Phau Ntawv Nkauj 33:6-12
Nqe cim:
“Haivneeg uas muaj Vajtswv ua lawv tus TSWV muaj kev kaj siab,cov neeg uas nws xaiv ua nws tug lawm,lawv tau zoo nyob kaj siab lug!” (Phau Ntawv Nkauj 33:12)
Lus nug rau sawvdaws xav:
– Tus sau qhia paub Vajtswv muaj hwjchim li cas rau tej Nws tsim?
– Lub tswvyim uas cia kom tau Vajtswv foom koob hmoov yog dabtsi?
– Peb thov Vajtswv yam dabtsi rau yus lub tebchaws?
Tus sau Phau Ntawv Nkauj qhia paub hais tias tagnrho lub qab ntuj khwb thiab tej hnub qub Nws tsim los ntawm “Nws hais kom muaj ces txawm cia li muaj tuaj” (nqe 6). Nov yog qhov hais raws li kabke paj huam hais txog Vajtswv lub hwjchim tsim txhua yam. Tseeb tiag Vajtswv tsim lub ntuj thiab lub ntiajteb no tsuas yog los ntawm Nws lo lus hais xwb (Chivkeeb 1). “Vajtswv kom nws tsim ib puas tsav yam huv tibsi; ib puas tsav yam ntawd tsis muaj ib yam uas tsis yog nws tsim li” (Yauhas 1:3). Vim li ntawd, Vajtswv muaj hwjchim tswj tagnrho rau lub qab ntuj no thiab tej uas Nws tsim.
Txuas ntxiv, tus sau hais meej hais tias Vajtswv yog tus sau dej hiavtxwv los
nyob ua ke thiab cais dej hiavtxwv tob nyob muaj chaw (nqe 7). Qhov no hais meej txog Vajtswv lub hwjchim tswj rawv txhua yam hauv lub ntiajteb no thiab muaj hwjchim ceev txhua txoj kev ua haujlwm ntawm lub ntiajteb no muaj quas thiab nyob ruaj khov (nqe 9). Vajtswv tswj txhua yam mus raws li Nws lub siab nyiam (Phau Ntawv Nkauj 147:15-18).
Sawv tabmeeg ntawm Vajtswv lub hwjchim uas loj kawg nkaus, tus sau nqua hu tagnrho tibneeg ntiajteb cia li “paub ntshai tus TSWV!” thiab “hwm nws!” (nqe 8). Hais rau lwm seem, tibneeg cheem tsum zeem paub Vajtswv tus uas muaj hwjchim loj kawg nkaus thiab ua raws Nws siab nyiam. Vajtswv muaj hwjchim samhwm rau txhua yam ua raws Nws siab nyiam (nqe 9). Vajtswv kuj muaj hwjchim rhuav tej kev npaj tseg ntawm txhua lub tebchaws thiab ua rau txhua haivneeg tso lawv tej kev npaj siab povtseg (nqe 10). Qhov no qhia tshwm Vajtswv lub hwjchim loj tshaj saum tibneeg tej kev npaj tseg, thiab Nws muaj cai ua raws li Nws lub hom phiaj, txawm yog hais tias qhov ntawd txawv tibneeg tej kev npaj tseg los xij. Nws muaj cai teem thiab tib txhua yam mus raws Nws siab nyiam txawm tibneeg txawj ntse twb npaj tseg lawd li cas los xij (Pajlug 16:9). Vajtswv kev npaj tseg nyob mus ibtxhis tej uas nws xav cia hauv lub siab yuav nyob mus rau txhua tiam neeg (nqe 11). Vajtswv tej kev xav tsis hloov pauv ib zaug li. Nws ibtxwm ncaj ncees, yog li ntawd, cia li caw Nws los kav peb lub neej.
Tus sau qhia tawm tej lus muaj tseeb thiab kuj yog lub tswvyim uas cia kom lub tebchaws tau koob hmoov ntawd yog lub tebchaws uas muaj Vajtswv ua lawv tus TSWV thiab tau Nws xaiv los ua Nws tug (nqe 12). Tseeb tiag, lub tebchaws twg txais yuav Vajtswv ua tus Tswv thiab ua raws Nws lub homphiaj tau koob hmoov heev! Raws li lub ntsiab nqaim, lub tebchaws uas hais ntawm no yog cov Yixayees, haivneeg uas tau Vajtswv xaiv. Tiamsis raws li lub ntsiab uas dav dua, yog tagnrho txhua tus uas tau Vajtswv xaiv thiab suav tias yog Nws tug, kuj yuav tau txais koob hmoov thiab.
Feem xyuam ntawm txhua tus ntseeg yog yuav tsum thov Vajtswv rau yus lub tebchaws tau koob hmoov. Thov Vajtswv pab rau cov nomtswv ntawm peb lub tebchaws kom paub Vajtswv thiab txais yuav Nws ua tus Tswv kom lub tebchaws tau koob hmoov. Peb txhua tus yuav tsum tau tshaj tawm Vajtswv lub hwjchim tswj txhua yam thiab rau siab thov Vajtswv rau yus lub tebchaws.
Thov Vajtswv,
Vajtswv, nyuam yaus hwm Koj Tus uas muaj hwjchim loj kawg nkaus. Thov ntuas nyuam yaus nco ntsoov thov Koj pab nyuam yaus lub tebchaws. Thiab Vajtswv thov Koj foom koob hmoov rau nyuam yaus lub tebchaws. Nyuam yaus tuav Tswv Yexus Khetos lub npe thov, Amees.
Peb puas tseg sijhawm los thov Vajytswv pab yus lub tebchaws?
Nyeem Vajluskub hauv peb lub xyoos: 2 Xwmtxheej Vajntxwv 36
Kênh Youtube BHKTHN:
