Klei Aê Diê Blŭ: Y-Mathiơ 21:23-27
Êlan kliăng: “Phung lu bi kngăr kơ klei Ñu mtô, kyuadah Ñu mtô kơ digơ̆ msĕ si sa čô mâo kơhưm, amâo djŏ msĕ si phung khua čih hră ôh. ” (Y-Markôs 1:22)
Klei êmuh ksiêm mĭn: Ya ngă phung knơ̆ng khua ngă yang leh anăn phung khua mduôn êmuh? Khua Yang Yêsu kơ klei dưi? Si Khua Yang wĭt lač kơ diñu? Si drei yua klei hriăm anei hlăm klei hiu hưn bi sĭt klei đăo?
Êjai Yêsu mŭt hlăm Sang Kkuh Mpŭ, phung knơ̆ng khua ngă yang leh anăn phung khua mduôn hriê lač kơ Ñu êjai Ñu dôk mtô, “Hŏng ya klei dưi ih ngă klei anei? Leh anăn hlei pô brei kơ ih klei dưi anăn?” (êlan 23). Hlăm ênuk Khua Yang Yêsu, klei dưi mơ̆ng sa čô mnuih hriê mơ̆ng bruă klam hlăm ala ƀuôn, klei thâo lu leh anăn knhuah gru gŏ sang pô anăn. Hĭn mơh, čiăng jing sa čô Raƀi, pô anăn brei hriăm mjuăt, mâo tŭ yap leh anăn tiŏ nao čiăng mtô bi hriăm. Khua Yang Yêsu amâo dưi yap ôh mơ̆ng klei bhiăn klei đăo phung Yuđa, kyua anăn diñu êmuh Khua Yang kơ klei dưi tơdah Khua Yang mtô leh anăn ngă klei myang.
Êlâo kơ wĭt lač kơ phung knơ̆ng khua ngă yang leh anăn phung khua mduôn, Ñu êmuh leh digơ̆ sa klei êmuh ênưih snăk “Mơ̆ng kbiă hriê klei ƀaptem Y-Yôhan, mơ̆ng adiê amâodah mơ̆ng mnuih?” (êlan 25). Ăt msĕ si Khua Yang Yêsu mơh, Y-Yôhan Pô ngă ƀaptem hlăk amâo mâo phung nai leh anăn phung Pharisi tŭ yap ôh, ƀiădah ñu jing sa čô mnuih mâo phung ƀuôn sang khăp kyua lu mnuih ti Yêrusalem nao čiăng kơ ñu ngă brei ƀaptem kơ pô (Y-Markôs 1:5). Phung knơ̆ng khua ngă yang leh anăn phung khua mduôn hlăk amâo tŭ yap ôh Y-Yôhan Pô Ngă ƀaptem ƀiădah lŏ huĭ kơ phung ƀuôn sang kyua anăn amâo jhŏng hưn mdah ôh klei anei ti anăp phung ƀuôn sang “kyuadah jih jang mnuih đăo kơ Y-Yôhan jing sa čô khua pô hưn êlâo” (êlan 26). Bi tơdah diñu wĭt lač “kyua mơ̆ng adiê” snăn ya ngă diñu amâo đăo ôh klei Y-Yôhan hưn kơ Êđai Biăp Aê Diê. Knhal tuč diñu ruah hdră êđăp ênang jing wĭt lač diñu amâo thâo ôh. Diñu êmuh amâo djŏ kyua čiăng thâo kơ Khua Yang ôh ƀiădah jing čiăng mplư kyua anăn Khua Yang amâo wĭt lač ôh kơ diñu kơ klei dưi Khua Yang.
Hlăm bruă hiu hưn bi sĭt klei đăo, drei khăng tuôm hŏng klei êmuh kơ “klei dưi”. Phung klă sĭt čiăng thâo srăng êmuh kơ klei Aê Diê mâo sĭt, kơ klei klă sĭt klei bi mtlaih hlăm Anăn Khua Yang Yêsu, kơ Ƀuôn Ala Mtao Adiê, klei hdĭp êdei… Ƀiădah ăt mâo lu mnuih bi kdơ̆ng khăng êmuh čiăng ngă bi dleh amâodah mưč mač kơ drei. Tui si klei Khua Yang Yêsu bi hmô, drei đăm bi tăng mgăl ôh hŏng diñu kyua diñu amâo klă sĭt čiăng thâo săng kơ klei kpă ênô ôh. Ƀiădah hŏng phung klă sĭt êmuh kyua diñu dôk luč klei êđăp ênang, amâodah dôk tuôm hŏng klei dleh dlan hlăm klei hdĭp, brei drei đru diñu thâo săng klei sĭt nik čiăng đăo kơ Khua Yang Yêsu jing Khua Yang Pô Bi Mtlaih pô. Drei mâo Klei Aê Diê Blŭ jing klei dưi leh anăn Yang Mngăt Jăk jing ai ktang, kyua anăn brei jhŏng, ktang hiu hưn Anăn Khua Yang hŏng klei dưi Khua Yang brei.
Drei hur har hưn kơ Khua Yang hŏng klei ktang hlăm klei dưi Yang Mngăt Jăk Aê Diê brei mơ̆?
Wah lač: Ơ Khua Yang, akâo kơ Ih đru kâo thâo kral klei dưi Yang Mngăt Jăk Ih brei čiăng bi êdah hlăm knuih hdĭp grăp hruê hŏng phung riêng gah, leh anăn bi êdah klei bi mtlaih Ih kơ phung ka thâo kral Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Y-Pêtrôs 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
