Chivkeeb 6:1-10
Nqe cim:
“tiamsis qhov twg muaj kev txhaum, Vajtswv txojkev hlub hajyam muaj nyob qhov ntawd” (Loos 5:20b)
Lus nug xav:
– Vim li cas Vajtswv tu siab thiab txiav txim siab rau txim rau lub ntiajteb?
– Qhov uas “tus Tswv txaus siab heev rau Nau-es” hais txog yam dabtsi?
– Peb kawm tau yuav tsum ua li cas nyob rau lub ntiajteb muaj kev txhaum no?
Vajtswv Txojlus sau tseg tias thaum neeg huamvam coob nyob hauv ntiajteb no ces muaj ib co timtswv qaum ntuj los yuav neeg ntiajtej tej ntxhais ua pojniam. Hais txog lub ntsiab “cov timtswv qaum ntuj” yog leejtwg twb tau muaj kev sib cav ntau tiam neeg dhau los uas yog ob txojkev xav. Thawj qhov kev xav ces lawv hais tias yog cov timtswv uas poob kev txhaum. Txawm yog Tswv Yexus twb txhais qhia hauv Mathais 22:30 hais tias timtswv tsis paub sib yuav, los qhov no tej zaum muaj cov timtswv poob kev txhaum, tawmtsam Vajtswv. Lawv txia ua neeg los yuav neeg ntiajteb cov ntxhais. Qhov kev xav tim ob hais tias “cov timtswv qaum ntuj” yog Xej cajces uas ntseeg Vajtswv. Txawm yog tseem muaj kev sib cav txog qhov no los yam uas tseemceeb ntawm ntu Vajluskub no hais txog yog tej kev txhaum lub ntiajteb no ua loj heev, xav phem txhua lub sijhawm, tsis kam ua li Vajtswv Txojlus qhia. Kev txhaum tsis yog ua kiag tawm sab nraud xwb tiamsis hauv txojkev xav huvsi. Tus Tswv ntsia pom tagnrho thiab Nws tu siab. Tej uas neeg ua ua rau Vajtswv txiav txim siab rau txim rau lub ntiajteb (nqe 7).
Nyob rau lub tsamthawj tas kev cia siab no, Vajtswv Txojlus hais txog ib tug duab txawv sawvdaws: “tiamsis tus Tswv txaus siab heev rau Nau-es” (nqe 8). Ua neej nyob rau lub ntiajteb ua phem ua qias, tiamssis Nau-es tseem “Nau-es yog ib tug neeg ncaj ncees thiab nws yeej ibtxwm ua zoo tas nws simneej. Nws ua neej raws li Vajtswv lub siab nyiam” (nqe 9). Nau-es yog ib tug neeg tau saj Vajtswv txoj koob hmoov pub dawb thiab nws ua neej haum Vajtswv siab. Qhov no qhib txojkev rau yav tom ntej rau nws thiab lub ntiajteb no – Nau-es tau Vajtswv xaiv los ua Nws tes haujlwm cawm neeg ntiajteb.
Lub ntiajteb uas peb tabtom nyob no kuj puv npho kev txhaum thiab kev ua phem ua qias huam loj zuj zus. Neeg lub siab qia, nrhiav tswvyim ua phem. Neeg nrhiav tswvyim hloov tej kabke Vajtswv tsim kom txaus siab ntshaw. Vajtswv tus uas paub txhua yam yeej pom thiab tu siab rau tej uas neeg tabtom ua no heev. Txawm li ntawd los, ua Vajtswv tsaug vim Nws tsis muab tibneeg tso tseg, “(Loos 5:20). Zoo ib yam li Nau-es ua txaus Vajtswv siab, Nws kuj qhia tshwm lub siab hlub cov neeg uas los vamkhom Yexus Khetos cov ntshav txhiv. Thov Vajtswv pab kom peb tsis ua li neeg ntiajteb ua tiamsis hais tej lus thiab ua neej rau ntiajteb paub txog Vajtswv txoj koob hmoov pub dawb npluamias, lawv thiaj tau kev cawm dim.
Thov Vajtswv,
Vajtswv, ua Koj tsaug vim thaum nyuam yaus tseem tuag hauv txojkev txhaum, Koj tso Koj Leej Tub los hauv ntiajteb, tuag saum ntoo khaublig, qhib txojkev cawm dim rau cov neeg uas los cuag Koj. Thov Koj pub kom nyuam yaus ua tau siab tawv qhia Moo Zoo txhua hnub kom muaj neeg los ntseeg tau txais txoj koob hmoov pub dawb. Nyuam yaus tuav Tswv Yexus lub npe thov, Amees.
Peb tabtom ua neej txawv ntiajteb kom ua tau timkhawv qhia tus Tswv lawm tau?
Nyeem Vajluskub hauv peb lub xyoo: Phau Ntawv Nkauj 87-88
Kênh Youtube BHKTHN:
