Klei Aê Diê Blŭ: Klei Mtô Mñă Klei Bhiăn 32:7-14
Êlan kliăng: “Knŏng Yêhôwa atăt diñu, leh anăn amâo mâo ôh yang tue mbĭt hŏng Ñu.” (Klei Mtô Mñă Klei Bhiăn 32:12)
Klei êmuh ksiêm mĭn: Ya klei Y‑Môis iêô mthưr phung ƀuôn sang Israel brei lŏ hdơr? Si klei yuôm bhăn klei anăn hŏng phung ƀuôn sang Khua Yang? Si ngă čiăng drei dôk kjăp nanao hlăm Khua Yang wăt tơdah tuôm hŏng lu klei dleh dlan lông dlăng hlăm klei hdĭp?
Hlăm klei mmuñ Y‑Môis, lŏ čuê klei čhal lač klei soh phung ƀuôn sang Israel amâo sĭt suôr jing klei iêô mthưr phung ƀuôn sang Aê Diê brei lŏ hdơr kơ klei prŏng prĭn Aê Diê ngă leh kơ phung aê đưm diñu. Mâo lu klei prŏng prĭn Yêhôwa ngă leh kơ phung ƀuôn sang Israel, ƀiădah dưi lač sa hlăm klei pap prŏng prĭn hĭn jing Aê Diê ruah leh diñu jing sa djuê ana hjăn kơ Ñu. Aê Diê ruah leh diñu hlăk diñu ka jing sa djuê ana klă sĭt ôh, drei ƀuh klei anei hlăm êlan 8-9. Amâo djŏ dŭm năn ôh, hlăm êlan 10-11, Y‑Môis lŏ mñă kơ klei atăt gai, răng mgang, leh anăn klei Aê Diê hrăm mbĭt hŏng phung ƀuôn sang Israel tơdah diñu knŏng jing sa êpul ƀuôn sang hiu rưng hlăm kdrăn tač amâo mâo ngăn drăp ôh. Khădah snăn, leh mâo hưn klei hdĭp jăk mơak mơ̆ng Aê Diê brei hlăm krĭng Lăn Aê Diê Ƀuăn, phung ƀuôn sang Israel lui hĕ Aê Diê.
Dôk ti anăp klei bi kdơ̆ng mơ̆ng phung ƀuôn sang Israel leh hdĭp leh hlăm krĭng Lăn Aê Diê Ƀuăn, Y‑Môis bi mñă leh ktang snăk, knŏng mâo sa Yêhôwa jing Pô atăt gai leh phung ƀuôn sang Aê Diê amâo mâo ôh yang tue mbĭt hŏng Ñu (êlan 12). Klei năng ênguôt jing wăt tơdah klei mñă anăn ktang snăk dưn mơh ăt kăn dưi mkhư̆ mơh phung ƀuôn sang Israel êdei anei čhuang êbat êlan soh čhuai, tui tiŏ phung yang soh. Ênguôt snăk tơdah lač snei, lui hĕ Pô hrih mjing leh anăn bi tui leh pô jing klei phung ƀuôn sang Israel lŏ tla wĭt kơ klei pap Aê Diê ngă leh kơ djuê ana diñu.
Hlăm klei tui hlue Khua Yang, klei bi hdơr kơ klei jăk mơak myang Aê Diê ngă leh hlăm klei hdĭp pô, hlăm gŏ sang leh anăn djuê ana pô jing klei čiăng êdi. Tơdah amâo lŏ hdơr leh anăn amâo dlăng ôh bruă Ñu ngă leh kơ pô, drei dleh dưi mtô kơ anak čô kơ ai tiê hdơr knga leh anăn ăt dleh mơh nao phă anăp hŏng klei kjăp. Kyua êlan tui hlue Khua Yang amâo djŏ knŏng mâo klei mơak, klei jăk ƀiădah ăt mâo nanao mơh lu klei dleh dlan, ênguôt hnĭng hrăm mbĭt. Mâo klei ênguôt hnĭng msĕ si prŏng hĭn kơ klei mơak mñai pô găn leh. Ăt mâo mơh klei dleh dlan lông dlăng ngă mgei klei đăo pô hlăm Khua Yang, anăn jing wưng drei ƀuh pô msĕ si amâo lŏ djăp ai ktang lŏ dơ̆ng êbat tui hlue Khua Yang. Hlăk anăn, klei hdơr kơ ya klei prŏng prĭn Aê Diê ngă leh hlăm klei hdĭp srăng thiăm ai ktang čiăng drei lŏ dơ̆ng kjăp đăo knang hlăm Khua Yang ti anăp klei bi mlih mơ̆ng klei hdĭp. Đăm drei wơr ôh bruă Aê Diê ngă leh.
Si drei khăng lŏ bi hdơr bruă Aê Diê ngă leh hlăm klei hdĭp pô, gŏ sang leh anăn Phung Sang Aê Diê?
Wah lač: Ơ Khua Yang jing Pô brei leh klei jăk mơak amâo dưi yap ôh hlăm klei hdĭp kâo. Akâo kơ Ih đru kâo hdĭp nanao hŏng ai tiê hdơr knga Khua Yang leh anăn ƀuăn srăng nao mbĭt nanao hlue si êlan Ñu ktrâo lač, wăt tơdah srăng tla ênoh yuôm. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 19
Kênh Youtube BHKTHN: