Ntawv Nkauj 103:8-13
Nqe cim:
“Lub ntuj nyob siab ntawm lub ntiajteb npaum li cas, tus TSWV hlub cov uas hwm nws heev npaum li ntawd.” (Ntawv Nkauj 103:11)
Lus nug rau sawvdaws xav:
– Vajtswv tus yam ntxwv twg Nws chim rau tus neeg phem?
– Vajtswv tus yam ntxwv kev hlub qhia tshwm li cas?
– Peb yuav tsum ua neej li cas thaum uas paub Vajtswv yog kev hlub?
Vajluskub qhia paub Vajtswv yog tus uas coj nruj: “tus TSWV yuav chim rau nej thiab ua kom nej puastsuaj ib yam li hluavtaws kub, rau qhov tus TSWV uas yog nej tus Vajtswv, nws nrog nej nyob thiab khib nej heev” (2 Kevcai 6:15; Nahus 1:2-3). Vajtswv tus yam ntxwv ua rau Nws chim npautaws rau cov uas tsis mloog lus thiab cov neeg phem: “Vajtswv yog tus txiav txim ncaj ncees thiab rau txim tsis tseg rau cov neeg uas ua phem ua qias” (Ntawv Nkauj 7:11).
Peb kuj muaj ntau zaug ua rau Vajtswv chim npautaws vim yus tej kev txhaum. Tiamsis ua Vajtswv tsaug, Nws tseem yog Tus Vajtswv kev hlub. Vim Vajtswv tus yam ntxwv kev hlub ua rau Nws tsis chim sai thiab “Nws tsis cem thiab nws tsis chim mus ibtxhis” (nqe 9). Txoj kev ncajncees ua rau Vajtswv yuav txiav txim rau kev txhaum thiab rau txim kom tsimnyog. Tiamsis lub siab hlub tshua ua rau Vajtswv zam txim, Nws tsis ua rau peb raws li tej kev txhaum uas peb tau ua, Nws tsis ua pauj rau peb tej kev phem kev qias! Vajtswv txoj kev ncajncees thiab kev hlub tau Tswv Yexus ua tiav rau ntawm tus Ntoo Khaublig, thaum uas Nws hais tias: “Tiav lawm lauj!” (Yauhas 19:30). Vim kev ncajncees, Vajtawv yuav tau rau txim rau tibneeg ntiajteb txoj kev txhaum. Tiamsis vim lub siab hlub tshua Nws muab txoj kev rau txim ntawd rau Nws tus tub ris, dhau qhov ntawd qhia tshwm Vajtswv kev hlub los cawm peb dim. “Tus TSWV txojkev hlub uas ruaj khov thiab nws txojkev hlub tshua yeej muaj tsis paub kawg” (Nkauj Quaj Ntsuag 3:22).
Vajtswv txoj kev hlub ua rau peb txoj kev sib raug zoo nrog Vajtswv tsis yog txoj kev sib raug zoo ntawm tus Tswv thiab yam Nws tsim xwb tiamsis tseem yog txiv tub (nqe 13). Kiag Tswv Yexus kuj tau hais rau Malis hais hias: “Koj tsis txhob tuav kuv, rau qhov kuv tseem tsis tau rov mus cuag kuv Txiv. Koj cia li mus hais rau kuv cov kwvtij hais tias, ‘Kuv yuav rov mus cuag tus uas yog kuv Txiv thiab nej Txiv; nws yog kuv tus Vajtswv thiab nej tus Vajtswv” (Yauhas 20:17). Vajtswv txoj kev ncajncees thiab kev hlub rau txim thaum peb ua txhaum kom pab peb dhau los zoo kawg nkaus. Yog yam uas Vajtswv puab ntawm hmoov av los, peb cia li muab yus tso rau hauv Tus Tswv ncajncees thiab muaj kev hlub txhais tes cia Nws muab peb puab ua yam tshiab thiab zoo nkauj dua, ua ib tug neeg loj hlob thiab yim hnub yim zoo li Tswv Yexus Khetos. Yam uas peb cheem tsum nco yog “Lub ntuj nyob siab ntawm lub ntiajteb npaum li cas, tus TSWV hlub cov uas hwm nws heev npaum li ntawd” (nqe 11). Vajtswv txoj kev ncajncees thiab kev hlub yeej niaj hnub caum peb. Tiamsis peb tsis txhob ntxab ntxawm Vajtswv muaj lub siab hlub ces txawm cia li tsis hwm Nws. Peb yim hwm Vajtswv npaum twg, peb yim tau txais Vajtswv kev ua siab ntev, kev hlub npaum li ntawd rau peb.
Thov Vajtswv,
Vajtswv tus ncajncees thiab muaj kev hlub! Thov Koj muab nyuam yaus puab ua yam tshiab dhau los zoo li Koj. Thov pab nyuam yaus ua neej hwm Koj, hlub lwm tus kom nyuam yau tau txais Koj txoj kev hlub uas loj kawg nkaus. Nyuam yaus tuav Tswv Yexus Khetos lub npe thov, Amees.
Peb puas ua neej kom phim Vajtswv txoj kev hlub uas pub rau yus lawd los tsis tau?
Nyeem Vajluskub hauv peb lub xyoos: Amauj 4
Kênh Youtube BHKTHN:
