1 Timautes 4:6-16
Nqe cim:
“Koj yuav tsum ua tib zoo saib, saib koj ua koj lub neej zoo li cas thiab saib tej uas koj qhia koj qhia li cas; koj yuav tsum ua tej ntawd mus” (1 Timautes 4:16)
Lus nug xav:
– Timthawj Paulus ntuas xibhwb Timautes tsis ua dabtsi thiab yuav tsum ua dabtsi?
– Vim li cas tej ntawd tseemceeb rau tus neeg ua haujlwm?
– Lolus qhia no muaj nqis dabtsi rau peb?
Ib tsoom mloog txhua tus,
Hauv tej lus qhia uas timthawj Paulus xa rau xibhwb Timautes txij nqe 6-16, timthawj Paulus siv ib lub npe ntawv “tsis txhob” thiab “yuav tsum”. Xubthawj, timthawj Paulus ntuas tsis txhob nkim sijhawm sib cav txog tej dabneeg uas tsis muaj qabhau tiamsis yuav tsum xyaum ua neej haum Vajtswv siab (nqe 6-10).
Cov hluas uas ua Vajtswv haujlwm yoojyim ua rau ntau leej saib tsis taus, vim qee zaus tau siv hwjchim los teb los yuam lwm tus kom luag hwm yus, tiamsis timthawj Paulus qhia tus neeg ua haujlwm yuav tsum coj tus qauv zoo, tes haujlwm mus raws yus tej lus hais, txhua yam ua puavleej ua los ntawm txoj kev hlub tiag tiag, kev ntseeg muaj zog nrog rau lub neej dawbhuv, tshwjxeeb yog txoj kev phoojywg ntawm pojniam thiab txivneej. Ntawd yog qhov uas zoo tshaj plaws yuav pab tau yus tus kheej zoo zuj zus, ntseeg zoo dua, ua tau haujlwm zoo dua thiab tau luag hwm.
Tus neeg ua Vajtswv haujlwm yuav tsum saib kev nyeem Vajtswv Txojlus tseemceeb, qhuab ntuas, qhuab qhia los ntawm Vajtswv Txojlus. Cov hlua kub siab lug xav ua thiab muaj peevxwm thiaj pheej nyiam mus ua haujlwm thiab ua tsis paub qaug zog. Kev kub siab yog qhov zoo, tiamsis yuav tsum yog pib los ntawm kev paub Vajtswv Txojlus kom yog, tsis li ntawd, peb yuav ua tej haujlwm uas xav hais tias zoo tiamsis tseeb tiag tsis muaj nqis dabtsi.
Thaum uas peb xyaum kho tau lub siab thiab tus cwjpwm, nquag nyeem Vajtswv Txojlus, ces peb tus neeg ua haujlwm txaus siab siv tej koob hmoov uas yus muaj cia ua haujlwm. Cov hluas muaj ntau yam heev uas xav ua, vim li ntawd peb yoojyim hnov qab lub homphiaj tiag tiag uas Vajtswv hu peb, hnov qab tej koob hmoov uas Vajtswv pub rau yus. Zeem paub thiab pheej siv tej koob hmoov uas Vajtswv pub yog qhov uas tsis nkim peb lub sijhawm dag zog thaum hluas, tiamsis “loj hlob zuj zus” txoj kev ua neej haum Vajtswv siab rau txhua fab.
Lolus “yuav tsum” ntawm nqe 16 sau zog txog lolus qhia yuav tsum ua neej haum Vajtswv siab. “Koj yuav tsum ua tib zoo saib, saib koj ua koj lub neej zoo li cas thiab saib tej uas koj qhia koj qhia li cas; koj yuav tsum ua tej ntawd mus” (nqe 16) nov yog lolus ntuas cheem tsum rau tus uas ua haujlwm, vim yog tsis ua tib zoo ua thiab sawv ruaj ces kev txhaum yuav los rhuav tshem haujlwm thiab yuav ua rau yus lub neej ua tsis tau dabtsi rau Vajtswv thiab kis tej kev phem ntawd mus rau lwm tus.
Tswv Yexus tau txhiv peb dim txoj kev ua qhev ntawm dab ntxwgnyoog thiab kev txhaum los cia ua Nws tes haujlwm, txhua tus nyiag muaj nyiag haujlwm sib txawv. Vim li ntawd, timthawj Paulus tej lus qhia tsis yog ntuas xibhwb hluas Timautes xwb tiamsis tseem muaj nqis rau peb txhua tus niaj nim no. Cia li xyaum ua lub neej haum Vajtswv siab dhau los ntawm timthawj Paulus tej lus qhia kom yim hnub peb yim ua tau Vajtswv haujlwm zoo zuj zus.
Thov Vajtswv,
Vajtswv, nyuam yaus ua Koj tsaug uas Koj cawm nyuam yaus thiab pub rau nyuam yaus tau ua Koj tes haujlwm. Thov pab nyuam yaus siv sijhawm ua neej haum Koj siab, dhau los ntawm tej lus hais kev ua neej, kev ntseeg, kev hlub, dlawbhuv thiab rau siab kawm Koj Txojlus los ntuas, qhia txhua tus raws li tej koob hmoov uas Koj pub rau nyuam yaus lawd. Nyuam yaus tuav Tswv Yexus Khetos lub npe thov, Amees.
Peb puas siv tej lus no rau hauv peb lub neej ua Vajtswv tes haujlwm?
Nyeem Vajluskub hauv peb lub xyoos: Exekees 31
Kênh Youtube BHKTHN:
