Yauj 1:1-5
Nqe cim:
“Nws niaj zaus ua kevcai daws kev txhaum li ntawd rau nws cov menyuam, rau qhov nws ntshai nyob tsam nws cov menyuam ua txhaum rau Vajtswv” (Yauj 1:5b)
Lus nug rau sawvdaws xav:
– Yauj tsev neeg ibtxwm muaj txoj kev coj zoo twg?
– Txoj kev tswj sab ntsujplig twg pab tau Yauj tswj tau nws tsev neeg hwm Vajtswv?
– Peb tsim muaj kev thov Vajtswv pab tsev neeg zoo li cas?
Yauj yog ib tug neeg hauv peb tug neeg uas tau Vajluskub qub suav hais tias ncaj ncees (Exekees 14:14). Nws muaj feexyuam heev rau tsevneeg ntawm kaum tus menyuam. Tsis yog ua neej hwm Vajtswv xwb, nws tseem pub rau tsevneeg txhua tus muaj txaus kev cheemtsum ntawm sab nqaij tawv thiab saib xyuas txhij txhua cov menyuam txhua tus lub neej sab ntsujplig.
Kom txhim tsa lub neej sab ntsuj plig loj hlob, Yauj qhia nws tsev neeg muab khoom hlawv fij rau Vajtswv, yog ib qhov kev pehawm, txhawb nqa thiab thov Vajtswv zam kev txhaum. Tes haujlwm fijkhoom pheej mus ua ked nrog tej lus thov Vajtswv (Exalas 6:10; Lukas 1:10). Yauj tau ua qauv zoo txog kev thov Vajtswv, kev pehawm hauv tsev neeg rau cov menyuam thiab rau peb niaj hnub no. Nyob hauv Vajluskub qub, muaj ntau tus niam txiv kuj tau ua qauv txog kev thov Vajtswv rau lawv tsev neeg. Xws li Anplahas thov Vajtswv rau nws tus tub Yisamayees thiab rau nws tus xeeb ntxwv Lauj (Chivkeeb 18:24-32). Thiab Mauxes quaj thov Vajtswv zam txim thiab kho nws tus muam (Teev Npe 12:13). Hauv Vajluskub tshiab, ntau tus niam txiv kuj thov kom Tswv Yexus kho lawv cov menyuam thiab ntiab dab tawm.
Yauj yeej ibtxwm faj ntsoov ntshai tsam cov menyuam ua txhaum thiab tso Vajtswv tseg, yog li ntawd nws thiaj tswj rawv txoj kev thov Vajtswv rau nws tsevneeg (nqe 5). Nws xaiv lub sijhawm thaum “noj haus tas” ua tib zoo npaj thaum sawv ntxov los muab tsiaj tua hlawv fij ua kevcai daws nws cov menyuam tej kev txhaum, lub sijhawm los thov Vajtswv rau tsevneeg yuav tsum ua tib zoo thov thiab thov Vajtswv tsis tseg tsis tu.
Vajluskub tshiab qhia hais tias cov txiv thiab cov pojniam, cov niam txiv thiab cov menyuam ib leeg yuav tsum muaj feem xyuam rau ib leeg (Kaulauxais 3:18-21) kom tuav txoj kev zoo siab thiab muab siab rau ntseeg Vajtswv. Kev thov Vajtswv ua ke hauv tsevneeg, lossis kev pehawm Vajtswv hauv tsevneeg, yog ib txoj kev tswj sab ntsujplig kom tsevneeg thiab Pawg Ntseeg ceev tau kev ntseeg. Kev muaj nqis ntawm lub sijhawm uas tsevneeg thov Vajtswv tsis yog tsuas pab peb txhim kho lub neej sab ntsujplig muaj zog, khiav deb kev txhaum, kev dag ntxias thiab tej kev phem ntawm ntiajteb no xwb tiamsis tseem pab txhua tus los muaj lub sijhawm sib raug zoo, nyob ua ke sib hlub. Yauj cov menyuam ua neej sib raug zoo twb yog los ntawm tsevneeg muaj kev pehawm Vajtswv txhua hnub thiab los ntawm leej txiv tej lus thov Vajtswv pab. Niaj hnub nimno peb muaj Vajluskub yog Vajtswv Txojlus qhia peb thiab Vajtswv pub tshwjxeeb rau peb tau txuas lus nrog Nws. Leej txiv feem xyuam rau tsev neeg thaum pib muaj cuabyig, yuav tsum rhawv tsim muaj kev thov Vajtswv hauv tsev neeg thiab tswj rawv txoj kev thov Vajtswv ntawd mus li. Thiab xyaum Yauj tus qauv thov Vajtswv “ua li no tsis tu ncua li”! (HMOWSV)
Thov Vajtswv,
Vajtswv! Thov Koj hlub, tu thiab qhia nyuam yaus tsevneeg paub ua neej sib hlub rau Koj. Thov pab nyuam yaus tswj tau txoj kev thov Vajtswv tsis tu ncua kom ceev tau txoj kev zoo siab ntawm tsev neeg thiab txhim kho tau tsevneeg kev ntseeg paub hwm paub ntshai Koj. Nyuam yaus tuav Tswv Yexus Khetos lub npe thov. Amees.
Peb puas tau rhawv tsim muaj lub sijhawm rau tsevneeg thov Vajtswv lawm los tsis tau? Yog muaj lawm peb ncaj ncees ceev tau mus li cas hauv lub neej uas muaj kev tabkaum ntau ntau rau lub neej tamsim no?
Nyeem Vajluskub hauv peb lub xyoos: 2 Xwmtxheej Vajntxwv 4
Kênh Youtube BHKTHN:
