Klei Aê Diê Blŭ: I Y-Timôthê 4:6-16
Êlan kliăng: “Răng bĕ kơ ih pô leh anăn kơ klei ih mtô. Gĭr ngă klei anăn nanao” (I Y-Timôthê 4:16)
Klei êmuh ksiêm mĭn: Khua ƀĭng kna Y-Pôl mtô kơ khua pô mtô hlăk ai Y-Timôthê ya klei đăm ngă leh anăn brei ngă? Ya ngă klei anăn yuôm bhăn hŏng mnuih mă bruă? Ya klei yuôm bhăn klei mtô anei hŏng drei?
Hlăm klei mtô mơĭt kơ Khua pô mtô Y-Timôthê, mơ̆ng êlan 6-16, Khua ƀĭng kna Y-Pôl yua leh sa boh hră “hngah”, sa boh hră “đăm”, leh anăn năm boh hră lač kơ bruă ngă mphŭn hŏng “brei”. Tal êlâo, ñu mtă đăm bi luč mang ôh hruê mmông bi trông kơ klei yăl dliê đưm, hơăi mang ƀiădah brei mđing hriăm kơ klei thâo mpŭ (êlan 6-10).
Phung hlăk ai mă bruă kơ Aê Diê khăng ênưih tuôm hŏng lu mnuih dlăng hơăi mang, tăp năng yua hŏng klei dưi čiăng mgô̆ pô mkăn mpŭ, ƀiădah Khua ƀĭng kna Y-Pôl mtô kơ mnuih mă bruă brei mâo knuih hdĭp bi hmô jăk, klei blŭ brei nao mbĭt hŏng bruă ngă, jih jang bi êdah klei khăp sĭt, klei đăo kjăp hŏng knuih hdĭp doh jăk, boh nik hlăm klei bi mguôp êkei mniê. Anăn jing hdră jăk hĭn đru kơ pô kluôm ênŭm hĭn, thâo mpŭ hĭn, mă bruă jăk hĭn, leh anăn mâo klei mpŭ.
Mnuih mă bruă kơ Aê Diê brei mđing kơ bruă dlăng Klei Aê Diê Blŭ leh anăn mtô, bi hriăm hŏng tur knơ̆ng Klei Aê Diê Blŭ. Phung hlăk ai hur har leh anăn bŏ hŏng klei ktang kyua anăn khăng ngă bruă knuă, amâo êgah êmăn ôh. Jih ai tiê jing jăk, ƀiădah brei mphŭn mơ̆ng klei thâo săng Klei Aê Diê Blŭ hŏng klei djŏ, tơdah amâo jing snăn, drei srăng ngă bruă bi mĭn jing jăk ƀiădah boh sĭt jing hơăi mang.
Tơdah bi hriăm knuih jăk, kriăng hriăm Klei Aê Diê Blŭ, mnuih mă bruă srăng yua klei pap Aê Diê brei kơ pô čiăng mă bruă. Phung hlăk ai mâo lu snăk klei čiăng ngă, kyua anăn drei ênưih wơr hĕ klei kñăm klă sĭt Khua Yang iêô drei, wơr hĕ klei pap Aê Diê brei kơ pô. Thâo kral leh anăn khăng yua nanao klei pap Aê Diê brei jing klei drei amâo luč liê mang ôh ênuk hlăk ai leh anăn ai ktang, ƀiădah “hriê kơ prŏng” hlăm klei thâo mpŭ hlăm lu mta.
Boh hră “Răng bĕ” leh anăn “gĭr ngă” hlăm êlan 16 klah čŭn klei mtô brei hriăm klei thâo mpŭ. “Răng bĕ kơ ih pô leh anăn kơ klei ih mtô. Gĭr ngă klei anăn nanao” (êlan 16) jing klei mñă čiăng snăk hŏng phung mă bruă, kyua tơdah amâo răng leh anăn dôk kjăp, klei soh srăng mŭt bi rai bruă ngă atăt kơ klei hdĭp amâo mâo boh tŭ dưn kơ Khua Yang leh anăn hmăi jhat kơ lu mnuih.
Khua Yang Yêsu bi tui leh drei mơ̆ng klei jing hlŭn yang jhat leh anăn klei soh čiăng kơ drei dưi mă bruă kơ Ñu, grăp čô sa bruă mdê mdê. Kyua anăn, klei Khua ƀĭng kna Y-Pôl mtô amâo djŏ knŏng kơ hjăn Khua pô mtô hlăk ai Y-Timôthê ôh ƀiădah lŏ mâo ênoh yuôm kơ grăp čô drei hruê anei. Brei hriăm knuih hdĭp thâo mpŭ hlăm klei Khua ƀĭng kna Y-Pôl mtô čiăng kơ grăp hruê mă bruă kơ Khua Yang jăk hĭn.
Si drei yua klei mtô anei kơ klei hdĭp pô mă bruă kơ Khua Yang?
Wah lač: Ơ Khua Yang, bi mni kơ Ih bi tui leh kâo leh anăn brei kâo dưi mă bruă kơ Ih. Akâo kơ Ih đru kâo mđing kơ bruă hriăm klei thâo mpŭ, boh nik hlăm klei blŭ, knuih hdĭp, klei đăo, klei khăp, klei doh jăk, leh anăn hlăm bruă khăp hriăm Klei Aê Diê Blŭ, klei mtô, klei mñă, yua klei pap Aê Diê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
