Tơdrong Pơđơ̆k 24:26
“Bơngai bu drơ̆ng lăp kiăp trŏ noh thoi chŭm ‘bơ̆t ‘bơ̆r.” (Tơdrong Pơđơ̆k 24:26).
Nơ̆r jet tơchĕng pơwao:
– Nơ̆r “Lăp trŏ” wă khan kiơ?
– Yua kơ kiơ bơngai chih Hla bơar pơtih kơ nơ̆r lăp trŏ hăm pơm tơ’bôh thoi chŭm ‘bơ̆t ‘bơ̆r?
– Bơngai lui athei pơm tơ’bôh thoi yơ?
Nơ̆r pơma lăp trŏ bơngai chih Hla bơar đei pơtih “chŭm ‘bơ̆t ‘bơ̆r” chŭm noh pơm tơ’bôh tơdrong ‘mêm lăm tơduă ‘bar ‘nu bơngai. Kiơ̆ kơ tơdrong juăt rim teh đak, đei chŭm pơm tơ’bôh phara. Lơ bơngai lăm teh đak đei tơdrong juăt ‘bơm băl tơ’bŏk. Lăm tơdrong juăt bơngai Viêt Nam bơ̆n, wă tơ’bôh tơdrong ‘mêm mơnat lăm bơngai ‘lŏ păng hơ’lơ̆p lăm hnam dơnŏ dah ‘nguaih kơ hnam dơnŏ, đe ngăl juăt kơ chŭm tơ’bŏk. Malei wă tơ’bôh tơdrong ‘mêm hưch wă bre drŏnglo păng drŏkăn, đe ngăl juăt kơ chŭm ‘bơ̆t ‘bơ̆r. chŭm ‘bơ̆r wă tơ’bôh tơdrong tơ’bưh băl lăm tơdrong ‘mêm hưch wă păng pơgơ̆p kơjăp bre ‘bar ‘nu bơngai drŏnglo, drŏkăn. Bơngai chih Hla bơar pơtih chŭm ‘bơ̆t ‘bơ̆r wă kơ gơh pơting hăm chŭm ‘bơ̆t tơ’bŏk, yua kơ chŭm ‘bơ̆t tơ’bŏk wă khan nhen thoi nơ̆r kơkuh păng chŭm ‘bơ̆t ‘bơ̆r noh wă khan ‘mêm hưch wă, tơguăt băl.
Lăm tơdrong tơ’bưh chă jang păng mơdro sa, lơ bơngai chu hŭt lê̆ tơdrong tơpăt wă kơ huay pơm kơ buăl bơ̆n ưh kơ hiôk dah mă wă chă đei lơi kơ bơ̆n. Mălei nơ̆r Kră Yang bơtho khan bơngai mă tơl tơpăt, tơpă noh buăl juăt tơpă. Đơ̆ng nơ̆r lăm Tơdrong pơđơ̆k ‘nâu, Pơtao Sôlômôn bơtho kơ kon sâu tơ’bôh jơhngơ̆m tơpăt hăm bơngai nai đơ̆ng nơ̆r bơ̆n pơma tơl tơpăt, ưh kơ đei hơlĕnh pơdăr pơm kơ đe hơwơ̆l na đei yua ăn kơ bơ̆n.
‘Bok Pôl pơma hơđăl Kră Yang wă kơ bơngai lui athei “Yua kơ thoi noh na bơ̆n athei pơma tơpăt ngăl ling lang, athei đei đon băt ‘mêm mơnat kơ bôl buăl, na rai đunh rai wơ̆ lăm tôm tơdrong, wă kơ bơ̆n jing pôm đon hăm Yêsu Krist. Yêsu Krist Sư pơm tơm kơ bơ̆n thoi lĕ kơ kơ̆l;” (Êphêsô 4:15). Bơ̆n athei arih tơpăt yua kơ ‘Bă bơ̆n kơpal plĕnh bơih Yang tơpăt. Kon Kră Yang athei yak năm lăm tơdrong hli yom kơ Kră Yang ưh kơ sĭ chă trong tơchĕng hăm nơ̆r pơma gơh hơlĕnh pơkuĕch kơ đe nai wă kơ kĕ jei. Chŭm noh tơ’bôh tơdra đơ̆ng tơdrong ‘mêm, mă khan tơdrong juăt bơngai Viêt Nam, bơ̆n ưh kơ gơh yua chŭm wă kơkuh băl, mălei tơdrong ‘mêm mă ưh kơ juăt noh hơlĕnh ưh kơ tơpă; na nơ̆r pơma tơpă mă ưh kơ ‘mêm noh ưh kơ băt mơnat, kơ’bah kơ tơdrong pơjing tơiung. Apinh Kră Yang ăn kơ bơ̆n băt ling lang kơ pơma dih băl hăm lu nơ̆r lăp trŏ lĕch đơ̆ng jơhngơ̆m ‘mêm wă kơ đe ‘bôh bơ̆n bơih kon Yang tơpăt, ‘mêm mơnat.
Ơ Kră Yang, inh bơnê kơ Ih tơgŭm inh, ling lang arih tơpăt tơduă dih băl păng tơ’bôh jơhngơ̆m ‘mêm, pơma lăp trŏ hăm bơngai nai. Yua anăn Kră Yang Yêsu Krist, Amen.
Bơ̆n hăm ling lang pơma nơ̆r ‘mêm păng lăp trŏ hăm đĭ đăng bơngai ưh?
Pơma nơ̆r lăp trŏ, ‘mêm mơnat
Noh bơih nơ̆r hơkat tơ’bôh Kră Yang oei hơdai
Bơngai arih tơpăt, tơnăp tơpă
Wă arih pơm hơdah, anăn Kră Yang, ding đĭ chăl arih
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 3
Kênh Youtube BHKTHN:
