Yauhas 16:5-11
Nqe cim:
“Thaum nws los lawm, nws yuav qhia rau neeg ntiajteb kom paub txog kev txhaum, kev ncaj ncees thiab Vajtswv txojkev txiav txim” (Yauhas 16:8)
Lus nug xav:
– Tswv Yexus mus saum ntuj muaj nqis dabtsi?
– Vaj Ntsujplig tes haujlwm yog dabtsi?
– Peb yuav teb licas thaum Vaj Ntsujplig qhia tshwm txog peb txojkev txhaum lossis txojkev qaug zog?
Cov thwjtim nyuaj siab heev thaum hnov hais tias tus Tswv yuav mus, yog li ntawd tus Tswv thiaj hais tias: “qhov uas kuv ncaim nej mus yuav zoo dua…” (nqe 7). Qhov zoo dua no yog qhov uas Vaj Ntsujplig, Tus Nplig Siab – yuav nqis los. Dhau ntawm Nws, Tswv Yexus txojkev tuag txhiv tsis tsuas yog ib zaj keeb kwm xwb, tiamsis yuav dhau los ua ib qho kev tseeb uas muaj sia nyob hauv tus ntseeg lub siab. Vaj Ntsujplig yuav los “qhia rau neeg ntiajteb kom paub txog kev txhaum, kev ncaj ncees thiab Vajtswv txojkev txiav txim” (nqe 8). Peb yam no tsis yog los rau txim rau tibneeg, tiamsis yog qhib kev kom neeg paub tso siab qub tseg thiab tau txais kev cawmdim, ntawd yog yam qhia tshwm txog tus Tswv txojkev hlub tshua uas loj kawg nkaus.
Qhov xub thawj, Vaj Ntsujplig qhuab ntuas tibneeg “vim lawv tsis ntseeg” Tswv Yexus (nqe 9). Lub ntsiab ntawm txojkev txhaum tsis yog tes haujlwm tsis raug cai xwb, tiamsis tseem yog qhov uas tsis ntseeg thiab tsis txais yuav Yexus Khetos. Lo lus “qhia” nyob ntawm hauvpaus lus tsis yog tsuas hais txog kev taw qhia qhov txhaum xwb, tiamsis tseem muaj ntsiab lus hais tias “ntes tau”. Vaj Ntsujplig qhib tibneeg lub qhovmuag kom pom txog qhov txaus ntshai ntawm txojkev txhaum thiab coj lawv mus rau qhov kev txiav txim siab lees txim.
Qhov ob, Vaj Ntsujplig qhia rau tibneeg paub txog txojkev ncaj ncees vim Tswv Yexus “yuav mus cuag Leej Txiv” (nqe 10). Tswv Yexus lub neej hauv ntiajteb no yog ib tus qauv zoo tshajplaws ntawm txojkev ncaj ncees. Thaum tus Tswv rov mus saum ntuj lawm, Vaj Ntsujplig los ua timkhawv hauv peb lub siab hais tias txojkev ncaj ncees tiag tiag tsuas nrhiav pom hauv Tswv Yexus xwb. Nws qhia tibneeg pom lawv kev qaug zog thiab coj peb mus cuag Yexus Khetos, Tus uas muab txojkev ncaj ncees pub rau txhua tus uas ntseeg.
Qhov peb, Vaj Ntsujplig qhia rau neeg ntiajteb paub “qhov uas muaj kev txiav txim, vim tus uas kav lub ntiajteb twb raug txiav txim lawm” (nqe 11). Xatas twb raug swb ntawm tus ntoo khaublig lawm. Vaj Ntsujplig qhia pom hais tias txojkev phem yuav tsum raug swb thiab Vajtswv txojkev txiav txim yog qhov tseeb tiag. Kiag lo lus ceebtoom no kuj yog qhov qhia tshwm txog txojkev hlub tshua. Tus Tswv pub sijhawm rau tibneeg tig ntawm txojkev puas tsuaj rov qab los txais txojsia hauv Yexus Khetos.
Dhau ntawm peb tes haujlwm saum toj no, Vaj Ntsujplig qhia tshwm hais tias Vajtswv yog tus ncaj ncees thiab dawbhuv, tiamsis Nws kuj puv npo lub siab hlub tshua rau tus neeg txhaum. Vaj Ntsujplig qhia kom tus neeg tsis tau ntseeg zeem paub txog kev txhaum thiab txais yuav Txojmoo Zoo; thiab Nws coj tus ntseeg rhais ruam mus hauv txojkev dawbhuv. Qhov uas zeem paub txog Vaj Ntsujplig kev nyob nrog nraim pab peb nco ntsoov lees txim, ua lub neej tsim dheev hauv sab ntsujplig thiab niaj hnub los cuag Yexus Khetos kom tau txais kev zam txim. Thaum Vaj Ntsujplig qhia rau peb pom tus kheej txojkev qaug zog, ces peb txhob khiav nkaum, tiamsis cia li ntsia ntsoov Tswv Yexus thiab lees txim rau Nws, rau qhov tsuas yog Nws tib leeg thiaj pab tau peb dhau los ua neeg ncaj ncees tabmeeg Vajtswv.
Thov Vajtswv,
Vaj Ntsujplig, ua Koj tsaug vim Koj niaj hnub qhuab ntuas thiab pab nyuam yaus. Thov qhib nyuam yaus lub qhovmuag kom pom txojkev txhaum, coj nyuam yaus los cuag Yexus Khetos txojkev ncaj ncees, thiab pab nyuam yaus ua lub neej txhua hnub hauv Koj qhov tseeb ci ntsa iab. Nyuam yaus tuav Tswv Yexus Khetos lub npe thov, Amees.
Peb puas tabtom ua lub neej raws li Vaj Ntsujplig txojkev coj qhia txhua hnub lawm?
Nyeem Vajluskub hauv peb lub xyoos: Ntawv Nkauj 98-99
Kênh Youtube BHKTHN:
