Yausuas 5:9-12
Nqe cim:
“Nws hais tias: Nej cia li tseg kiag tsis txhob sib tua, nej yuav tsum paub hais tias kuv yogVajtswv, tus uas kav txhua haivneeg thiab kav lub ntiajteb no huv tibsi.” (Ntawv Nkauj 46:10).
Lus nug rau sawvdaws xav:
– Qhov uas qhia tus Tswv haivneeg ua Kevcai Hla Dhau muaj lub ntsiab licas?
– Kevcai Hla Dhau qhuab ntuas tus Tswv haivneeg txog yam dabtsi?
– Yuav uacas peb thiaj sawv ruaj khov thaum ntsib teebmeem, kev sim siab kom ua tau lubneej rau tus Tswv tau koobmeej?
Vajtswv rov hais kom Yausuas ua Kevcai Hla Dhau. Kevcai Hla Dhau tau rhawv tsim thaum cov Yixalayees tawm hauv tebchaws Iziv los, ua nco txog zaj xwm cov timtswv tseg tsis tua cov Yixalayees tej tub hlob thaum pom muaj ntshav pleev rau ntawm tej puab qhov rooj (Khiavdim 12:27). Vajtswv qhuab ntuas cov Yixalayees kom lawv nco ntsoov hais tias lawv yog Nws haivneeg, thiab Nws kuj xav qhia lawv nco txog tej uas Nws tau ua rau lawv lawm.
Kevcai Hla Dhau qhuab ntuas tus Tswv haivneeg txog ib tug Vajtswv uas muaj hwjchim. Tej zaug thaum pom tej nroog thiab tej yeebncuab nyob hauv Kana-as, yuav ua rau coobleej txhawj ntshai, tiamsis Kevcai Hla Dhau qhuab ntuas lawv txhob muab Vajtswv tes haujlwm kaw rau hauv lawv tej kev xav nqaim. Niaj hnub nimno tej zaug peb tabtom txhawj rau ntau yam, tshwjxeeb yog thaum ntsib ntau yam kev sim siab thaum ua neej ntseeg nrog neeg ntiajteb, tiamsis yuav tsum nco ntsoov hais tias Vajtswv tus uas muaj hwjchim tabtom tswjkav txhua yam.
Kevcai Hla Dhau qhuab ntuas tus Tswv haivneeg hais tias Vajtswv yog tus cawm lawv dim, yog tsis li ntawd, ces nimno lawv tseem tabtom ua qhev hauv tebchaws Iziv. Ib yam nkaus li ntawd, yog Vajtswv tsis cawm ces nimno peb kuj tabtom ua qhev rau kev txhaum (Efexus 2:1-3). Lub hwjchim loj tshajplaws uas Vajtswv pub yog kev cawmdim. Muaj neeg pheej nrhiav txujci tseemceeb, tiamsis zaj txujci tseemceeb loj tshajplaws ces yog txojkev cawmdim uas tus Tswv pub rau txhua tus uas txais yuav Nws thiab yog peb lubneej uas tau pauv hloov lawm. Cia li ua neej los ntawm nplooj siab nco tus Tswv txiajntsig thiab cia siab rau tus Tswv thaum ntsib kev sim siab hauv lubneej.
Kevcai Hla Dhau qhuab ntuas tus Tswv haivneeg nco ntsoov hais tias txhua yam uas lawv muaj yog tus Tswv muab pub. Kev tiv thaiv cov Yixalayees tej tub hlob thiab coj lawv tawm hauv tebchaws Iziv los puavleej yog tus Tswv tes haujlwm. Yam uas lawv ua ces tsuas yog ua raws tus Tswv tej lus, muab ntshav pleev rau ob tug ncej qhovrooj thiab saum hau qhovrooj xwb. Thaum tej haivneeg thiab tej vajntxwv hauv tebchaws Kana-as pom cov Yixalayees hla dhau tus dej Yauladees, lawv hais tias ntawd yog tej uas “tus TSWV ua” (Yausuas 5:1).
Kabmob kis Covid thoob ntiajteb ua rau tibneeg pom txog lawv txojkev qaug zog tabmeeg ib tug kab virus uas me heev, thiab txhua tus yuav tsum txo hwjchim tabmeeg tus Tswv. Tej uas peb thiab Pawg Ntseeg tabtom muaj yog Vajtswv tes haujlwm, thiab yam uas peb yuav tsum ua thaum xav txog tej yam zoo ntawd ces tsuas yog txo hwjchim nyo hau pehawm, ua tus Tswv tsaug, thiab ua Nws haujlwm kawg siab kawg ntsws (I Kauleethaus 15:10). Thaum ntsib tej kev sim siab thaum ua neej ntseeg nrog neeg ntiajteb, yog peb pheej sawv ruaj hauv txojkev ntseeg, pheej nco txog tus Tswv lub hwjchim tau ua rau peb lubneej ces peb yuav khov kho thaum ntsib teebmeem, kev sim siab, ua tau lubneej rau tus Tswv tau koobmeej.
Thov Vajtswv,
Tus Tswv, thov pab nyuam yaus niaj hnub pom tej txujci uas Koj ua thiab ruaj siab nrog Koj mus thaum ntsib kev sim siab hauv lubneej. Nyuam yaus tuav Yexus Khetos lub npe thov, Amees.
Peb ntuas tus kheej nco txog Vajtswv tes haujlwm zoo licas?
Nyeem Vajluskub hauv peb lub xyoos: II Kevcai 9
Kênh Youtube BHKTHN:
