Klei Aê Diê Blŭ: II Têsalônik 2:15-17
Êlan kliăng: “Snăn Ơ phung ayŏng adei, dôk kjăp bĕ leh anăn djă pioh klei bhiăn hmei mtô leh kơ diih, thâodah hŏng klei hmei blŭ amâodah hŏng hră hmei mơĭt” (II Têsalônik 2:15)
Klei êmuh ksiêm mĭn: Khua ƀĭng kna Y-Pôl mtă kơ phung đăo ti ƀuôn Têsalônik si ngă srăng bi êdah kơ klei mĭn klei đăo kơ Krist? Ti anôk atur klei mĭn klei đăo kơ Krist digơ̆ kna? Drei mâo klei mtrŭt si ngă srăng djă pioh kjăp klei drei mĭn klei đăo kơ Krist?
Leh hưn kơ phung đăo ti ƀuôn Têsalônik mâo leh klei Aê Diê ƀuăn rơ̆ng dưi mă tŭ klei bi mtlaih sĭt nik kyuadah digơ̆ đăo leh kơ “klei sĭt nik”, Khua ƀĭng kna Y-Pôl mtă kơ phung đăo djă pioh kjăp nanao klei digơ̆ mĭn kơ klei đăo kơ Krist, kyuadah digơ̆ dôk bi tlă anăp amâo djŏ knŏng hjăn klei arăng ngă jhat ôh ƀiădah wăt klei mtô klei đăo soh mơh. Kyuanăn čiăng dưi djă pioh kjăp klei mĭn klei đăo pô, Khua ƀĭng kna Y-Pôl mtă: “Dôk kjăp bĕ leh anăn djă pioh klei bhiăn hmei mtô leh kơ diih, thâodah hŏng klei hmei blŭ amâodah hŏng hră hmei mơĭt” (êlan 15).
Êlâo hĭn, brei digơ̆ “dôk kjăp”, čiăng lač ti anăp klei arăng ngă jhat, brei digơ̆ djă pioh klei đăo amâo mâo mlih ôh, kăn êdu ai rei. Tal dua, brei digơ̆ “djă pioh klei bhiăn…”, anăn jing atur kơ klei đăo sĭt Khua ƀĭng kna Y-Pôl pô tuôm bi hriăm leh, leh anăn ñu lŏ mtô kơ digơ̆ hŏng klei blŭ amâodah hŏng hră mơĭt.
Dleh snăk tơdah mgô̆ brei phung đăo djă pioh kjăp klei mĭn kơ klei digơ̆ đăo kơ Krist tơdah amâo mâo sa boh atur kjăp čiăng kơ digơ̆ knang ôh. Kyuanăn yơh, hŏng klei wah lač hlăm êlan 16-17, Khua ƀĭng kna Y-Pôl brei ƀuh atur čiăng kơ phung đăo ti ƀuôn Têsalônik djă pioh kjăp klei mĭn klei digơ̆ đăo kơ Krist jing akŏ klei ktang mơ̆ng Khua Yang Yêsu Krist leh anăn mơ̆ng Aê Diê Ama pô brei. Ñu jing akŏ kơ jih jang klei jăk mơak, jing Pô khăp kơ digơ̆, mă klei pap brei kơ digơ̆ mâo klei bi juh hlŏng lar leh anăn klei čang hmăng jăk. Jih jang klei anăn jing mnơ̆ng mtrŭt mjhar brei digơ̆ dôk kjăp hlăm djăp mta klei truh, čiăng kơ digơ̆ dưi blŭ jih jang klei blŭ jăk leh anăn ngă djăp mta bruă jăk čiăng bi mđĭ klei đăo kơ lu mnuih, bi đru čiăng dưi dôk kjăp hlăm Khua Yang.
Satan duah nanao lu êlan, yua djăp mta hdră čiăng bi kdơ̆ng hŏng phung đăo kơ Krist leh anăn bi lĕ buh drei ktuê êlan tui hlue Khua Yang. Kyuanăn, Klei Aê Diê Blŭ mtrŭt brei grăp čô phung đăo djă pioh kjăp klei mĭn klei đăo kơ Krist, jing klei arăng mtô leh kơ drei, klei drei tuôm hriăm leh anăn hmư̆ leh mơ̆ng mphŭn dơ̆ng kna ti atur Klei Aê Diê Blŭ. Dôk kjăp bĕ hlăm klei đăo, gưt kơ Klei Khua Yang Blŭ, thâo blŭ klei jăk, jih ai tiê ngă bruă jăk wăt tơdah dôk hlăm klei hơ̆k mơak amâodah hlăm klei knap mñai. Brei grăp čô phung anak čô Khua Yang đru bi mđĭ ai, bi juh hdơ̆ng ayŏng amai adei kyuadah thâo phung đăo kơ Khua Yang jing phung Khua Yang khăp, sĭt nik srăng dưi dôk hlăm akŏ klei jăk jĭn Aê Diê brei.
Si ngă drei jhŏng djă pioh kjăp klei mĭn klei đăo kơ Krist hlăm djăp mta klei truh, leh anăn bi juh pô mkăn mơ̆?
Wah lač: Ơ Aê Diê Pô jăk, Klei Ih Blŭ brei kâo thâo kral klei kâo êdu awăt. Akâo Ama thiăm ai mrâo kơ kâo grăp hruê čiăng kơ kâo dưi djă pioh kjăp klei mĭn klei đăo kơ Krist. Đru kâo thâo đru wah lač brei, bi mđĭ ai leh anăn bi juh phung ayŏng adei čiăng digơ̆ djă pioh klei đăo kơ Ih tơl truh ti hruê bi tui. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
