II Kevcai 31:22-30
Nqe cim:
“Kuv paub hais tias, lawv yog neeg tawv ncauj thiab ntxeev siab. Thaum kuv tseem ua neej nyob lawv twb ntxeev siab thiab tawmtsam tus Tswv ntau zaus lawm, tom qab kuv tuag lawm ntshai lawv hajyam yuav ntxeev siab ntxiv.” (II Kevcai 31:27)
Lus nug rau sawvdaws xav:
– Mauxes sau txog yam dabtsi?
– Mauxes hais tias cov neeg Yixalayees yog cov neeg zoo li cas?
– Peb cheemtsum ua dabtsi kom hlub tau tus Tswv mus txog thaum kawg?
Qhov uas tus Tswv hais rau Mauxes thiab Yausuas paub ua ntej hais tias tom ntej no cov neeg Yixalayees yuav tawmtsam Nws, nov yog tej lus uas tau muab sau tseg, tso ntawm lub Phijxab ib sab, Mauxes muab los qhia thiab ceebtoom rau cov Yixalayees. Dua li ntawd, txojlus ntawd kuj yog qhia rau cov txwjlaug thiab cov nomtswv kom thaum Mauxes tuag lawm, lawv yog cov uas yuav muab qhia, ntuas cov pejxeem paub txog nqi zog thaum tso tus Tswv tseg. Peb paub hais tias Mauxes yeej paub txog tej lus ceebtoom no, rau qhov nws yog tus uas twb nrog cov neeg Yixalayees nyob ntev loo hauv tiaj suabpuam. Mauxes paub meej cov pejxeem tus yamntxwv tawmtsam thiab tawv ncauj lawm.
Tej zaum yuav muaj ntau leej pom hais tias yog ua cas tus Tswv ho ceebtoom ua ntej tej no thaum Nws haivneeg tseem hlub Nws, tseem ua raws nws tej lus qhia. Tshe yog tej lus qhia txog ntu caij nyoog tsaus ntuj nti ntawm haiv Yixalayees xwb, tiamsis kuj cheem tsum qhia heev kom cov pej xeem thaum mus nyob hauv lub teb chaws Vajtswv cog lus tseg lawm, tsis txhob yog vim tau lub neej zoo es muab tus Tswv tso tseg, mus xyaum lwm haivneeg kev ua neej, poob tus yamntxwv ua tus Tswv haivneeg dawbhuv. Lub siab hlub Vajtswv ntawm cov pejxeem tsis txaus ua tab pov lawv yuav hlub tus Tswv yav tom ntej, yog hais tias lawv tsis lees paub tus Tswv Txojlus thiab tsis ua raws li Txojlus ntawd txhua hnub.
Taug txojkev mus saum ntuj, cov ntseeg Yexus muaj cov kwvtij ntseeg nrog ua ke. Tiamsis nyias nyob nyias ib lub tsamthawj txawv, peb zeem paub hais tias muaj qee tus kwvtij tsis nrog peb taug txojkev ntawd lawm. Hauv cov ntawd muaj cov uas twb hlub Vajtswv thiab ua thawjcoj. Tseeb tiag qhov ntawd tsis yog ib yam uas ua rau peb xav tsis thoob, vim Mauxes twb hais tias, qhov zais ntshis hauv cov neeg ntawd yog kev tawmtsam thiab tawv ncauj. Yog li, lub siab hlub Vajtswv yog tsis muaj kev xyaum txhua hnub los ntawm qhov uas tswj tus kheej kawm Vajtswv Txojlus, thov Vajtswv, pehawm thiab ua lub neej raws li Vajtswv Txojlus qhia, ces txojkev hlub ntawd yoojyim hloov raws sijhawm, thiab thaum kawg mus txog qhov uas tsis muaj tus Tswv kav lawm. Vajtswv twb hlub peb thiab hlub mus txog hnub kawg. Thov Vajtswv pub rau peb tswj rawv lub siab hlub Nws mus txog thaum kawg.
Thov Vajtswv,
Tus Tswv, Koj yog tus uas paub nyuam yaus tus yamntxwv tawmtsam thiab tawv ncauj. Thov Koj pab kom nyuam yaus niaj hnub siv sijhawm los kawm Koj Txojlus, vamkhom Koj txhua lub tsamthawj, kom nyuam yaus qhov kev hlub Vajtswv Koj loj hlob zuj zus. Nyuam yaus tuav Tswv Yexus lub npe thov, Amees.
Peb pheej xyaum lub siab hlub Vajtswv zoo li cas?
Nyeem Vajluskub hauv peb lub xyoo: I Xamuyees 26
Kênh Youtube BHKTHN:
