Klei Aê Diê Blŭ: Y-Yôp 1:1-5
Êlan kliăng: “ ‘Năng ai phung anak êkei kâo ngă soh leh, leh anăn tăm pah kơ Aê Diê hlăm ai tiê diñu.’ Msĕ snăn Y-Yôp khăng ngă nanao.” (Y-Yôp 1:5b)
Klei êmuh ksiêm mĭn: Si klei bhiăn jăk siam gŏ sang Y-Yôp mâo? Si klei bi kpĭ mjuăt pô hlăm klei hdĭp myang đru leh Y-Yôp djă pioh klei hdĭp gŏ sang huĭ mpŭ kơ Aê Diê? Si drei mkŏ mjing klei kkuh mpŭ hlăm gŏ sang čiăng wah lač brei kơ gŏ sang drei?
Y-Yôp jing sa hlăm tlâo čô mnuih hlăm Klei Bi Mguôp Hđăp yap jing mnuih kpă ênô (Y-Êsêkiêl 14:14). Ñu mâo bruă klam prŏng snăk hŏng gŏ sang ñu mâo pluh čô anak. Amâo djŏ knŏng hdĭp huĭ mpŭ kơ Aê Diê, ƀiădah ñu wăt mprăp bi mâo djăp mnơ̆ng yua kơ grăp čô leh anăn bi leh bruă răng kriê klei hdĭp myang kơ phung anak ñu msĕ mơh.
Čiăng mkŏ mdơ̆ng knhuah klei hdĭp myang mâo klei tŭ dưn, Y-Yôp bi hriăm mjuăt gŏ sang ñu myơr mnơ̆ng myơr čuh kơ Khua Yang, jing sa klei kkuh mpŭ, mpŭ mni leh anăn kwưh akâo kơ Khua Yang pap brei klei soh. Klei myơr mnơ̆ng ngă yang khăng nao mbĭt hŏng klei wah lač (Y-Êsra 6:10; Y-Luk 1:10). Y-Yôp bi hmô klei wah lač, klei kkuh mpŭ kơ Aê Diê hlăm gŏ sang ñu pô čiăng brei kơ phung anak čô ñu leh anăn wăt kơ phung drei hruê anei tui ngă msĕ mơh. Hlăm Klei Bi Mguôp Hđăp, mâo lu amĭ ama brei leh klei bi hmô wah lač brei kơ gŏ sang digơ̆. Y-Abraham wah lač brei kơ anak ñu Y-Ismael, leh anăn kơ amuôn ñu Y-Lot (Klei Mphŭn Dơ̆ng 18:24-32). Y-Môis ur kraih kơ Aê Diê Yêhôwa, kwưh akâo Khua Yang pap brei kơ klei soh leh anăn bi hlao brei kơ amai ñu pô (Klei Yap 12:13). Hlăm Klei Bi Mguôp Mrâo, lu amĭ ama kwưh akâo leh kơ Khua Yang Yêsu bi hlao brei klei ruă, suôt yang jhat kơ anak digơ̆.
Y-Yôp kăp răng nanao huĭdah phung anak ñu ngă soh leh anăn lui wir Khua Yang, kyuanăn hŏng jih ai tiê kpĭ mjuăt ñu pô hlăm klei wah lač brei kơ gŏ sang ñu pô (êlan 5). Ñu ruah hruê mmông “Tơdah hruê huă mnăm ruê̆ leh” leh anăn mprăp mkra hŏng klei răng čiăng “bi doh hĕ phung diñu, leh anăn gơ̆ bhiăn kgŭ ưm aguah” pioh mmông wah lač brei kơ gŏ sang. Ñu khăng ngă nanao hŏng klei mpŭ.
Klei Aê Diê Blŭ Klei Bi Mguôp Mrâo bi hriăm phung ung mô̆, amĭ ama, phung anak brei mâo bruă bi klam hdơ̆ng pô (Kôlôs 3:18-21) čiăng djă pioh klei jăk mơak hlăm gŏ sang leh anăn grăp čô hlăm gŏ sang thâo huĭ mpŭ kơ Khua Yang. Wah lač hrăm mbĭt hlăm gŏ sang, amâodah pioh mmông kkuh mpŭ hlăm gŏ sang brei jing klei kpĭ mjuăt drei pô hlăm klei hdĭp myang, čiăng dưi djă pioh knhuah hdĭp huĭ mpŭ kơ Aê Diê hlăm gŏ sang pô leh anăn hlăm Phung Sang Aê Diê. Klei tŭ dưn mmông pioh wah lač hlăm gŏ sang amâo djŏ knŏng hjăn đru rŭ mdơ̆ng klei hdĭp myang ktang kjăp, đuĕ kbưi mơ̆ng klei soh, klei mplư leh anăn klei hmăi jhat mơ̆ng lăn ala, ƀiădah wăt đru kơ grăp čô hlăm gŏ sang mâo mmông myun bi mguôp mbĭt, mjĕ giăm bi khăp hdơ̆ng pô mơh. Phung anak Y-Yôp hdĭp êđăp ênang bi hlĭ hdơ̆ng pô kyua digơ̆ mâo mmông kkuh mpŭ hrăm mbĭt ti gŏ sang leh anăn kyua mâo klei wah lač mơ̆ng ama digơ̆. Hruê anei, drei mâo hdruôm hră Klei Aê Diê Blŭ jing Klei Aê Diê Pô blŭ hŏng drei, leh anăn Aê Diê brei kơ drei klei pap dưi bi mguôp wah lač hŏng Ñu. Bruă klam kơ sa čô ama jing, mkŏ mjing leh anăn djă pioh klei kpĭ mjuăt ñu pô hlăm klei kkuh mpŭ kơ Aê Diê ti gŏ sang pô, kčưm dơ̆ng mơ̆ng mphŭn mkŏ mdơ̆ng gŏ huă. Klei yuôm brei drei tui hlue klei bi hmô mơ̆ng Y-Yôp “khăng ngă nanao”!
Si ngă drei pioh mmông kkuh mpŭ kơ Aê Diê ti gŏ sang pô leh mơ̆? Tơdah mâo leh, si ngă drei ăt sĭt suôr pioh nanao mmông wah lač kkuh mpŭ ti gŏ sang drei mơ̆? Hŏng si hdră êlan drei ngă leh êjai dôk hdĭp hlăm ênuk lu mta klei gun kpăk anei ?
Wah lač: Ơ Ama bŏ hŏng klei khăp! Brei gŏ sang kâo mâo klei khăp, klei kiă kriê leh anăn klei bi hriăm mơ̆ng Khua Yang, čiăng kơ grăp čô hlăm gŏ sang kâo thâo hdĭp kơ Khua Yang, thâo bi khăp hdơ̆ng pô. Akâo Khua Yang brei kâo thâo kpĭ mjuăt kâo pô, djă pioh mmông wah lač hlăm gŏ sang čiăng dưi djă pioh klei jăk mơak leh anăn mkŏ mdơ̆ng klei huĭ mpŭ kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
