Yakơ 2:14-17
“…bơngai bu khan sư lui bơih, mă-lei sư ưh kơ pơm ‘lơ̆ng pơm trŏ, sư lui thoi noh ưh kơ yua kiơ kơ sư.” (Yakơ 2:17)
Nơ̆r jet tơchĕng pơwao:
– Thoi yơ wă khan đon lui lôch?
– ‘Bok Yakơ yua tơdrong pơtih gia kiơ wă tơ’bôh gah tơdrong lui ‘nâu?
– Pơm liơ wă kơ lu bơ̆n băt đon lui bơ̆n ‘noh đon lui oei arih pran dah đon lui lôch?
Sơ̆p Hla bơar nơ̆r ‘Bok Kei-Dei pơma pơsĭt kơ bơngai bu lui sơng iŏk Kră Yang Yêsu ưh pă pŭ tơdrong phak dơ̆ng bơih, sư gô hlôi đơ̆ng tơdrong lôch na năm tơ tơdrong arih (Yôhan 3:18; 5:24). Mălei, lăm Hla bơar nơ̆r ‘Bok Kei-Dei năr ‘nâu, ‘bok Yakơ roi tơ’bôh tơpăt sĭt pơm kơ bơ̆n mơ̆ng hlĭch, ‘noh sư khan: “Mălei sư ưh kơ pơm ‘lơ̆ng, pơm trŏ, lui thoi noh ưh kơ yua kiơ kơ sư” (trong 17). Nơ̆r “Ưh kơ yua” lei lăi thoi lôch wă khan “ưh pă đei yua, ưh pă gơh yua”, nơ̆r pơma ‘nâu wă khan ‘noh ưh kơ đon lui tơpă, ưh kơ đei ba truh tơ tơdrong dŏng pơklaih. ‘Bok Yakơ chih kơthơ ‘nâu kơ lu “’Nhŏng oh bơngai lui kơ Kră Yang Yêsu Krist” (trong 1) ‘noh lu bơngai băt bơih păng lui sơng iŏk Kră Yang Yêsu. Mă khan ưh kơ đei pơma rơđah kơ đon lui “đei yua” pơm kiơ̆ hơđăl kơ tơdrong kiơ, mălei hlôi đơ̆ng tơdrong kiơ mă ‘bok Yakơ đei chih roi lăm kơthơ ‘nâu, lu bơ̆n gơh hlôh kơ tơdrong ‘noh minh tơdrong arih mơ̆ng nơ̆r Kră Yang, lui yom kơ Kră Yang, păng ‘mêm mơnat kơ bơngai nai. Đơ̆ng tơdrong bơ̆n pơm kiơ̆ chu yom mơ̆ng nơ̆r Kră Yang ‘noh pơsĭt kơ tơdrong lui bơ̆n oei arih đei yua. Tơplơ̆ dơ̆ng, tơdah tơdrong arih bơ̆n ưh kơ đei tơplih na bơ̆n athei kơchăng ‘noh đon lui lôch ưh kơ đei yua kiơ, yua kơ bơngai lui kơ Kră Yang tơpă ‘noh thoi “tơmam ‘nao pơjing” (II Kôrintô 5:17), wă khan đei ‘bôh rơđah kơ tơdrong arih adrol tam mă lui păng đơ̆ng rŏng kơ lui kơ Kră Yang.
‘Bok Yakơ đei pơma pơtih tơ’bôh hơđăl gah đon lui lôch ưh kơ đei yua ‘noh đơ̆ng lăm tơdrong arih sa, pơma dơnuh bơ̆n rim năr hăm bơngai nai. Dah tơ’bơ̆p minh ‘nu bơngai hoh kơ’bah pơmat tat, bơngai đei đon lui ‘nâu sư kư̆m đei nơ̆r pơlung đei jơhngơ̆m brơ̆k mơnat mălei tơpă sư ưh kơ đei dŏng tơgŭm minh tơdrong kiơ (trong 15-16). Đon lui bơngai noh sư đei lơ tơdrong tơchĕng gơh hơgei, tơdrong lui sư lăm kơ̆l ‘ngok, mălei ưh kơ đei chă tơgŭm ‘biơ̆ tơdrong arih bơngai pơmat tat noh, ưh kơ đei pơm tơ’bôh tơdrong chu yom. Đon lui thoi noh đon lui dang thoi lôch păng krê hơmơt dêh, yua kơ sư pơm kơ bơngai ‘noh ngeh kơ bơ̆n lui bơih, hơđơ̆ng bơih, mălei tơpă tă tơ ưh (Mathiơ 7:21-23).
Mă khan bu lăm lu bơ̆n ưh kơ trŏ kơ sek tơlang đon lui bơngai nai sư lui tơpă dah ưh, đon lui sư arih dah lôch, mă khan thoi ei, thoi ‘bok Yakơ bơtho tơ’bôh, kư̆m thoi tơdrong juăt trŏ Kră Yang Yêsu đei tơ’bôh bơih ‘noh “lăng plei băt kơ tơnơm” (Mathiơ 12:33), kon pơlei Kră Yang ưh kơ trŏ kơ đei tơdrong arih thoi bơngai lăm teh đak, dah mă thoi kon yang kơnê̆. Đơ̆ng plei Yang Bơhngol ‘Lơ̆ng, đơ̆ng tơdrong bơ̆n chu nơ̆r Kră Yang lăm tơdrong arih minh ‘nu bơngai lui ‘noh tơdrong bơ̆n ‘bôh rơđah tơpă đơ̆ng minh ‘nu bơngai đei đon lui tơpă ưh kơ trŏ kơ đon lui lôch.
Tơdrong arih lu bơ̆n rim năr oei tơ’bôh bơ̆n arih hăm đon lui hơyơ?
Ơ Yang Bơhngol ‘Lơ̆ng, apinh Ih lăng jơhngơ̆m inh păng ăn kơ inh ’bôh tơdrong lui inh. Apinh Ih tơgŭm đon lui inh arih gơh đei tơdrong ‘mêm mơnat păng pơm tơ’bôh tơdrong dŏng tơgŭm bơngai jum dăr kơ inh. Apinh Ih ăn kơ inh ling lang đei đon lui arih păng pơchrang tơdrong hơdah Ih, tơgŭm lơ bơngai băt mơn kơ tơdrong mơsêh păng tơdrong dŏng pơklaih đơ̆ng Tơdrong ‘Nao ‘Lơ̆ng. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 18.
Kênh Youtube BHKTHN:
