Klei Aê Diê Blŭ: Y‑Luk 2:13-14
Êlan Kliăng: “Klei guh kơang kơ Aê Diê hlăm anôk ti dlông hĭn, leh anăn klei êđăp ênang ti lăn ala kơ phung mnuih bi mơak kơ Ñu.”(Y‑Luk 2:14)
Klei êmuh ksiêm mĭn: Hlăm mlam arăng kkiêng kơ Khua Yang Yêsu, ya klei mdê hjăn mâo leh? Ya ngă klei kkiêng kơ Khua Yang Yêsu hriê ba klei êđăp ênang ti lăn ala? Si brei drei ngă tơdah hriăm leh kơ klei sĭt nik anei?
Wăl anôk arăng kkiêng kơ Hđeh Điêt Yêsu kkiêng amâo mâo ya mnơ̆ng yuôm bhăn ôh kyua jing anôk msĕ hŏng aguah tlam leh anăn ƀun ƀin. H’Mari “kkiêng kơ sa čô anak êkei tal êlâo hĭn. Ñu hruôm gơ̆ hŏng čhiăm leh anăn bi mđih gơ̆ hlăm kniêm rơ̆k čiêm êmô biăp, kyuadah amâo mâo ôh anôk kơ diñu hlăm sang jưh” (Y‑Luk 2:7). Khua sang jưh leh anăn phung tue jưh hruê anăn amâo ƀuh ôh ya klei mdê hjăn anôk hđeh điêt mrâo kkiêng anei, ƀiădah amâo mâo pô mĭn ôh hđeh hruôm hŏng čhiăm hlăm kniêm rơ̆k krô anăn amâo djŏ jing sa čô hđeh msĕ hŏng hđeh mkăn ôh, Ñu jing Anak Aê Diê, Aê Diê Pô Tal Dua hriê ti lăn ala. Kyua anăn hlăm klei arăng kkiêng kơ sa čô hđeh êkei snăn mâo klei yuôm bhăn snăk dơ̆ng bi êdah. Klăk klai dĭng buăl jăk hlăm adiê, mpŭ mni kơ Aê Diê leh anăn hưn lar kơ klei kiêng kơ Hđeh Điêt Doh Jăk: “Klei guh kơang kơ Aê Diê hlăm anôk ti dlông hĭn, leh anăn klei êđăp ênang ti lăn ala kơ phung mnuih bi mơak kơ Ñu” (êlan 14).
Khua Yang Yêsu hriê ti lăn ala čiăng ba klei êđăp ênang kơ lăn ala. Klei êđăp ênang Khua Yang Yêsu ba amâo djŏ jing klei êđăp ênang plah wah anak mnuih hŏng anak mnuih ôh ƀiădah jing plah wah anak mnuih hŏng Aê Diê, plah wah lăn ala hŏng ƀuôn ală mtao. Klei Aê Diê Blŭ bi mklă jih jang mnuih soh leh sơăi (Rôm 3:23) leh anăn dôk hlăm klei bi roh hŏng Aê Diê (Rôm 5:10). Kyua klei soh pô, jih jang mnuih srăng tŭ klei Aê Diê ngêñ, tŭ klei bi kmhal hlŏng lar. Kyua khăp kơ anak mnuih, Khua Yang Yêsu hriê ti lăn ala jing mnuih, hdĭp klei hdĭp amâo mâo klei soh ôh, leh anăn tŭ klei djiê ti kyâo bi kal čiăng djiê hrô kơ anak mnuih. Ñu jing mnơ̆ng myơr ngă yang jăk kluôm, bi tui klei soh sa blư̆ djăp ênŭm, čiăng kơ hŏng klei anăn anak mnuih dưi bi grăng hŏng Aê Diê. Kyua anăn hlei pô đăo kơ Khua Yang Yêsu, pô anăn kơh mâo klei êđăp ênang sĭt. Leh anăn knŏng mâo klei êđăp ênang hŏng Aê Diê kơh anak mnuih mâo klei êđăp ênang hdơ̆ng pô.
Mâo klei êđăp ênang hŏng Aê Diê kluôm dhuôm jing bruă Khua Yang Yêsu, jing klei pap Aê Diê amâo djŏ kyua anak mnuih gĭr dưi mâo ôh. Thâo săng mơ̆ng drei mâo klei êđăp ênang anăn snăn brei drei hdĭp bi “guh kơang kơ Aê Diê hlăm anôk ti dlông hĭn”. Đăm ôh hlei pô mâo leh klei êđăp ênang sĭt ƀiădah ăt lŏ hdĭp kơ pô. Boh phŭn klei hdĭp drei amâo lŏ kƀĭn kơ pô ôh ƀiădah kơ Khua Yang leh anăn klei guh kơang Ñu, amâo djŏ knŏng hlăm yan bi hdơr hruê Noel ôh ƀiădah hlăm jih klei hdĭp.
Hlăm yan bi hdơr Hruê Noel thŭn anei, hlei pô dôk čiăng mâo klei êđăp ênang hŏng Khua Yang leh anăn si drei srăng ngă čiăng đru diñu?
Wah lač: Ơ Khua Yang, kâo bi mni kơ Khua Yang Yêsu Pô Bi Mtlaih jing Pô hriê leh ti lăn ala čiăng ba klei êđăp ênang kơ klei hdĭp kâo leh anăn kơ jih jang mnuih. Akâo kơ Ih bi bŏ ai tiê kâo hŏng klei hdơr knga čiăng hdĭp bi guh kơang Anăn Ih. Akâo kơ Ih yua kâo msĕ si mnơ̆ng čiăng đru kơ phung dôk rŭng răng, luč klei čang hmăng mâo klei êđăp ênang hŏng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
