Klei Aê Diê Blŭ: Klei Mmuñ Hđăp 103:8-13
Êlan kliăng: “Kyuadah msĕ si jih adiê dlông hĭn kơ lăn ala, snăn mơh klei khăp Ñu jing prŏng kơ phung huĭ mpŭ kơ Ñu” (Klei Mmuñ Hđăp 103:11)
Klei êmuh ksiêm mĭn: Ya mta knuih Khua Yang mâo, brei Ñu ăl ngêñ kơ phung ƀai? Si knuih klei khăp Khua Yang bi êdah? Si brei drei dôk hdĭp tơdah thâo Khua Yang jing klei khăp?
Klei Aê Diê Blŭ brei thâo Aê Diê jing Pô khăng ktang: “Kyuadah Yêhôwa Aê Diê ih ti krah diih jing Aê Diê thâo trih; huĭdah Yêhôwa Aê Diê ih srăng čuh ai ngêñ kơ ih, leh anăn Ñu bi rai hĕ ih mơ̆ng rŏng lăn ala.” (Klei Mtô Mñă Klei Bhiăn 6:15; Y-Nahum 1:2-3). Kyua knuih kpă ênô, Khua Yang ăl ngêñ kơ phung amâo gưt asăp leh anăn kơ phung ƀai: “Aê Diê jing khua phat kđi kpă, leh anăn Aê Diê pô mâo klei ăl grăp hruê kơ phung ƀai.” (Klei Mmuñ Hđăp 7:11).
Lu blư̆ drei ăt ngă kơ Khua Yang ăl kyua klei soh drei msĕ mơh. Ƀiădah bi mni lač jăk kơ Khua Yang, Ñu ăt jing Aê Diê klei khăp mơh. Kyua knuih klei khăp yơh Khua Yang amâo djăl ăl ôh, leh anăn “Ñu amâo ƀuah nanao ôh, kăn Ñu djă pioh klei Ñu ăl hlŏng lar rei.” (êlan 9). Kyua klei kpă ênô Khua Yang phat kđi klei soh leh anăn bi kmhal hŏng klei năng. Ƀiădah kyua klei khăp, Ñu pap brei, amâo bi wĭt kơ drei tui si klei soh drei ngă leh ôh, ăt kăn rŭ ênua drei tui si klei ƀai drei rei! Ti kyâo bi kal, klei kpă ênô leh anăn klei khăp Aê Diê, Khua Yang Yêsu ngă ênŭm leh tơdah Ñu lač: “Jih jang bruă ênŭm leh!” (Y-Yôhan 19:30). Kyua klei kpă ênô, Aê Diê bi kmhal klei soh jih jang mnuih. Ƀiădah kyua klei khăp, Ñu dưm leh klei bi kmhal anăn ti dlông Anak Ñu Pô mâo knŏng sa čô, leh anăn hŏng klei anăn yơh, bi êdah klei khăp Khua Yang čiăng bi mtlaih drei. “Kyua klei khăp sĭt suôr Yêhôwa, hmei amâo tuôm tuč ruê̆ ôh, klei Ñu pap amâo tuôm kƀah ôh;” (Klei Čŏk Hia 3:22).
Klei Khua Yang brei drei bi mguôp hŏng Ñu amâo djŏ jing knŏng klei bi mguôp ti krah Pô Hrih mjing hŏng mnơ̆ng Ñu hrih mjing ôh, ƀiădah wăt jing klei bi mguôp ti krah Ama hŏng anak mơh (êlan 13). Khua Yang Yêsu pô yơh tuôm lač leh hŏng H’Mari snei: “Nao bĕ kơ phung ayŏng adei Kâo leh anăn lač kơ diñu, ‘Kâo đĭ nao kơ Ama Kâo leh anăn kơ Ama diih, kơ Aê Diê Kâo leh anăn kơ Aê Diê diih.’” (Y-Yôhan 20:17). Klei kpă ênô leh anăn klei khăp Khua Yang mkra mjuăt drei tơdah drei ngă klei soh, čiăng đru drei dưi jing jăk klă. Jing mnơ̆ng Ñu hrih mjing mơ̆ng ƀruih lăn, brei drei dưm drei pô hlăm kngan Pô Hrih mjing kpă ênô leh anăn klei khăp, čiăng kơ Ñu srăng ƀư̆ mkra drei jing mnơ̆ng ñu hrih mjing mrâo jăk siam êdimi, sa čô mnuih đĭ hriê kơ prŏng grăp hruê ƀrư̆ jing msĕ si Khua Yang Yêsu Krist hĭn. Mta klei brei drei hdơr snei “klei khăp Ñu jing prŏng kơ phung huĭ mpŭ kơ Ñu.” (êlan 11). Klei kpă ênô leh anăn klei khăp Khua Yang tui hlue drei nanao. Ƀiădah lĕ, drei amâo dưi mjhua ôh klei Ñu khăp leh anăn amâo lŏ huĭ mpŭ kơ Ñu. Ktang dôk hdĭp huĭ mpŭ kơ Khua Yang, drei ƀrư̆ thâo kral hĭn êjai klei jăk, klei khăp prŏng prĭn Khua Yang pioh kơ drei.
Si ngă drei dôk hdĭp năng hŏng klei khăp Khua Yang pioh brei kơ drei leh mơ̆?
Wah lač: Ơ Ama kpă ênô leh anăn klei khăp! Bi mni lač jăk kơ Ama kyuadah Ama čiăng ƀư̆ mkra kâo dưi jing msĕ si Anak Ih. Akâo Khua Yang đru kâo dôk hdĭp huĭ mpŭ kơ Khua Yang leh anăn thâo bi khăp hdơ̆ng hmei, čiăng kơ klei jăk prŏng prĭn Ih guôm kâo nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
