Tes Haujlwm 1:1-11
Nqe cim:
“”Cov neeg Kalilais, nej sawv saib saum ntuj ua dabtsi? Yexus tus uas Vajtswv nyuam qhuav coj mus saum ntuj lawm, nws yeej yuav rov qab los ib yam nkaus li uas nej pom nws mus ntag” (Tes Haujlwm 1:11)
Lus nug xav:
– Ua ntej yuav mus saum ntuj, tus Tswv cob rau cov thwjtim thiab peb ua yam dabtsi?
– Tus Tswv pub lub hwjchim twg rau peb tawm mus ua timkhawv hais txog Nws zaj?
– Tus Tswv mus saum ntuj ua rau peb muaj kev cia siab li cas?
Tom qab uas sawv hauv qhov tuag rov los, Tswv Yexus nrog cov thwjtim nyob tau 40 hnub, qhia lawv hais txog Vajtswv lub Tebchaws. Ua ntej yuav mus saum ntuj, Nws hais kom lawv tsis txhob tawm hauv lub nroog Yeluxalees mus, tiamsis yuav tsum tos mus txog hnub uas Vaj Ntsujplig los, Nws yuav pub lub hwjchim rau cov thwjtim ces lawv yuav .ua timkhawv qhia tus Tswv zaj mus thoob qab ntuj. Tom qab ntawd, Tswv Yexus thiaj mus saum ntuj tabmeeg cov thwjtim saib ntsoov, thiab muaj ib tauv huab los roos Nws. Muaj ob tug timtswv tshwm los hais rau cov thwjtim hais tias Nws yuav rov qab los ib yam li uas nej pom Nws mus.
Koob tsheej nco txog qhov uas Tswv Yexus mus saum ntuj, peb kawm tau tias rau siab ntso ua tes haujlwm Nws muab tso rau peb ua mus txog hnub peb ntsib tus Tswv, tau txais yam tshiab. Tim ib, pib ua qhov tshiab. Tswv Yexus ua tiav Nws tes haujlwm hauv ntiajteb, Nws mus saum ntuj nyob ntawm Vajtswv sabxis thov Vajtswv pab rau peb kom ua ntxiv Nws tes haujlwm, ua timkhawv qhia Nws mus thoob qab ntuj. Thaum cov thwjtim ntsia ntsoov tus Tswv mus saum ntuj, muaj ob tug timtswv los qhia lawv, “nej sawv saib saum ntuj ua dabtsi?” Tus Tswv xav kom peb tig rov los ua neej pheej tshaj, ua tes haujlwm Nws muab tso rau peb ua, rau siab ntso ua timkhawv hais txog Nws zaj.
Tim ob, ua timkhawv hais txog tus Tswv zaj los ntawm lub hwjchim tshiab. Tswv Yexus mus saum ntuj tiamsis Nws coglus hais tias “kuv yuav nrog nraim nej mus txog hnub uas lub ntiajteb no kawg” (Mathais 28:20). Nov yog cov lus cogtseg Vaj Ntsujplig nqis los nrog Vajtswv cov menyuam nyob, dua li Vaj Ntsujplig kuj yuav pub hwjchim kom peb ua tau timkhawv hais txog Nws zaj mus thoob qab ntuj (nqe 8).
Tim peb, ua neej muaj kev cia siab tshiab. Vajtswv Txojlus hais dhau ntawm ob tug txivneej hnav tsho dawb rau cov thwjtim uas tabtom ntsia ntsoov tus Tswv mus saum ntuj hais tias: “Cov neeg Kalilais, nej sawv saib saum ntuj ua dabtsi? Yexus tus uas Vajtswv nyuam qhuav coj mus saum ntuj lawm, nws yeej yuav rov qab los ib yam nkaus li uas nej pom nws mus ntag” (nqe 11). Cov lus hais no tsis yog hais kom cov thwjtim rov mus ua timkhawv rau tus Tswv xwb tiamsis tseem yog hais rau Vajtswv cov menyuam kom muaj kev cia siab tshiab: Tus Tswv yuav rov qab los. Hauv txoj kev cia siab no, peb kub siab lug ua timkhawv qhia tus Tswv zaj vim peb xav mus nyob saum ntuj, qhov chaw uas Tswv Yexus mus tu chaw saum ntuj, thiab hnub tus Tswv rov los peb yuav tau mus nrog Nws nyob kaj siab ibtxhis.
Xav kom lub koob tsheej nco txog Tswv Yexus mus saum ntuj ua rau peb tau txais yam tshiab thiab txhawb peb cov uas tseem nyob tos Tswv Yexus rau siab ntso ua tes haujlwm tus Tswv muab tso rau peb ua.
Thov Vajtswv,
Vaj Ntsujplig, thov Koj ua haujlwm hauv nyuam yaus lub siab kom nyuam yaus kub siab lug ua timkhawv hais txog tus Tswv zaj rau cov neeg nyob ibncig. Thov Koj tshoov kom cov neeg hnov tus Tswv zaj tso kev txhaum tseg tig los ntseeg Yexus txais kev cawm dim ua ntej hnub tus Tswv los. Nyuam yaus tuav Tswv Yexus lub npe thov, Amees.
Peb coglus li cas rau tus Tswv hnub uas peb ua koob tsheej nco txog tus Tswv mus saum ntuj xyoo no?
Nyeem Vajluskub hauv peb lub xyoo: Tshwmsim 4
Kênh Youtube BHKTHN:
