Klei Aê Diê Blŭ: Klei Bi Hriêng 28:13
Êlan kliăng: “… ƀiădah hlei pô hưn leh anăn lui klei soh anăn srăng mâo klei pap” (Klei Bi Hriêng 28:13b)
Klei êmuh ksiêm mĭn: Ya bruă brei ngă tơdah hưn klei soh hŏng klei sĭt? Ya klei mnuih hưn klei soh dưi mă tŭ? Êlan Klei Bi Hriêng anei đru drei, si knuih leh anăn klei ngă djŏ brei drei mâo hĕ tơdah ngă soh?
Mtao Y-Salômôn hưn mdah êlan hdră yuôm tơdah tlă anăp hŏng klei soh drei ngă, anăn jing “Đăm Mdăp – Hưn Bĕ”. “Hưn” lač kơ klei hưn amâo djŏ knŏng kơ klei soh ôh ƀiădah wăt hưn bi êdah jih knuih leh anăn bruă Aê Diê, čiăng lač kơ klei mpŭ mni (Klei Mmuñ Hđăp 89:5). Ƀiădah lĕ, hlăm êlan Klei Bi Hriêng anei, “hưn” jing hưn klei soh pô. Čiăng bi knal klei pap Aê Diê, brei drei tŭ ư drei pô jing pô bi kdơ̆ng hŏng Aê Diê Doh Jăk. Tơdah bi mguôp jih dua klei mblang kơ boh blŭ “hưn” snăn mblang jing “hưn mdah bĕ hŏng jih jang mnuih klei mmuñ bi mni leh anăn mpŭ mni kơ Aê Diê, hŏng klei tŭ ư drei pô yơh jing sa čô mnuih čiăng mâo klei pap brei klei soh čiăng dưi tlaih mơ̆ng klei soh”. Klei anei čoh čuăn dua mta bruă kơ mnuih hưn klei soh: Tal sa, mmuñ bi mni kơ klei prŏng prĭn Aê Diê kyuadah arăng amâo dưi mdăp klei soh hŏng Ñu ôh; mmuñ bi mni kơ klei kpă ênô Aê Diê kyuadah Ñu mâo klei dưi bi kmhal pô ngă soh; leh anăn mmuñ bi mni kơ klei pap Aê Diê kyuadah Ñu pap brei klei soh leh anăn bi mtlaih. Tal dua, tŭ ư klei soh pô bi kdơ̆ng hŏng Aê Diê.
Hưn klei soh brei lŏ čuê hŏng klei “lui hĕ klei soh”, boh blŭ anei lač kơ klei tlaih đuĕ, phưi lui amâodah bi luč ya mta klei. Kyuanăn, “hưn klei soh” amâo knŏng čoh čuăn tŭ ư kơ soh drei ngă leh ôh, ƀiădah wăt jing sa mta klei čŏng čuăn hlăm ai tiê, hŏng klei pap Aê Diê, čiăng weh đuĕ kbưi leh anăn amâo lŏ đuôm gam hŏng mta klei soh anăn ôh. Snăn, klei kmhal sĭt kơ klei soh mâo mbĭt wăt klei mmuñ mpŭ mni kơ Aê Diê hŏng klei thâo kral klei soh leh anăn lui hĕ klei soh anăn (Y-Mathiơ 3:8; Bruă Phung Khua Ƀĭng Kna 26:20). Lu mnuih hruê anei thâo kral leh anăn hƀlŏk kơ klei soh ƀiădah amâo čiăng lui ôh!
Tơdah klei mdăp klei soh amâo srăng mâo klei đĭ kyar ôh, snăn tinei bi mklăk wĭt, klei hưn leh anăn lui klei soh “srăng mâo klei pap”. “Klei pap” mâo boh blŭ phŭn jing “sang anak” – rup klei khăp amĭ brei kơ sa čô hđeh ĭ awăt êdu. Boh blŭ anei yua nanao bi mguôp mbĭt hŏng klei khăp mơ̆ng pô ti dlông brei kơ pô ti gŭ, amĭ ama brei kơ phung anak, pô mâo klei dưi brei kơ pô luč lĕ hlăm klei bi blah, mnuih tŭ jing brei kơ mnuih luh liê (I Y-Yôhan 1:8-9; Klei Mmuñ Hđăp 32:1-2, 10-11).
Jing sa čô anak Aê Diê, brei drei hdơr nanao, tơdah drei mdăp klei soh drei snăn Aê Diê srăng bi êdah ñu, ƀiădah tơdah drei hưn leh anăn lui hĕ klei soh snăn Aê Diê srăng “mdăp” hŏng klei pap Ñu Pô – Aê Diê srăng pap brei tơdah drei thâo kral klei soh drei pô, hưn klei soh, lui leh anăn Ñu srăng lŏ bi kơrŭ klei hdĭp drei.
Tơdah hưn klei soh, si ngă drei čuăn hlăm ai tiê lui hĕ ñu mơ̆?
Wah lač: Ơ Khua Yang, pap brei kơ klei soh kâo ngă leh hŏng Ih. Brei kâo thâo huĭ mduĭ kơ klei soh, hưn klei soh leh anăn lui hĕ ñu. Akâo Ih đru kâo hdơr nanao, kyuadah Ih jing Doh Jăk snăn brei kâo hdĭp klei hdĭp doh jăk msĕ mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Yôhan 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
