanao bruă hưn bi sĭt hlăm ai tiê drei snei, klei kpă ênô sĭt knŏng ƀuh hjăn hlăm Khua Yang Yêsu. Ñu ktrâo brei ƀuh klei kƀah anak mnuih leh anăn atăt ba drei truh kơ klei kluôm ênŭm Yang Krist jing Pô mjing leh klei kpă ênô kơ jih jang hlei pô đăo kơ Ñu.
Tal tlâo, Yang Mngăt Jăk kčŭt ƀuah lăn ala “kơ klei phat kđi, kyuadah khua kiă kriê lăn ala anei Aê Diê phat kđi leh” (êlan 11). Klei bi blah dưi hĭn leh hŏng Satan ti kyâo bi kal. Yang Mngăt Jăk brei ƀuh klei jhat ƀai amâo srăng dưi hĭn ôh leh anăn klei Aê Diê phat kđi jing sĭt nik. Wăt tơdah klei hưn êlâo brei răng anei, ăt hưn mdah klei khăp klei pap mơh. Khua Yang brei anak mnuih mâo mmông găl tlaih đuĕ mơ̆ng klei rai luč, čiăng nao kơ klei hdĭp hlăm Yang Krist.
Găn jih tlâo mta bruă ti dlông anei, Yang Mngăt Jăk bi êdah Aê Diê jing kpă ênô, doh jăk hŏng klei soh, ƀiădah Ñu bŏ hŏng klei khăp klei pap kơ phung mnuih soh. Yang Mngăt Jăk kčŭt ƀuah phung ka đăo čiăng brei diñu thâo kral klei soh leh anăn mă tŭ Klei Mrâo Mrang Jăk; Ñu atăt gai phung đăo êbat hlăm klei doh jăk. Thâo kral mâo Yang Mngăt Jăk dôk hlăm klei hdĭp drei, đru drei kăp hưn klei soh mtam, hdĭp hlăm klei djăl pral thâo săng klei hdĭp myang leh anăn êran nao kơ Yang Krist nanao čiăng dưi mâo klei pap brei klei soh. Tơdah Yang Mngăt Jăk bi êdah klei awăt êdu drei, đăm drei ñĕ đuĕ ôh, ƀiădah brei dlăng phă Khua Yang Yêsu leh anăn hưn klei soh hŏng Ñu, kyuadah knŏng hjăn Ñu yơh brei kơ drei klei dưi yap kpă ti anăp Aê Diê.
Si ngă drei dôk êbat hlăm klei Yang Mngăt Jăk atăt gai grăp hruê mơ̆?
Wah lač: Ơ Yang Mngăt Jăk, bi mni lač jăk kơ Ih kyua klei Ih kčŭt ƀuah leh anăn đru. Akâo Ih pŏk mblang ală kâo ti anăp klei soh , atăt ba kâo nao kơ klei kpă ênô Yang Krist, leh anăn đru kâo dôk hdĭp grăp hruê hlăm klei mngač Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 98-99
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
