Lukas 2:13-14
Nqe cim:
“Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!” (Lukas 2:14)
Lus nug rau sawvdaws xav:
– Hmo uas Tswv Yexus los yug, muaj yam dabtsi tshwjxeeb tshwmsim?
– Vim li cas Tswv Yexus los yug yog coj kev kaj siab pub rau neeg ntiajteb?
– Peb cheemtsum ua li cas thaum kawm paub qhov tseeb no?
Peb saib qhov chaw uas tus metub Yexus los yug tsis muaj yam dabtsi tshwjxeeb, Nws nyob tej chaw txomnyem ntsuav. Malis “yug nws tus metub hlob, nws muab khaubncaws qhwv tus menyuam thiab muab tso pw rau hauv ib lub dab zaub, rau qhov tej tsev so, neeg twb so puv tas lawm.” (Lukas 2:7). Tus tswv lub tsev so thiab cov qhua hmo ntawd tsis pom muaj dabtsi tshwjxeeb nyob ntawm tus menyuam mos yug los, tiamsis tsis muaj leejtwg xav txog hais tias tus metub uas muab khaub ncaws qhwv tso pw hauv dab zaub yog ib tug menyuam muaj nqis, Nws yog Vajtswv Leej Tub, lub Zwmtxwv thib ob hauv Vajtswv Vaj Peb Leeg los yug ua neeg. Yog li ntawd, hauv qhov pheej tshaj ntawm ib tug nyuam tub tshwm los ua neej ces muaj qhov txawv txawv pib tshwm sim. Cov timtswv ceebtsheej los hu nkauj qhuas Vajtswv thiab qhia txog zaj uas tus metub Yexus los yug: “Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!” (nqe 14).
Tswv Yexus los yug coj kev kaj siab los rau ntiajteb. Txojkev kaj siab uas Tswv Yexus coj los tsis yog kaj siab rau neeg thiab neeg, tiamsis yog ntawm tibneeg thiab Vajtswv, neeg ntiajteb thiab ntuj ceebtsheej. Vajtswv Txojlus hais tias txhua tus neeg puavleej ua txhaum (Loos 3:23) thiab ua yeebncuab tawmtsam Vajtswv (Loos 5:10). Vim txojkev txhaum, tagnrho txhua tus tibneeg puavleej raug tus Tswv rau txim, raug txim mus ibtxhis. Vim txojkev hlub tibneeg, Tswv Yexus los yug ua neeg, nrog neeg nyob tiamsis Nws tsis ua txhaum, thiab Nws tuag saum ntoo khaublig txhiv tibneeg lub txim. Nws yog qhov khoom fij theej txhoj, daws txim tib zaug xwb txaus lawm, tibneeg muaj feem tau los nrog Vajtswv sib raug zoo. Yog li cov uas ntseeg Yexus, tus ntawd thiaj tau kev kaj siab tseeb. Thiab thaum tau Vajtswv txojkev kaj siab lawm, tibneeg thiaj muaj kev kaj siab.
Tau Vajtswv txojkev kaj siab tiag tiag yog Tswv Yexus tes haujlwm, yog Vajtswv txoj koob hmoov hlub, nws tsis yog tibneeg qhov kev siv zog ua tau. Zeem paub yog tim qhovtwg peb tau kev kaj siab ces peb yuav paub ua neej “rau Vajtswv tau ntsejmuag.” Thov kom peb cov tau txais kev kaj siab tseeb tsis muaj cov uas tseem ua raws li yus nyiam. Qhov tseemceeb ntawm peb lub neej tsis yog xav txog yus tus kheej lawm, tiamsis yog tus Tswv thiab Nws lub tshwjchim, tsis yog hauv lub caij ua koob tsheej xwb tiamsis yog mus tas sim neej.
Thov Vajtswv,
Tus Tswv, nyuam yaus qhuas Tswv Yexus tus uas coj kev kaj siab los rau nyuam yaus lub neej, thiab tagnrho neeg ntiajteb. Thov ntxiv lub siab puv npho kev pab lwm tus kom mus pab tau cov neeg tas kev cia siab rov qab muaj kev kaj siab. Nyuam yaus tuav Tswv Yexus lub npe thov, Amees.
Hauv lub caij ua koob tsheej nco txog Tswv Yexus los yug xyoo no, leejtwg tabtom cheemtsum tau tus Tswv txojkev kaj siab thiab peb yuav ua dabtsi kom pab tau lawv?
Nyeem Vajluskub hauv peb lub xyoo: I Xamuyees 24
Kênh Youtube BHKTHN:
