Klei Aê Diê Blŭ: Klei Mphŭn Dơ̆ng 1:14-19
Êlan kliăng: “Aê Diê mjing dua boh mngač prŏng, boh mngač prŏng hĭn kiă êjai hruê, boh mngač điêt hĭn kiă êjai mlam. Ñu mjing wăt phung mtŭ mơh”(Klei Mphŭn Dơ̆ng 1:16)
Klei êmuh ksiêm mĭn: Ya boh mngač Aê Diê hrih mjing leh? Ya klei kñăm kơ klei hrih mjing boh mngač? Si klei mđĭ ai drei tơdah ksiêm mĭn kơ klei hrih mjing lu boh mngač?
Klei Aê Diê Blŭ čih kơ hruê tal pă hlăm klei hrih mjing, Aê Diê hrih mjing lu boh mngač, mâo yang hruê, mlan leh anăn phung mtŭ (êlan 16). Hlăm ênuk đưm, dŭm djuê ana riêng gah Israel dlăng dŭm boh mngač anei jing phung yang. Ƀiădah Klei Aê Diê Blŭ bi mklă Aê Diê yơh jing Pô hrih mjing leh dŭm boh mngač anăn čiăng kơ diñu ngă bruă klam Aê Diê kčah leh.
Aê Diê hrih mjing dŭm boh mngač anei hŏng klei kñăm “čiăng bi kah hruê hŏng mlam; brei diñu jing mnơ̆ng yua bi êdah klei bi knăl, yan, hruê, leh anăn thŭn. Wăt brei diñu jing lu boh mngač hlăm anôk êhŏng ti adiê čiăng mtrang lăn ala.” Snăn klei anăn jing mtam” (êlan 14-15). Kyua boh mngač, lăn ala drei mâo hruê mlam, sa hruê 24 mmông leh anăn sa thŭn hlăm brô 365 hruê. Anôk mtrang mngač mơ̆ng yang hruê, mlan leh anăn phung mtŭ đru kơ anak mnuih thâo kơ êlan, bi mklă hruê mmông, leh anăn wăt klei yuôm bhăn tơdah yan adiê bi mlih. Sa boh mtŭ prŏng atăt leh êlan kơ phung knhâo mơ̆ng čar ngŏ nao kkuh mpŭ kơ Khua Yang Yêsu Pô bi mtlaih mrâo kkiêng (dlăng Y-Mathiơ 2:1-12).
Bruă Aê Diê hrih mjing boh mngač amâo djŏ knŏng bi êdah klei myang hrih mjing ôh ƀiădah lŏ jing klei Ñu mprăp brei kơ lăn ala anei. Kyua boh mngač anăn, êngĭt adiê tui hlue sa hdră jăk, mkŏ mjing klei bhiăn yan adiê, yan boh mnga, ba djăp mta klei čiăng êdi kơ klei hdĭp jih jang mnơ̆ng Ñu hrih mjing.
Dlăng kơ boh mngač, ya klei drei ƀuh? Hlăk êlâo sui leh, Y-Môis mtă kơ mnuih ƀuôn sang Aê Diê răng: “Răng bĕ diih, huĭdah diih angưi ală phă adiê leh anăn tơdah diih ƀuh yang hruê, mlan, leh anăn mtŭ, jih jang phung kahan hlăm adiê, diih mâo klei mtrŭt leh anăn kkuh mpŭ kơ dŏ anăn leh anăn mă bruă kơ diñu, mnơ̆ng anăn Yêhôwa Aê Diê diih brei leh kơ jih jang phung ƀuôn sang dôk ti gŭ jih adiê” (Klei Mtô Mñă Klei Bhiăn 4:19). Hrô kơ brei ai tiê huĭ mpŭ kơ Aê Diê, anak mnuih găn djăp ênŭk dlăng leh dŭm boh mngač anăn msĕ si yang leh anăn kkuh mpŭ. Jing phung ƀuôn sang Aê Diê, brei drei lŏ čuê ngă bruă jao mtrang mngač klei sĭt nik mơ̆ng Aê Diê, đru kơ grăp čô mnuih thâo kơ Aê Diê jing Pô Hrih Mjing, hrih mjing leh dŭm boh mngač, leh anăn knŏng hjăn Ñu yơh jing Pô brei anak mnuih kkuh mpŭ.
Dlăng kơ dŭm boh mngač hlăm adiê si ngă drei bi kngăr mơ̆ leh anăn jih ai tiê kkuh mpŭ kơ Aê Diê Pô Prŏng hĭn mơ̆ amâodah hơăi?
Wah lač: Ơ Aê Diê jing Pô hrih mjing leh yang hruê, mlan leh anăn phung mtŭ, kâo bi mni kơ Ih kyua klei myang hrih mjing leh anăn klei Ih mkăp yuôm bhăn kơ dlông rŏng lăn anei leh anăn wăt kơ klei hdĭp kâo. Ih jing Pô djă hlăm kngan hruê mlan leh anăn wưng ênuk. Akâo kơ Ih đru kâo đăo knang kluôm dhuôm kơ Ih, leh anăn dôk guôn klei jăk hĭn Ih srăng ngă hlăm wưng jăk hĭn mơ̆ng Ih. Ƀuăn jih klei hdĭp kâo srăng mtrang klei guh kơang Ih msĕ si boh mngač hlăm adiê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
