Klei Aê Diê Blŭ: I Y-Timôthê 2:2-4
Êlan kliăng: “Tơdah phung ƀuôn sang Kâo arăng pia hŏng anăn Kâo bi luă gŭ diñu pô, wah lač leh anăn duah ƀô̆ mta Kâo, leh anăn lui êlan soh diñu, hlăk anăn Kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu.” (II Klei Yăl Dliê 7:14)
Klei êmuh ksiêm mĭn: Khua ƀĭng kna Y-Pôl mtă kơ Y-Timôthê wah lač brei kơ hlei pô? Ya ngă brei wah lač brei kơ diñu? Si klei drei wah lač brei kơ phung khua kiă kriê?
Khua ƀĭng kna Y-Pôl hưn mdah mâo dua phung yuôm brei Phung Sang Aê Diê wah lač brei, anăn jing “phung mtao, leh anăn jih jang phung khua kiă kriê” (êlan 2). Phŭn knhal brei wah lač brei kơ phung khua kiă kriê lăn čar kyuadah jih jang klei dưi kbiă hriê mơ̆ng Aê Diê pô mkŏ mdơ̆ng (Rôm 13:1). Drei mâo bruă klam ti anăp Khua Yang wah lač brei kơ phung mtao leh anăn kơ jih jang phung khua kiă kriê thâo kral Khua Yang leh anăn dưi mâo klei bi mtlaih. Tơdah diñu thâo kral Khua Yang, đăo kơ Khua Yang snăn diñu srăng kiă kriê lăn čar hlăm klei sĭt nik. Leh anăn mơ̆ng klei anăn drei srăng “dưi dôk hdĭp êđăp ênang leh anăn amâo mâo klei rŭng răng ôh, tui si klei đăo kơ Aê Diê leh anăn tui si klei arăng mpŭ” (êlan 2).
Lŏ mâo sa phŭn knhal mkăn mơh, khua ƀĭng kna Y-Pôl mtă kơ khua pô mtô hlăk ai Y-Timôthê leh anăn kơ jih jang Phung Sang Aê Diê brei êlâo hĭn wah lač brei kơ phung khua kiă kriê lăn čar kyua “klei anăn jăk leh anăn bi mơak kơ Aê Diê” (êlan 3). Lu mnuih ka thâo kral Khua Yang dôk bi kdơ̆ng hŏng ênông ktrŏ klei soh, hŏng klei jing hlăm ala ƀuôn, diñu dôk tui duah klei mblang kơ klei hdĭp hlăm klei luč čang hmăng. Kyuanăn jing klei jăk êdimi tơdah phung ƀuôn sang Aê Diê dôk hdĭp bi guh kơang kơ Anăn Aê Diê ti anăp jih jang mnuih, leh anăn hŏng jih ai tiê wah lač brei kơ phung khua kiă kriê lăn čar.
Êngao kơ anăn, khua ƀĭng kna Y-Pêtrôs brei thâo, Khua Yang čiăng kơ jih jang mnuih thâo săng klei sĭt nik, kmhal kơ klei soh leh anăn mă tŭ klei bi mtlaih, “Khua Yang amâo bi tai ôh bi sĭt klei Ñu ƀuăn tui si đa đa mĭn, ƀiădah Ñu gĭr hŏng diih, amâo čiăng ôh sa čô srăng rai luč, ƀiădah čiăng kơ jih jang srăng truh kơ klei kmhal kơ klei soh.” (II Y-Pêtrôs 3:9). Kyuanăn drei wah lač brei kơ phung khua kiă kriê čiăng kơ diñu ruah tui hlue êlan klei hdĭp msĕ si klei Khua Yang Yêsu mtô: “Mŭt bĕ ti ƀăng jang kniă; kyuadah ƀăng jang ƀai leh anăn êlan prŏng atăt ba kơ klei rai luč, leh anăn phung mŭt tinăn jing lu. Bi ƀăng jang điêt leh anăn êlan kniă atăt ba kơ klei hdĭp, leh anăn jing ƀiă phung thâo bĭt ƀăng jang leh anăn êlan anăn.” (Y-Mathiơ 7:13-14).
Lăn čar dôk čiăng kơ drei mâo klei khăp leh anăn “kwưh, akâo, wah lač brei kơ arăng leh anăn bi mni kơ Aê Diê” brei kơ phung khua kiă kriê. Anăn jing bruă klam jao brei kơ jih jang Pô đăo kơ Krist. Klei Aê Diê blŭ hŏng mtao Y-Salômôn mphŭn dô, ăt jing klei mñă kơ phung drei hruê anei msĕ mơh: “Tơdah phung ƀuôn sang Kâo arăng pia hŏng anăn Kâo bi luă gŭ diñu pô, wah lač leh anăn duah ƀô̆ mta Kâo, leh anăn lui êlan soh diñu, hlăk anăn Kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu.” (II Klei Yăl Dliê 7:14). Grăp čô drei bi luă gŭ pô, wah lač leh anăn kwưh akâo Khua Yang pap brei klei soh, čiăng kơ lăn čar drei mâo lu mnuih dưi mâo klei bi mtlaih.
Si ngă drei hŏng jih ai tiê kwưh akâo kơ Khua Yang pap brei kơ phung khua kiă kriê lăn čar drei mơ̆?
Wah lač: Ơ Khua Yang, akâo Khua Yang pap brei kơ klei kâo amâo mđing uêñ leh anăn amâo hŏng jih ai tiê wah lač brei kơ jih jang mnuih leh anăn kơ phung khua kiă kriê. Akâo Khua Yang mñă brei kâo hdơr nanao kơ phung khua kiă kriê lăn čar leh anăn jih ai tiê wah lač brei kơ diñu. Akâo Khua Yang pap brei kơ lăn čar kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 64-65
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
