Mathais 21:23-27
Nqe cim:
“Cov neeg uas tuaj mloog Yexus qhuab qhia, lawv xav tsis thoob li, rau qhov Yexus tej lus qhia tseemceeb heev; nws qhia tsis thooj li cov xibhwb uas qhia Vajtswv txoj Kevcai qhia.” (Malakaus 1:22)
Lus nug rau sawvdaws xav:
– Vim li cas cov povthawj thiab cov txwjlaug nug txog Tswv Yexus lub hwjchim?
– Tswv Yexus teb lawv li cas?
– Peb siv zaj kawm no li cas rau hauv kev mus ua timkhawv txog Yexus zaj?
Thaum Tswv Yexus mus rau hauv Tuamtsev thiab qhuab qhia rau tej neeg sawvdaws mloog, cov povthawj thiab cov txwjlaug tuaj nug Tswv Yexus: “Koj tau cai qhovtwg los ua tej no? Leejtwg tso cai rau koj?” (nqe 23). Tiam Tswv Yexus nyob, ib tug tibneeg tau hwjchim thiab meejmom yog los ntawm tebchaws muab pub, los ntawm kev kawm paub thiab los ntawm kev tau cob qhia hauv tsev neeg. Tsis tas li ntawd xwb, yuav dhau mus ua ib tug xibhwb, tus ntawd yuav tsum tau kawm xyaum dhau los ntawm tej xibhwb, tau lees paub thiab tau txib tawm mus qhuab qhia. Tswv Yexus tsis tau lees paub los ntawm cov Yudais tej thawj coj, vim li ntawd, lawv thiaj nug Tswv Yexus txog Nws lub hwjchim uas Nws qhuab qhia thiab Nws ua tej txujci tseemceeb.
Ua ntej yuav teb cov pothawj thiab cov txwjlaug tej lus nug, Tswv Yexus tig mus nug lawv ib lo lus yoojyim hais tias “Leejtwg tso cai rau Yauhas muab neeg ua kevcai raus dej, Vajtswv lossis neeg?” (nqe 25). Kuj zoo tib yam li Tswv Yexus, Yauhas Npatitus yeej tsis tau cov xibhwb uas qhia Vajtswv txoj kevcai thiab cov Falixais lees paub, tiamsis tej neeg sawvdaws fwm Yauhas Npatitus heev, vim muaj tibneeg coob coob hauv Yeluxalees tuaj kom nws muab lawv ua kevcai raus dej (Malakaus 1:5). Cov povthawj thiab cov txwjlaug los tsis kam lees paub Yauhas Npatitus, tiamsis vim lawv ntshai tej neeg coob coob, thiaj tsis kam hais tawm tabmeeg tej neeg sawvdaws, “rau qhov sawvdaws yeej paub hais tias Yauhas yog ib tug cev Vajtswv lus” (nqe 26). Yog lawv teb hais tias ,“los ntawm Vajtswv” Tswv Yexus yuav hais tias vim li cas lawv tsis ntseeg Yauhas tej lus hais txog Vajtswv tus menyuam yaj. Thaum kawg lawv xaiv lus teb rau Tswv Yexus lo lus nug hais tias, lawv tsis paub. Tsis yog cov Yudais xav nug Tswv Yexus kom lawv paub Yexus meej ntxiv, tiamsis yog lawv nug cuab saib Tswv Yexus puas teb lus txhaum, Tswv Yexus kuj tsis qhia rau lawv paub txog Nws lub fwjchim.
Thaum ua timkhawv txog Yexus zaj, peb pheej ntsib tej lo lus nug txog “lub hwjchim” thiab nug txog leejtwg tso cai rau peb… Cov neeg uas muaj lub siab xav tshawb nrhiav kom paub qhov tseeb, lawv yuav nug txog Vajtswv yog tus muaj nyob li cas? nug txog qhov tabpov ntawm kev cawmdim hauv Tswv Yexus yog dab tsi?, nug txog ntuj Ceebtsheej thiab lub neej yav tom ntej zoo li cas?… Tiamsis kuj muaj ib feem twg yog nug tawmtsam, lossis nug txob thuam. Yog li ntawd, peb xyaum Tswv Yexus tus qauv, tsis tas sib cav yeej swb nrog lawv, vim lawv yeej tsis muaj siab xav nrhiav paub qhov tseeb. Tiamsis nyob ntawm cov uas xav nug kom paub qhov tseeb tiag, vim lawv tsis tau totaub, lossis daws tej teebmeem hauv kev ua neej, peb yuav tsum pab lawv paub meej qhov tseeb yog los ntseeg thiab txais yuav Tswv Yexus ua lawv tus Tswv Cawmseej. Peb muaj Vajtswv Txojlus thiab Vaj Ntsuplig ua tus pab, qhov ntawd yuav txhawb peb lub zog, yog li ntawd cia li sawv khov kho tshaj tawm Tswv Yexus lub npe los ntawm Vaj Ntsujplig lub hwjchim uas Nws pub rau peb.
Thov Vajtswv,
Vajtswv, thov pab nyuam yaus zeem paub lub hwjchim ntawm sab ntsujplig uas Koj pub thiab ua neej qhia tshwm Koj lub hwjchim ntawm kev cawmdim rau tibneeg sawvdaws, kom lawv los ntseeg txais yuav Tswv Yexus ua lawv tus Tswv Cawmseej. Nyuam yaus tuav Tswv Yexus Khetos lub npe thov. Amees.
Peb puas kub siab hais txog Tswv Yexus lub npe los ntawm Vaj Ntsujplig lub hwjchim?
Nyeem Vajluskub hauv peb lub xyoos: 2 Petus 2
Kênh Youtube BHKTHN:
