1 Timautes 2:2-4
Nqe cim:
“Yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua” (2 Xwmtxheej Vajntxwv 7:14)
Lus nug rau sawvdaws xav:
– Timthawj Paulus ntuas Timautes yuav tsum tau thov Vajtswv pab rau cov neeg twg?
– Vim li cas yuav tsum thov Vajtswv rau lawv?
– Peb thov Vajtswv pab rau cov nomtswv tswj lub tebchaws li cas?
Timthawj Pualus hais txog ob hom neeg uas pawg ntseeg yuav tau thov Vajtswv rau, ntawd yog “cov vajntxwv thiab cov nomtswv” (nqe 2). Qhov vimchiv uas yuav tau thov Vajtswv rau cov thawj tswj lub tebchaws vim txhua tus vajntxwv, nomtswv puavleej yog Vajtswv tsa los (Loos 13:1). Peb muaj feem xyuam tabmeeg rau Vajtswv los thov Vajtswv rau cov vajntxwv thiab cov nomtswv kom paub Vajtswv thiab tau txais kev cawmdim. Yog thaum lawv paub Vajtswv, ntseeg Nws lawv yuav tswj lub tebchaws raws li qhov tseeb. Yog ua tau li ntawd peb “yuav tau nyob kaj siab lug ua Vajtswv tes haujlwm thiab tau zoo ua peb lub neej kom phim qhov uas peb yog cov ntseeg” (nqe 2).
Ib qhov vimchiv ntxiv timthawj Paulus nqua hu xibhwb Timautes thiab pawg ntseeg yuav tau thov Vajtswv ua ntej rau cov thawj tswj kav lub tebchaws vim “Qhov no yog qhov zoo thiab haum Vajtswv tus uas yog peb tus Cawmseej lub siab” (nqe 3). Coob tug tsis tau paub Vajtswv tabtom tawmtsam tej kev txhaum uas yus ris rawv, sib tw nrog lub tebchaws thiab nrhiav txoj kev ua neej uas tsis muaj chaw cia siab. Vim li ntawd, yuav yog qhov zoo heev yog thaum Vajtswv cov menyuam ua neej ua rau Vajtswv lub npe raug qhuas tabmeeg ntawm sawvdaws thiab thov Vajtswv kawg siab ntsws rau cov nomtswv tswj teb tuav chaw.
Dhau li ntawd, timthawj Petus kuj qhia paub Vajtswv xav kom txhua tus paub qhov tseeb, tso kev txhaum tseg thiab txais yuav kev cawmdim, “Muaj qee leej xav hais tias, Vajtswv tseem yuav tos ntev Vajtswv mam li ua raws li Vajtswv tau coglus tseg lawm, tiamsis yeej tsis yog li lawv xav. Vajtswv ua siab ntev rau nej, rau qhov nws tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg” (2 Petus 3:9). Yog li ntawd peb cheem tsum thov Vajtswv pab rau cov uas tsis tau paub Vajtswv thiab cov nomtswv kom lawv xaiv txoj kev ciaj sia li Tswv Yexus qhia “Nej yuav tsum mus lub qhovrooj nqaim, rau qhov lub qhovrooj loj thiab txojkev dav coj mus rau ntujtawg thiab muaj coob leej taug txojkev ntawd, tiamsis lub qhovrooj nqaim thiab txojkev me uas mus nyuaj yuav coj mus tau txojsia, cov neeg uas taug txojkev ntawd tsis muaj coob leej.” (Mathais 7:13-14).
Lub tebchaws cheem tsum peb muaj siab hlub thiab “siv zog thov, taij thov, thov pab lwm tus, thiab ua Vajtswv tsaug” rau cov nomtswv. Ntawd yog feem xyuam ntawm txhua tus ntseeg. Vajtswv Txojlus hais rau vajntxwv Xalumoos hnub thaud li cas kuj hais rau peb niaj hnub nim no ib yam li ntawd: “Yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua” (2 Xwmtxheej Vajntxwv 7:14). Peb txhua tus cia li txo hwjchim, siv zog thov thiab taij thov Vajtswv kev zam txim kom peb lub tebchaws muaj ntau tus tau txais kev cawmdim.
Thov Vajtswv,
Vajtswv thov zam txim rau nyuam yaus vim tsis tau tas siab thov Vajtswv Koj pab rau tibneg txhua tus thiab cov nomtswv. Thov pab nyuam yaus nco ntsoov thov Vajtswv kawg siab ntsws rau lawv. Nyuam yaus tuav Tswv Yexus Khetos lub npe thov, Amees.
Peb puas tau thov Vajtswv kawg siab ntsws kom Nws hlub tshua peb cov nomtswv uas tabtom tswj kav peb lub tebchaws?
Nyeem Vajluskub hauv peb lub xyoos: Ntawv Nkauj 64-65
Kênh Youtube BHKTHN:
