Klei Aê Diê Blŭ: I Bruă Mtao 13:4-10
Êlan kliăng: “Amâodah ih amâo uêñ hĕ kơ Aê Diê mdrŏng hŏng klei jăk, klei thâo pap, leh anăn klei gĭr? Ih amâo thâo hĕ klei jăk Aê Diê čiăng atăt ih kơ klei kmhal kơ klei soh?” (Rôm 2:4)
Klei êmuh ksiêm mĭn: Ya Aê Diê ngă leh hŏng klei Mtao Jêrôƀôam bi kdơ̆ng? Klei Mtao Jêrôƀôam kwưh akâo brei thâo ya klei kơ knuih ñu? Ya knuih drei dôk bi êdah hŏng klei Aê Diê mkra mjuăt?
Tơdah Mtao Jêrôƀôam yơr kngan bi kdơ̆ng leh anăn arưp aram kơ khua pô hưn êlâo Aê Diê, snăn kngan mgao leh anăn ngă klei bi kdơ̆ng anăn krô hĕ amâo dưi lŏ hdui wĭt ôh! Mmông anăn mơh knưl ngă yang klưh leh anăn hbâo hŏk kơ tač. Hlăk anăn, hŏng klei huĭ, Y-Jôrôƀôam akâo kơ khua pô hưn êlâo kwưh kơ Aê Diê pap brei leh anăn lŏ bi hlao kngan ñu (êlan 4-6). Snăn yơh, jih jang klei Aê Diê hưn leh hŏng ƀăng êgei khua pô hưn êlâo Ñu jing klei sĭt sơăi, amâo dưi đing ôh.
Tinei, Mtao Jêrôƀôam dôk bi tlă anăp hŏng dua mta klei knap mñai: Klei bi rai ƀuôn ala mtao kyua klei soh kkuh mpŭ kơ rup yang, leh anăn kngan krô. Ƀiădah lĕ, hrô kơ klei bi luă gŭ ñu pô kmhal kơ klei soh mtam, snăn ñu uêñ mĭn knŏng kơ klei bi hlao kngan ñu đuč. Klei anei hưn bi êdah kơ Mtao Jêrôƀôam amâo mâo kmhal sĭt kơ klei soh ôh, ñu knŏng gĭr čiăng tlaih mơ̆ng boh jhat mơ̆ng klei soh đuč. Drei ƀuh klă klei anei hlăm klei tơdah kngan ñu hlao leh, ñu ăt lŏ ngă klei kkuh mpŭ soh msĕ si êlâo mơh (I Bruă Mtao 13:33- 34). Aê Diê ăt brei klei pap kơ Mtao Jêrôƀôam tơdah bi hlao brei kngan ñu, ƀiădah ñu bi luč leh mmông myun dưi mă tŭ klei pap leh anăn klei bi hlao brei kluôm ênŭm mơ̆ng Aê Diê.
Tơdah Aê Diê brei klei knap mñai, klei ruă amâodah klei jhat truh kơ drei, klei Ñu kñăm jing čiăng ƀuah mkra, bi hriăm mjuăt drei, ƀiădah drei khăng mâo klei čiăng tlaih mơ̆ng boh jhat ti anăp hrô kơ klei bi luă gŭ drei pô leh anăn kmhal kơ klei soh ti anăp Aê Diê. Kyua klei anăn yơh mâo lu mnuih leh dưi leh hŏng klei knap mñai diñu lŏ wĭt kơ klei soh êlâo dih.
Ară anei, Mtao Jêrôƀôam kwưh čiăng ngă mah jiăng hŏng khua pô hưn êlâo hŏng klei jak gơ̆ wĭt kơ sang ñu huă ƀơ̆ng, mă mnơ̆ng myơr leh anăn mdei (êlan 7). Ƀiădah khua pô hưn êlâo hlăk ai anei hngah kyuadah mơ̆ng êlâo Aê Diê ghă leh gơ̆ amâo dưi ƀơ̆ng amâodah mnăm hlăm anôk anei ôh, leh anăn klei mtă anei ktang tĭt tơl gơ̆ lač “Tơdah ih brei kơ kâo mkrah sang ih, kâo amâo srăng mŭt mbĭt hŏng ih ôh. Leh anăn kâo amâo srăng ƀơ̆ng kpŭng amâodah mnăm êa ôh hlăm anôk anei” (êlan 8-9). Klei dôk kjăp hŏng Klei Aê Diê Blŭ đru khua pô hưn êlâo anei tlaih mơ̆ng klei bi kmhal. Hdơr bĕ pô roh srăng kdơ̆ng ngă kơ drei hŏng ai ktang “msĕ si êmông gu gruh…” (I Y-Pêtrôs 5:8), ƀiădah tăp năng diñu srăng mplư mơh drei hŏng klei ngă mah jiăng hŏng drei leh anăn brei kơ drei klei tŭ dưn mơ̆ng lăn ala msĕ si “klei kđeh tluh, klei ală tluh, klei mgao hlăm klei hdĭp” (I Y-Yôhan 2:16).
Ti anôk drei jing msĕ si Mtao Jêrôƀôam?
Wah lač: Ơ Khua Yang, kiă kriê bĕ ai tiê leh anăn klei mĭn kâo. Đru kâo thâo kmhal hĕ mtam grăp blư̆ kâo ngă soh hŏng Ih. Đru kâo djăl thâo kral mnêč yang jhat yua čiăng bi kdơ̆ng hŏng kâo. Akâo kơ Ih pap brei, atăt gai leh anăn răng mgang kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 72-73
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
