Klei Aê Diê Blŭ: II Y‑Timôthê 1:6-9
Êlan kliăng: “Kyuadah Aê Diê amâo brei ôh kơ drei mngăt blao, ƀiădah mngăt ktang, thâo khăp, leh anăn thâo dôk djŏ hnơ̆ng.” (II Y‑Timôthê 1:7)
Klei êmuh ksiêm mĭn: Ya klei Khua ƀĭng kna Y‑Pôl bi mđĭ ai Y‑Timôthê tơdah tlă anăp hŏng klei dleh dlan, klei lông dlăng? Si hdră êlan čiăng kơ Y‑Timôthê hmiêt mkăp tŭ klei dleh knap, bi hlơr nanao ai tiê klei mĭn leh anăn ngă bruă hưn bi sĭt? Hŏng si hdră êlan drei dưi găn klei lông dlăng čiăng dưi hưn bi sĭt kơ Khua Yang hŏng klei jhŏng?
Khua ƀĭng kna Y‑Pôl êjai dôk hlăm war mnă, čih hră mơĭt kơ khua pô mtô hlăk ai Y‑Timôthê dôk kiă kriê Phung Sang Aê Diê ti Êphêsô, čiăng bi mđĭ ai gơ̆ tơdah tlă anăp hŏng klei dleh dlan klei lông dlăng, hlăm bruă mkŏ mdơ̆ng Phung Sang Aê Diê leh anăn jing pô hưn bi sĭt kơ Khua Yang. Ñu mtă mtăn kơ Y‑Timôthê brei bi trơ̆ng nanao êlah pui klei pap Aê Diê brei leh hŏng klei ñu ênă kngan ti gơ̆, đăm “blao” ôh, ƀiădah brei hưn bi sĭt hŏng “mngăt ktang, thâo khăp leh anăn thâo dôk djŏ hnơ̆ng”. “Mngăt blao” jing sa klei bi kgăn prŏng hlăm bruă hưn bi sĭt. Pô hưn bi sĭt kƀah klei jhŏng kyua huĭ kơ arăng tlao mưč, amâodah huĭ kơ arăng bi kdơ̆ng, ngă jhat. Leh anăn kyuadah drei wơr bĭt hĕ Aê Diê brei kơ drei mngăt ktang, thâo khăp leh anăn thâo dôk djŏ hnơ̆ng, čiăng dưi găn jing klei lông dlăng, hdĭp hưn bi sĭt kơ Khua Yang. Phung đăo kơ Krist đăm lui ôh êlah pui klei khăp djiê hĕ hlăm drei, ƀiădah bi trơ̆ng nanao klei pap Khua Yang brei, čiăng mă bruă kơ Khua Yang, boh nik nak jhŏng hưn bi sĭt kơ Khua Yang hlăm klei thâo khăp leh anăn thâo dôk djŏ hnơ̆ng.
Khua ƀĭng kna Y‑Pôl ăt mtă mơh kơ Y‑Timôthê đăm hêñ ôh kơ klei ñu dôk hlăm war mnă, kyuadah ñu dôk hlăm mnă amâo djŏ kyua klei ngă soh ôh, ƀiădah “Kyua klei mrâo mrang jăk anăn kâo tŭ klei knap mñai …” (II Y‑Timôthê 2:9). Anăn jing klei năng kdrưh hưn, amâo djŏ klei hêñ ôh. Brei grăp čô drei hdơr snei, Aê Diê amâo knŏng bi mtlaih drei, ƀiădah wăt iêô mthưr drei mŭt hlăm bruă myang doh jăk tui si hdră kñăm leh anăn klei pap Ñu msĕ mơh. Kyuanăn, wăt tơdah si klei jing dưn, si yang jhat duah êlan bi kgăn dưn, tơl wăt arăng mă jing mnă msĕ si Khua ƀĭng kna Y‑Pôl, ăt hmiêt mkăp tŭ klei dleh knap, ăt bi hlơr nanao ai tiê klei mĭn mă bruă leh anăn hưn bi sĭt kơ Khua Yang.
Kyuadah klei jing phung mnuih jing soh jhat, brei Phung đăo kơ Krist ƀuh sĭt kơ drei pô khăng hêñ kơ Khua Yang leh anăn kơ Klei Mrâo Mrang Jăk Khua Yang. Khua ƀĭng kna Y‑Pêtrôs pô ăt tuôm hngah mơh kơ Khua Yang tlâo blư̆ kyua huĭ ktư̆ yơ̆ng leh anăn hêñ, hlăk ƀuh arăng mă Khua Yang. Kyuanăn jih jang klei lông dlăng bi kgăn drei hưn bi sĭt kơ Khua Yang amâo djŏ knŏng kbiă hriê hjăn mơ̆ng Satan leh anăn klei dưi mơ̆ng tač êngao ôh, ƀiădah wăt klei lông dlăng mơ̆ng hlăm lam mnuih hđăp drei pô msĕ mơh. Čiăng dưi găn klei lông dlăng hlăm bruă hiu hưn klei đăo, brei grăp čô drei djă păn kjăp kơ phŭn akŏ klei ktang myang Yang Mngăt Jăk brei kơ drei, anăn jing mngăt ktang thâo khăp leh anăn thâo dôk djŏ hnơ̆ng. Tơdah knŏng dlăng kơ drei pô, drei srăng luč klei ktang čiăng dưi bi blah, ƀiădah tơdah drei dlăng kơ Khua Yang, Pô brei klei ktang kơ drei, snăn drei srăng dưi găn klei lông dlăng leh anăn jhŏng hưn bi sĭt kơ Khua Yang.
Si klei bi mlih drei čiăng mâo, čiăng dưi bi hlơr nanao ai tiê klei mĭn kơ bruă hưn bi sĭt kơ Khua Yang?
Wah lač: Ơ Ama Doh jăk, jŭm dar kâo adôk lu lĭn mnuih ka thâo kral Khua Yang. Akâo Khua Yang brei klei pap leh anăn klei ktang čiăng kơ kâo dưi găn jih jang klei lông dlăng, bi hlơr nanao ai tiê klei mĭn kơ bruă hưn bi sĭt kơ jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
