II Timautes 1:6-9
Nqe cim:
“Rau qhov tus Ntsujplig uas Vajtswv pub rau peb yeej xav kom peb muaj lub siab tawv. Nws yuav ua haujlwm rau hauv peb lub siab kom peb muaj hwjchim, kom muaj lub siab hlub lwm tus, thiab kom peb paub tswj peb lub siab.” (II Timautes 1:7)
Lus nug rau sawvdaws xav:
– Timthawj Paulus txhawb Timautes zog yam dabtsi thaum ntsib kev nyuaj, sim siab?
– Lub tswvyim twg ua rau Timautes txaus siab hlo tiv txomnyem, rhaub dua kev ua haujlwm thiab ua timkhawv?
– Yuav ua li cas peb thiaj tiv dhau tej kev sim siab kom peb muaj zog khov kho mus ua timkhawv txog tus Tswv?
Timthawj Paulus nyob hauv tsev lojcuj sau tsab ntawv no xa mus rau tus xibhwb hluas Timtautes uas tabtom saib Pawg Ntseeg Efexus, Paulus txhawb kom Titmautes rau siab ua haujlwm txawm yog yuav raug kev txomnyem, sim siab thaum txhim kho Pawg Ntseeg thiab ua timkhawv txog tus Tswv. Paulus ntuas Timautes cia li tshuab kom cig cuab taws koob hmoov uas Vajtswv pub rau nws tau thaum uas Paulus tsa tes thov Vajtswv rau nws, tsis txhob “poob siab” tiamsis cia li ua timkhawv los ntawm lub siab “tawv qhawv, hlub, thiab tswj siab”. “Poob siab” yog ib qhov uas thaiv txojkev ua timkhawv. Tus qhia tsis ruaj siab vim ntshai thuam, tawmtsam, tsimtxom. Thiab vim peb tsis nco tias Vajtswv yog tus pub lub zog, kev hlub thiab tswj tus kheej kom tiv dhau tej kev sim siab, nyob ua timkhawv rau tus Tswv. Cov ntseeg Yexus tsis txhob muab lub zog koob hmoov zais cia hauv yus tiamsis cia li qhib tus Tswv txoj koob hmoov los ua Nws tes haujlwm, tshwjxeeb yog rau siab ntso ua timkhawv txog tus Tswv zaj los ntawm lub siab hlub thiab tswj tus kheej.
Timthawj Paulus kuj ntuas Timautes tsis txhob txajmuag qhov uas Paulus raug kaw, rau qhov Paulus tsis yog raug kaw vim ua txhaum cai, tiamsis “vim kuv qhia Txojmoo Zoo” (II Timautes 2:9). Qhov no yog yam uas tsimnyog khav tsis yog kev txajmuag. Peb txhua tus yuav tsum nco ntsoov, Vajtswv tsis yog cawm peb xwb, Nws tseem hu peb los ua tes haujlwm raws li Nws lub homphiaj thiab txoj koob hmoov pub. Yog li ntawd, txawm yog lub tsamthawj yuav zoo li cas los xij, dab ntxwgnyoog yuav siv tswvyim tav li cas, qee zaus yuav raug kaw zoo li Paulus, los yuav tsum zoo siab hlo tiv txomnyem, rhaub dua lub siab ua haujlwm thiab ua timkhawv rau tus Tswv.
Vim tibneeg tus yamntxwv yog neeg txhaum, cov ntseeg yuav tsum lees paub tias peb pheej muaj qhov kev txajmuag qhia txog tus Tswv thiab Nws Txojmoo Zoo. Timthawj Petus twb tsis lees paub tus Tswv peb zaug thaum txhawj ntshai thiab txajmuag qhov uas tus Tswv raug ntes. Yog li tej kev sim siab thaiv peb txoj hau kev ua timkhawv txog tus Tswv nws tsis yog dab ntxwgnyoog thiab lub hwjchim tsaus ntuj xwb, tej zaum yog tej kev sim hauv peb tus neeg qub tuaj thiab. Cia kom tiv dhau kev sim siab ntawm kev mus ua timkhawv, peb txhua tus yuav tau vamkhom lub zog ntawm Vaj Ntsujplig pub, qhov no yuav ua rau peb muaj zog thiab tswj tau tus kheej. Thaum saib tus kheej muaj nqis, peb yuav qaug zog mus, tiamsis thaum vamkhom tus Tswv, tus uas pub zog loj rau peb ces peb yuav tiv dhau kev sim mus ua timkhawv rau tus Tswv khov kho.
Thov Vajtswv,
Leej Txiv tus uas dawbhuv, nyob ib ncig ntawm nyuam yaus muaj coob leej tsis tau paub txog Koj. Thov Koj pub koob hmoov thiab lub zog rau nyuam yaus kom nyuam yaus tiv taus dhau tej kev sim siab, rov rhaub lub siab kub lug mus ua timkhawv qhia txhua tus. Nyuam yaus tuav Tswv Yexus lub npe thov, Amees.
Peb cheemtsum muaj qhov kev hloov tshiab twg kom niaj hnub rhaub peb lub siab mus ua timkhawv rau tus Tswv?
Nyeem Vajluskub hauv peb lub xyoo: I Xamuyees 4
Kênh Youtube BHKTHN:
