Klei Aê Diê Blŭ: Y-Yôsuê 5:9-12
Êlan kliăng: “Dôk ñăt bĕ, leh anăn brei ih thâo kơ Kâo jing Aê Diê. Kâo srăng mâo klei mpŭ mơ̆ng phung găp djuê, Kâo srăng mâo klei mpŭ hlăm lăn ala.” (Klei Mmuñ Hđăp 46:10)
Klei êmuh ksiêm mĭn: Ya klei mblang kơ bruă mtô phung ƀuôn sang Aê Diê ngă Knăm Klei Găn? Ya klei Knăm Klei Găn mñă kơ phung ƀuôn sang Aê Diê? Si drei ngă čiăng dưi dôk kjăp ti anăp jih jang klei truh dleh dlan, ăt hdĭp bi guh kơang kơ Anăn Khua Yang nanao?
Aê Diê ăt lŏ mtă kơ Y-Yôsuê ngă knăm klei Găn. Knăm Klei Găn mkŏ mjing hlăk phung ƀuôn sang Aê Diê kbiă mơ̆ng čar Êjip čiăng bi hdơr kơ klei dĭng buăl jăk Aê Diê amâo bi mdjiê ôh anak êkei tal êlâo phung Israel tơdah ƀuh êrah mmia ti msơ̆ng ƀăng bhă sang (Klei Kbiă 12:27). Aê Diê mñă leh kơ diñu jing phung ƀuôn sang Aê Diê, leh anăn Ñu ăt čiăng mñă mơh jih jang bruă Aê Diê ngă leh kơ diñu.
Knăm Klei Găn mñă phung ƀuôn sang Aê Diê kơ Aê Diê Pô Myang. Năng ai tơdah tlă anăp hŏng lu lĭn ƀuôn prŏng kjăp leh anăn phung roh ti Kanaan, lu mnuih dôk huĭ hyưt, ƀiădah Knăm Klei Găn mñă diñu đăm bi knhal hĕ ôh bruă Aê Diê ngă tui si kdriêl knhal drei pô. Hruê anei năng ai drei dôk rŭng răng uêñ mĭn kơ lu mta bruă, boh nik nak tlă anăp hŏng lu klei lông dlăng hlăm ƀuôn sang tơdah hdĭp klei hdĭp đăo ti krah lăn ala, ƀiădah brei hdơr Aê Diê Pô Myang dôk kiă kriê jih jang klei.
Knăm Klei Găn mñă kơ phung ƀuôn sang Aê Diê snei Aê Diê bi mtlaih leh diñu, tơdah amâo djŏ snăn, mmông anei diñu ăt adôk jing hlŭn ti čar Êjip, ăt msĕ snăn mơh, tơdah Aê Diê amâo bi mtlaih ôh, snăn hruê anei drei ăt jing hlŭn kơ klei soh msĕ mơh (Êphêsô 2:1-3). Klei myang prŏng hĭn Aê Diê brei jing klei bi mtlaih yơh. Mâo mnuih tui duah nanao klei myang yơh, ƀiădah klei myang prŏng hĭn jing klei bi mtlaih Aê Diê brei kơ hlei pô đăo kơ Ñu leh anăn klei hdĭp drei mâo klei bi mlih. Hdĭp nanao bĕ hŏng klei hdơr knga leh anăn đăo knang kơ Khua Yang ti anăp klei lông dlăng mơ̆ng klei hdĭp.
Knăm Klei Găn mñă kơ phung buôn sang Aê Diê snei, jih jang ya mta mnơ̆ng diñu dôk mâo jing mơ̆ng Aê Diê brei sơăi. Bruă răng mgang anak êkei tal êlâo phung ƀuôn sang Israel leh anăn bi kbiă diñu mơ̆ng čar Êjip, kluôm dhuôm jing bruă Aê Diê ngă leh. Knŏng sa mta klei brei diñu ngă, anăn jing klei gưt asăp Aê Diê mmia êrah ti msơ̆ng ƀăng bhă. Tơdah phung ƀuôn sang leh anăn phung mtao hlăm čar Kanaan ƀuh phung Israel găn êa krông Yurdan, diñu lač leh, anăn jing bruă “Yêhôwa ngă leh” (Y-Yôsuê 5:1).
Klei ruă tưp prŏng Covid tar lăn ala, brei phung mnuih thâo kral klei hơăi mang pô, amâo dưi ngă ôh ti anăp sa drei virus điêt dhiêt, leh anăn brei jih jang mnuih luă gŭ ti anăp Khua Yang. Jih jang ya mta mnơ̆ng drei leh anăn Phung Sang Aê Diê dôk mâo jing bruă Aê Diê ngă sơăi, bi drei knŏng brei ngă hĕ sa mta klei tơdah dlăng wĭt kơ jih jang klei jăk siam, anăn jing bi luă gŭ ai tiê pô kkuh mpŭ, bi mni kơ Khua Yang, leh anăn hŏng jih ai tiê mă bruă kơ Khua Yang (I Kôrantô 15:10). Ti anăp klei lông dlăng mơ̆ng ƀuôn sang tơdah hdĭp klei hdĭp đăo ti krah lăn ala, tơdah drei ăt dôk kjăp hlăm klei đăo, lŏ bi hdơr jih klei myang yuôm bhăn Khua Yang ngă leh hlăm klei hdĭp drei, snăn ktang hĭn mơh dôk kjăp ti anăp klei truh dleh dlan čiăng dưi hdĭp bi guh kơang kơ Anăn Khua Yang nanao.
Si drei mñă kơ drei pô bruă Aê Diê ngă?
Wah lač: Ơ Khua Yang, brei kâo thâo ƀuh nanao bruă yuôm bhăn Ih ngă, leh anăn dôk kjăp êbat mbĭt hŏng Ih hlăm jih jang klei truh hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
