Klei Aê Diê Blŭ: Bruă Phung Khua Ƀĭng Kna 1:1-11
Êlan kliăng: “Ơ phung mnuih čar Galilê, si ngă diih dôk dơ̆ng dlăng kơ adiê lĕ? Yêsu anei, Pô Aê Diê pŭ ba leh kơ adiê mơ̆ng diih, srăng lŏ hriê msĕ si diih ƀuh Ñu đĭ kơ adiê mơh” (Bruă Phung Khua Ƀĭng Kna 1:11)
Klei êmuh ksiêm mĭn: Êlâo kơ đĭ wĭt kơ adiê, ya bruă Khua Yang Yêsu jao kơ phung ƀĭng kna leh anăn kơ drei? Ya klei myang Khua Yang brei čiăng kơ drei dưi nao hưn bi sĭt kơ Ñu? Khua Yang đĭ wĭt kơ adiê brei ya klei čang hmăng kơ drei?
Leh kbiă lŏ hdĭp, Khua Yang Yêsu bi êdah Ñu pô kơ phung ƀĭng kna Ñu êjai pă pluh hruê. Êlâo kơ đĭ wĭt kơ adiê, Ñu mtă kơ digơ̆ đăm kbiă mơ̆ng ƀuôn Yêrusalem ôh, ƀiădah dôk guôn tơl Yang Mngăt Jăk trŭn hriê, Ñu srăng brei klei myang kơ digơ̆ čiăng kơ digơ̆ jing phung hưn bi sĭt kơ Ñu tar ƀar lăn ala. Êdei tinăn, Aê Diê pŭ ba Khua Yang Yêsu kơ dlông ti anăp ală phung ƀĭng kna, leh anăn mâo knam guôm Ñu. Mâo dua čô dĭng buăl jăk bi êdah, lač kơ phung ƀĭng kna Yêsu srăng lŏ hriê msĕ si digơ̆ ƀuh Ñu đĭ wĭt kơ adiê mơh.
Bi hdơr knăm Khua Yang Yêsu đĭ wĭt kơ adiê, Khua Yang mñă brei drei ngă bruă klam prŏng Ñu jao leh tơl hruê drei bi tuôm hŏng Ñu, hŏng klei găn mrâo. Tal sa, kčưm hŏng sa bruă klam yuôm mrâo. Khua Yang Yêsu bi leh leh bruă klam yuôm Ñu ti lăn ala, Ñu đĭ wĭt kơ adiê dôk gŭ tĭng hnuă Aê Diê đru wah lač brei kơ drei čiăng drei lŏ ngă bruă klam yuôm Ñu jao leh, hưn bi sĭt kơ Ñu tơl truh ti knhal lăn ala. Êjai phung ƀĭng kna angưi dlăng kơ Khua Yang đĭ wĭt kơ adiê, mâo dua čô dĭng buăl jăk lač kơ digơ̆ “Si ngă diih dôk dơ̆ng dlăng kơ adiê lĕ?” Khua Yang čiăng drei lŏ wĭt kơ klei hdĭp aguah tlam ngă bruă klam mrâo Ñu jao leh, jing phung hưn bi sĭt kơ Ñu hŏng klei hur har.
Tal dua, hưn bi sĭt kơ Khua Yang hŏng klei myang mrâo, Khua Yang Yêsu đĭ wĭt kơ adiê ƀiădah Ñu ƀuăn “Kâo dôk mbĭt hŏng diih nanao tơl knhal tuč lăn ala” (Y-Mathiơ 28:20). Anăn jing klei ƀuăn Yang Mngăt Jăk srăng trŭn hriê, dôk mbĭt hŏng phung anak ƀuôn sang Ñu, leh anăn Yang Mngăt Jăk srăng brei wăt klei myang mơh čiăng kơ drei hưn bi sĭt kơ Khua Yang tar ƀar lăn ala (êlan 8).
Tal tlâo, hdĭp hŏng klei čang hmăng mrâo. Klei dua čô êkei hơô ao kô̆ lač kơ phung ƀĭng kna êjai digơ̆ dôk dlăng kơ Khua Yang đĭ wĭt kơ adiê snei, “Ơ phung mnuih čar Galilê, si ngă diih dôk dơ̆ng dlăng kơ adiê lĕ? Yêsu anei, Pô Aê Diê pŭ ba leh kơ adiê mơ̆ng diih, srăng lŏ hriê msĕ si diih ƀuh Ñu đĭ kơ adiê mơh” (êlan 11). Klei blŭ anei amâo djŏ knŏng mñă brei phung ƀĭng kna đuĕ wĭt jing phung hưn bi sĭt kơ Khua Yang ôh, ƀiădah jing klei čang hmăng mrâo kơ jih jang phung đăo kơ Ñu mơh: Khua Yang srăng lŏ hriê. Hlăm klei čang hmăng anăn, drei hur har jing phung hưn bi sĭt kơ Khua Yang hŏng klei čiăng snăk djăl đĭ nao kơ Ƀuôn Jăk, jing anôk Khua Yang Yêsu đĭ nao leh čiăng mkra kơ drei sa anôk dôk, leh anăn hruê Khua Yang lŏ hriê drei srăng mŭt dôk mbĭt hŏng Ñu hlăm klei guh kơang hlŏng lar.
Čiăng snăk knăm bi hdơr hruê Khua Yang đĭ wĭt kơ adiê srăng ba hriê kơ grăp čô drei lu klei găn mrâo leh anăn mtrŭt drei hur har ngă bi leh bruă klam yuôm Khua Yang jao leh êjai dôk guôn Ñu lŏ trŭn hriê.
Ya klei drei ƀuăn hŏng Khua Yang hlăm hruê knăm bi hdơr hruê Khua Yang đĭ wĭt kơ adiê thŭn anei?
Wah lač: Ơ Khua Yang Yang Mngăt Jăk, mă bruă ktang bĕ hlăm kâo čiăng kơ kâo hur har hưn bi sĭt kơ Khua Yang kơ phung riêng gah kâo. Akâo Ih kčŭt kơ lu mngăt mnuih brei digơ̆ thâo kmhal kơ klei soh leh anăn lŏ wĭt kơ Khua Yang čiăng kơ hruê Khua Yang lŏ hriê lu mnuih mâo klei bi mtlaih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
