Chivkeeb 1:14-19
Nqe cim:
“Yog li ntawd, Vajtswv thiaj tsim dua ob lub ci ci uas loj heev. Lub uas ci tshaj cia kav nruab hnub thiab lub ci tsis heev cia kav hmo ntuj; nws tsim tej hnubqub huv tibsi” (Chivkeeb 1:16)
Lus nug rau sawvdaws xav:
– Vajtswv tsim tej yam ci saum nruab ntug twg?
– Tej yam ci saum nruab ntug ntawd tau tsim los ua dabtsi?
– Peb txais tau kev txhawb zog li cas thaum xav txog Vajtswv kev tsim tej yam ci saum nruab ntug?
Vajluskub qhia hais tias nyob rau hnub plaub ntawm tes haujlwm tsim txhua yam, Vajtswv tau tsim tej yam ci ci saum nruab ntug, uas yog lub hnub, lub hli thiab tej lub hnub qub (nqe 16). Thaum ub, tej haiv neeg nyob ib ncig Yixalayees puavleej saib tej yam nyob saum nruab ntug no ua lawv tus vajtswv. Tiamsis Vajlugkub qhia meej hais tias Vajtswv yog tus tsim tej ntawd los ua tej haujlwm uas Nws tau npaj tseg lawm xwb.
Vajtswv tsim tej yam ci saum nruab ntug no muaj lub hom phiaj “quas nruab hnub thiab hmo ntuj, thiab quas caij nyoog, hnub, hli thiab xyoo; tej ntawd yuav ci saum ntuj tuaj rau hauv ntiajteb no kom pom kev” (nqe 14-15). Vim muaj tej yam ci saum nruab ntug no, peb lub ntiajteb thiaj muaj nruab hnub thiab hmo ntuj, muaj ib hnub 24 teev thiab ib xyoos kwv yees li 365 hnub. Qhov chaw ci ntawm lub hnub, lub hli thiab tej hnub qub pab kom tibneeg paub nrhiav kev, txheeb lub sijhawm, thiab paub txog tej xwm txheej tshwjxeeb thaum caij nyoog pauv hloov mus. Ib lub hnub qub loj twb tau ci qhia kev rau cov tub txawj ntse nyob sab hnub tuaj tuaj pehawm tus Cawmseej Tswv Yexus uas nyuam qhuav los yug (saib Mathais 2:1-12).
Vajtswv txoj haujlwm tsim tej yam ci saum nruab ntug tsis yog tsuas qhia Nws lub hwjchim loj kawg nkaus xwb, tiamsis tseem qhia txog Nws txojkev npaj txhij txhua rau lub ntiajteb no thiab. Vim muaj tej yam ci saum nruab ntug ntawd, lub ntuj lub teb thiaj khiav raws ib txojcai tswj uas zoo kawg nkaus, tsim muaj txojcai rau tej huab cua, caij nyoog cog qoob loo, thiab pub txhua yam cheemtsum rau tej uas Vajtswv tsim los.
Thaum tsa muag saib tej yam ci saum nruab ntug, peb pom dabtsi? Thaum ub, Mauxes twb ceebtoom Vajtswv haiv neeg hais tias: “Nej tsis txhob teev lossis pe tej uas nej pom nyob saum nruab ntug, tsis hais lub hnub lossis lub hli thiab tej hnubqub. Tus TSWV uas yog nej tus Vajtswv cia lwm haivneeg pe tej ntawd” (II Kevcai 4:19). Tibneeg txij puag thaum ub los txog niaj hnub nimno tau saib tej yam ci ci ntawd ua tej vajtswv thiab mus hawm hloov tus Tswv uas yog tus Tsim txhua yam. Yog Vajtswv haiv neeg, peb yuav tsum txuas ntxiv txoj haujlwm coj Vajtswv txojkev tseeb los rau ntiajteb, pab kom sawvdaws paub tias Vajtswv yog tus Tsim txhua yam ci saum nruab ntug, thiab tsuas yog Nws tib leeg xwb thiaj yog uas tibneeg yuav tsum hwm thiab pehawm.
Thov Vajtswv,
Tus Vajtswv uas tsim lub hnub, lub hli thiab tej hnub qub, nyuam yaus qhuas Koj vim Koj lub hwjchim tsim thiab pub txhua yam zoo kawg nkaus rau lub ntiajteb no thiab rau nyuam yaus lub neej. Koj yog tus uas tuav hnub hli thiab txhua lub sijhawm hauv Koj txhais tes. Thov pab kom nyuam yaus cia siab rau Koj, thiab tos tej yam zoo uas Koj yuav ua raws li lub sijhawm Koj teem tseg. Thov kom nyuam yaus lub neej niaj hnub qhia tshwm Koj lub hwjchim ci ntsa iab zoo li tej hnub qub saum nruab ntug. Nyuam yaus tuav Yexus Khetos lub npe thov, Amees.
Thaum ntsia tej yam ci saum ntuj, puas ua rau peb xav tsis thoob thiab txiav txim siab yuav hwm thiab pehawm tus Vajtswv uas loj kawg nkaus?
Nyeem Vajluskub hauv peb lub xyoos: II Xwmtxheej 25
Kênh Youtube BHKTHN:
