Pajlug 28:13
Nqe cim:
“…yog koj lees thiab tso plhuav tej kev txhaum tseg Vajtswv yuav hlub koj” (Pajlug 28:13b)
Lus nug rau sawvdaws xav:
– Lees kev txhaum tiag tiag yuavtsum mus nrog ib yam haujlwm dab tsi?
– Tus uas lees kev txhaum tau txais yam dab tsi?
– Nqe Pajlug no pab peb muaj tus cwjpwm thiab tes haujlwm twg kom tsimnyog thaum ua txhaum?
Vajntxwv Xalumoos qhia tawm ib tus cai tseemceeb thaum uas yus ua txhaum yog “Tsis txhob npog – Cia li lees”. “Lees” hais txog kev lees paub tsis hais kev txhaum xwb tiamsis kuj yog lees paub Vajtswv tus yamntxwv thiab Nws tes haujlwm, hais ntsis txog kev qhuas Vajtswv (Ntawv Nkauj 89:5). Tiamsis hauv nqe Pajlug no “lees” hais txog kev lees kev txhaum hauv yus tus kheej. Cia kom peb tau saj Vajtswv txoj kev hlub tshua, peb yuavtsum cim civ lees paub yus yog tus ua tawmtsam Vajtswv tus uas dawbhuv. Yog hais sau zog ob lub ntsiab hauv lolus “lees”, ces lub ntsiab yog “Cia li tabmeeg qhuas thiab txhawb nqa Vajtswv los ntawm qhov uas lees paub kev cheemtsum ntawm ib tug tibneeg yog kev zam txim kom dim kev txhaum”. Qhov no yuavtsum muaj ob seem nyob hauv tus neeg lees txim: Tim 1, qhuas Vajtswv tus uas zoo kawg nkaus vim tibneeg zais tsis tau kev txhaum rau Nws, qhuas Vajtswv tus uas ncaj ncees vim Nws muaj cai rau txim rau tus uas ua txhaum; thiab qhuas txog Vajtswv kev hlub vim Nws zam txim thiab cawmdim. Tim 2, zeem paub yus kev txhaum yog tau ua tawmtsam Vajtswv lawm.
Yam yuav tsum ua ntxiv thaum lees kev txhaum yog “tso plhuav kev txhaum tseg”, lolus no hais txog kev khiav tawm, tso tseg lossis ua poob ib yam dab tsi mus. Vim li ntawd “lees txim” tsis yog yuam kom peb lees peb lub txim xwb, tiamsis kuj yog ib txoj kev txiav txim siab muaj homphiaj, vamkhom Vajtswv kev hlub khiav deb tsis txhob tsuas kis yus txoj kev txhaum ntxiv lawm. Yog li ntawd, tso kev txhaum tseg tseeb yog muaj ob tes haujlwm mus ua ke, qhuas, txhawb nqa Vajtswv los ntawm qhov uas zeem paub kev txhaum thiab muab tso tseg (Mathais 3:8; Tes Haujlwm 26:20). Ntau tug neeg niaj hnub nim no zeem paub kev txhaum thiab tu siab kev txhaum tiamsis tseem tsis tso kev txhaum tseg!
Yog hais tias qhov uas npog kev txhaum yuav tsis vammeej ces qhov uas lees kev txhaum thiab muab tso tseg “yuav tau hlub tshua”. “Hlub tshua” tshwm ntawm lolus “hauv plab” los – yog tus duab kev hlub ntawm leej niam pub rau ib tug menyuam uas tsis muaj zog. Lolus no pheej tau siv rau kev hlub pub saud mus rau hauv, niam txiv mus rau menyuam, tus kovyeej mus rau tus swb, tus uas tau zoo mus rau tus txomnyem (1 Yauhas 1:8-9; Ntawv Nkauj 32:1-2, 10-11).
Yog Vajtswv menyuam, yuavtsum nco ntsoov hais tias yog peb npog yus tej kev txhaum ces Vajtswv yuav nthuav tawm, tiamsis yog peb lees kev txhaum thiab tso tseg ces Vajtswv yuav “npog” peb los ntawm Nws txoj kev hlub tshua – Vajtswv yuav zam txim rau peb thaum peb zeem paub yus kev txhaum, lees tso tseg thiab Vajtswv yuav kho peb lub neej dua tshiab.
Thov Vajtswv,
Vajtswv, thov zam txim rau nyuam yaus tej kev txhaum uas nyuam yaus tau ua txhaum rau Koj lawm. Thov pab nyuam yaus paub ntshai kev txhaum thiab tso tseg. Thov pab nyuam yaus nco ntsoov hais tias Vajtswv yog tus dawbhuv kom nyuam yaus kuj ua ib sim neej dawbhuv. Nyuam yaus tuav Tswv Yexus Khetos lub npe thov, Amees.
Thaum uas lees kev txhaum, peb puas txiav txim siab tso tseg?
Nyeem Vajluskub hauv peb lub xyoos: 1 Yauhas 2
Kênh Youtube BHKTHN:
