II Thexalaunikes 2:15-17
Nqe cim:
“Yog li ntawd cov kwvtij, nej yuav tsum muab siab rau ntseeg tsis txhob tso tseg. Thiab nej yuav tsum khaws tej lus uas peb twb qhia rau nej lawm cia, tsis hais tej uas peb qhia nej thaum peb tseem nrog nej nyob, thiab tej uas peb sau rau hauv ntawv, nej yuav tsum khaws tej ntawd huv tibsi.” (II Thexalaunikes 2:15)
Lus nug rau sawvdaws xav:
– Timthawj Paulus ntuas cov ntseeg hauv Thexalaunikes yuav tsum tuav ruaj yam lawv paub licas?
– Qhov chaw txawb ntawm tej uas tus ntseeg paub yog dabtsi?
– Peb tau txhawb zog tuav ruaj yam yus paub licas?
Tomqab uas hais khov kho hais tias cov ntseeg hauv Pawg Ntseeg Thexalaunikes tau Vajtswv ua tabpov ruaj khov yuav tau txais kev cawmdim vim lawv “ntseeg qhov tseeb”, Timthawj Paulus ntuas cov ntseeg yuav tsum tuav ruaj yam uas lawv paub vim lawv tsis yog tsuas ntsib tej kev tsimtxom xwb, tseem yuav ntsib tej kev ntseeg cuav haubntxias thiab. Yog li ntawd yuav kom tuav tau yam lawv paub, Timthawj Paulus qhuab ntuas hais tias: “Yog li ntawd cov kwvtij, nej yuav tsum muab siab rau ntseeg tsis txhob tso tseg. Thiab nej yuav tsum khaws tej lus uas peb twb qhia rau nej lawm cia, tsis hais tej uas peb qhia nej thaum peb tseem nrog nej nyob, thiab tej uas peb sau rau hauv ntawv, nej yuav tsum khaws tej ntawd huv tibsi” (nqe 15).
Yam xubthawj, lawv yuav tsum “muab siab rau ntseeg tsis txhob tso tseg”, txhais tau hais tias thaum raug tsimtxom, lawv yuav tsum tuav ruaj kev ntseeg, tsis poob siab, tsis qaug zog. Yam thib ob, lawv yuav tsum “khaws tej lus” uas lawv tau hnov lawm tseg cia, ntawd yog lub plag kev ntseeg tseeb uas Timthawj Paulus tau qhia rau lawv dhau ntawm nws tej lus qhia tim ntsej tim muag lossis qhia dhau tej tsab ntawv nws sau mus rau lawv.
Yuav khwv heev thaum yuam kom cov ntseeg yuav tsum tuav ruaj yam lawv paub yog hais tias tsis muaj ib qhov chaw txawb ruaj khov twg kom lawv ntseeg siab. Vim li ntawd, dhau ntawm tej lus thov Vajtswv hauv nqe 16-17, Timthawj Paulus qhia pom txog lub chaw txawb ruaj khov pab kom cov ntseeg hauv Pawg Ntseeg Thexalaunikes tuav ruaj lawv txojkev ntseeg yog los ntawm lub zog uas Tswv Yexus Khetos thiab Vaj Leej Txiv muab pub. Nws yog lub hauvpaus ntawm txoj koobhmoov, yog Tus hlub lawv, pub rau lawv muaj kev cia siab mus li. Tej lus ntawd dhau los ua lub zog pab kom lawv sawv khov kho txhua lub tsamthawj, kom lawv hais thiab ua tau txhua yam haujlwm zoo txhawb lwm tus txojkev ntseeg, sib pab sawv ruaj hauv tus Tswv.
Xatas niaj hnub nrhiav txhua txoj haukev, siv txhua tus neeg los tawmtsam cov ntseeg Yexus kom peb qaug zog hauv txojkev nrog tus Tswv mus. Vim li ntawd, Vajtswv Txojlus txhawb txhua tus ntseeg lub zog yuav tsum tuav ruaj yam uas yus paub, yog tej uas peb twb tau qhia, tau kawm, tau hnov puag thaum xubthawj raws li Vajluskub. Cia li sawv ruaj hauv txojkev ntseeg, ua raws li Vajtswv Txojlus qhia, npaj siab ntsoov hais tej lus zoo, tas siab ua tej haujlwm zoo hauv txhua lub tsamthawj tsis hais thaum tau zoo thiab txomnyem. Tus Tswv cov menyuam cia li sib txhawb zog, sib nplig siab vim paub hais tias cov ntseeg yog cov uas tau tus Tswv hlub, paub tseeb hais tias peb yuav tau txais txoj koobhmoov zoo uas tus Tswv pub rau peb.
Thov Vajtswv,
Tus Tswv uas muaj kev hlub, Koj Txojlus qhia nyuam yaus paub txog tus kheej tej kev qaug zog. Thov Koj ntxiv zog rau nyuam yaus txhua hnub kom tuav ruaj yam nyuam yaus twb ntseeg los lawm. Thov pab nyuam yaus paub thov Vajtswv pab, txhawb zog thiab nplig lwm tus siab kom sawvdaws tuav ruaj txojkev ntseeg mus txog hnub kawg. Nyuam yaus tuav Yexus Khetos lub npe thov, Amees.
Peb puas npaj txhij tuav ruaj yam yus paub hauv kev ntseeg txhua lub tsamthawj thiab Nyeem Vajluskub hauv peb lub xyoos: II Kevcai 24
Kênh Youtube BHKTHN:
