I Vajntxwv 13:4-10
Nqe cim:
“Lossis yog nej tuam mom Vajtswv txiaj ntsig, qhov uas Vajtswv ua siab dawb siab zoo thiab ua siab ntev rau nej. Nej yeej paub hais tias qhov uas Vajtswv ua siab dawb siab zoo rau nej yog nws xav kom nej tso nej tej kev txhaum tseg.” (Loos 2:4)
Lus nug xav:
– Vajtswv ua li cas rau qhov phem uas Vajntxwv Yelaunpau-as ua?
– Vajntxwv Yelaunpau-as cov lus thov Vajtswv qhia paub vajntxwv lub siab li cas?
– Peb tabtom muaj tus cwjpwm twg thaum Vajtswv rau txim?
Thaum Vajntxwv Yelaunpau-as taw tes nki rau tus cev Vajtswv lus thiab hais kom ntes ces vajntxwv txhais npab cia li qhuav kiag caws tsis tau rov! Tamsim ntawd lub thaj cia vau hlo tawg ntsoog ntxaws ua hmoov tshauv nchuav hauv av. Lub sijhawm ntawd, ua rau vajntxwv ntshai thiab vajntxwv tau thov tus cev Vajtswv lus thov Vajtswv pab thiab kho vajntxwv txhais npab (nqe 4-6). Yog li ntawd, tej uas Vajtswv hais rau Nws tus cevlus yeej muaj tseeb, tsis dag.
Ntawm no, Vajntxwv Yelaunpau-as tabtom ntsib raug ob qho kev puastsuaj: Lub tebchaws puastsuaj vim tej kev txhaum pemlom, thiab txhais npab qhuav. Twb tsimnyog txo hwjchim lees txim tamsim los vajntxwv tsuas txhawj txog qhov kho nws txhais npab xwb. Qhov xwmtxheej no ua tabpov tias Vajntxwv Yelaunpau-as tsis muaj kev lees txim tiag, vajntxwv tsuas ua kom dim qhov nqi zog ntawm txojkev txhaum xwb. Qhov no qhia paub meej thaum vajntxwv txhais npab tau kho zoo, vajntxwv tseem pheej mus pemlom li thaum ntej (I Vajntxwv 13:33-34). Vajtswv txojkev hlub pub dawb tseem muaj pub rau Yelaunpau-as yog kho nws txhais npab zoo, tiamsis vajntxwv poob qhov uas tau hlub thiab los ua neeg zoo txaus ntawm Vajtswv.
Thaum Vajtswv cia tej kev txomnyem, mob nkeeg, lossis tej xwmtxheej los raug peb, lub homphiaj yog Nws xav qhia, kho peb, tiamsis peb pheej xav kom yus tsis raug tej ntawd thiab tsis kam lees kev txhaum tabmeeg tus Tswv li. Nov yog qhov vimchiv uas ntau leej thaum dim tej kev txomnyem los tseem pheej rov mus ua kev txhaum dua.
Zaum no, Vajntxwv Yelaunpau-as tawm lus cog kev phoojywg nrog tus cev Vajtswv lus, caw tus cevlus mus tom tsev so thiab noj mov (nqe 7). Tiamsis tus cevlus tsis kam txais cov lus caw, rau qhov thaum chivthawj Vajtswv twb txwv tsis pub tus cev Vajtswv lus noj haus qhov chaw no, thiab lo lus samhwm no tseemceeb txog qhov uas“Txawm yog koj muab koj tej nyiaj ib nrab faib rau kuv los kuv yuav tsis nrog koj mus lossis nrog koj noj haus ib yam dabtsi hlo li” (nqe 8-9). Qhov kev sawv ruaj khov rau Vajtswv Txojlus ua rau tus cevlus tsis raug txim. Peb yuav tau nco ntsoov tias yeebncuab tawmtsam peb los ntawm lub zog “zoo li tus tsov ntxhuav ncig mus ncig los…” (I Petus 5:8), tiamsis peb kuj yuav raug ntxias los ntawm qhov ua phoojywg thiab muab tej meejmom hauv ntiajteb ntxias xws li “tej uas neeg lub siab ntshaw, tej uas neeg lub qhovmuag pom thiab xav yuav, thiab txhua yam hauv ntiajteb uas neeg qhuas hais tias yog yam uas tseemceeb” (I Yauhas 2:16).
Thov Vajtswv,
Vajtswv, thov Koj tswj tuav nyuam yaus lub siab, kev xav. Thov Koj ua kom nyuam yuas muaj lub siab txawj lees txim thaum ua txhaum. Thov Koj qhia nyuam yaus paub tej tswvyim uas dab ntxwgnyoog ntxias. Thov Koj hlub, coj qhia thiab tiv thaiv. Nyuam yaus tuav Tswv Yexus lub npe thov, Amees.
Peb zoo li Vajntxwv Yelaunpau-as qhov twg?
Nyeem Vajluskub hauv peb lub xyoo: Phau Ntawv Nkauj 72-73
Kênh Youtube BHKTHN:
