2 Kevcai 32:7-14
Nqe cim:
“Tus Tswv tib leej coj Nws haivneeg, Nws tsis yuav lwm haivneeg tus vajtswv pab.” (2 Kevcai 32:12)
Lus nug rau sawvdaws xav:
– Mauxes nqua hu haivneeg Yixalayees yuav tsum nco txog tej yam dabtsi?
– Tej yam ntawd muaj nqis tseemceeb zoo li cas rau tus Tswv haivneeg?
– Yuav ua li cas kom peb muaj kev ruaj siab rau tus Tswv txawm yog yuav ntsib kev sim siab hauv lub neej?
Nyob hauv Mauxes zaj nkauj, txuas ntxiv tej lus liam txim txog kev tsis mloog lus ntawm haivneeg Yixalayees ces yog tej lus nqua hu tus Tswv haivneeg rov nco txog tej haujlwm loj uas Vajtswv tau ua rau lawv cov yawgkoob. Muaj ntau yam haujlwm loj uas Vajtswv tau ua rau haivneeg Yixalayees, tiamsis nyob hauv ntau yam koob hmoov uas loj tshaj yog tus Tswv tau xaiv lawv dhau los ua ib haivneeg ua tus Tswv tug. Vajtswv xaiv lawv thaum lawv tsis tau tsheej ua ib haivneeg, peb muaj cuabkav pom qhov no dhau hauv nqe 8-9. Tsis yog li ntawd xwb, txuas ntxiv hauv nqe 10-11, Mauxes rov hais txog Vajtswv txojkev coj, tsomkwm, thiab mus nrog Nws haivneeg thaum yog ib pab neeg mus mus los los nyob tom tiaj suabpuam tsis tau muaj tebchaws nyob. Txawm li ntawd los, thaum tau txais lub neej nplua mias uas los ntawm tus Tswv pub nyob hauv lub tebchaws uas coglus tseg, ces haivneeg Yixalayees ho tso tus Tswv tseg.
Sawv ntawm cov Yixalayees txojkev ntxeev siab tom qab uas tau mus nyob hauv lub tebchaws coglus tseg, Mauxes tau tabpov muaj zog khov khov hais tias, tsuas muaj tus Tswv tib leeg thiaj yog tus Tswv uas coj Nws haivneeg, tsis yog lwm haivneeg tus vajtswv (nqe 12). Tsimnyog tu siab tshaj, vim txawm lolus tabpov ntawd yuav muaj zog npaum li cas los kuj tav tsis tau qhov uas haivneeg Yixalayees mus yuam kev, khiav raws lwm haivneeg tej vajtswv nyob rau tom qab no. Mob siab tshaj thaum hais tias, tso tus Tswv uas tau tsim thiab cawm lawv tseg yog qhov uas haivneeg Yixalayees ua los mus pauj tus Tswv txoj koob hmoov uas Nws tau ua rau lawv haivneeg.
Hauv ncua kev uas nrog tus Tswv mus, rov nco txog tej koob hmoov zoo uas Vajtswv tau ua rau yus lub neej, yus tsev neeg thiab yus caj ces yog yam uas cheem tsum dua ntais. Yog tsis rov nco txog thiab tsis rov tig saib tej haujlwm uas tus Tswv tau ua rau yus, yeej nyuaj rau peb cob qhia tej xeebntxwv txog lub siab nco txiaj ntsig thiab kuj nyuaj rhais ruam mus rau yav tom ntej. Vim txojkev uas nrog tus Tswv mus tsis yog tsuas muaj tej kev zoo siab, koob hmoov xwb, tiamsis kuj muaj tej kev txomnyem, kev nyuaj siab sib txuam daws. Muaj tej kev nyuaj siab thooj cuag li loj dua tej kev zoo siab uas yus tau txais. Kuj muaj tej kev txomnyem, kev sim siab ua rau peb txojkev ntseeg yoj yees, ntawd yog tej ntu sijhawm uas peb pom tias yus tsis txaus dag zog los mus rhais ruam nrog tus Tswv mus ntxiv. Thaum tej lub sijhawm zoo li ntawd, xav txog tej haujlwm loj uas tus Tswv tau ua rau yus lub neej yuav ntxiv dag zog kom peb ruaj siab rau tus Tswv thaum muaj kev sim siab tshwm tuaj rau yus lub neej. Thov tsis txhob muaj leejtwg hnov qab tej yam uas tus Tswv tau ua.
Thov Vajtswv,
Tus Tswv yog tus uas pub koob hmoov zoo nplua mias rau nyuam yaus lub neej. Thov koj pab kom nyuam yaus ua neej los ntawm kev nco tus Tswv koj txiaj ntsig thiab coglus ruaj khov tias yuav taug txojkev uas Koj taw qhia, txawm yog yuav raug txomnyem zoo li cas los xij. Nyuam yaus tuav Yexus Khetos lub npe thov, A-mees.
Peb kheev rov tshawb nco txog tej haujlwm uas tus Tswv ua rau yus lub neej, yus tsev neeg thiab Pawg ntseeg zoo li cas?
Nyeem Vajluskub hauv peb lub xyoo: 2 Xamuyees 19
Kênh Youtube BHKTHN:
