Klei Aê Diê Blŭ: Klei Bi Hriêng 7:6-7
Êlan kliăng: “Anak kâo, djă pioh klei kâo blŭ, leh anăn mă pioh hlăm ai tiê ih klei kâo mtă.” (Klei Bi Hriêng 7:1)
Klei êmuh ksiêm mĭn: Hlei phung mnuih ama ƀuh? Ya knuih phung mnuih anei jing? Ya hdră êlan Mtao Y-Salômôn brei kơ drei čiăng dưi tlaih klei mplư, boh nik nak klei mplư êkei mniê?
Mtao Y-Salômôn čih dua păn kdrêč tal êlâo kơ hdruôm hră Klei Bi Hriêng hŏng rup ama mtô lač kơ anak ñu pô, leh anăn tinei kñăm kơ klei mplư kơ klei êkei mniê. Êlâo hĭn ama lač kơ phung lĕ hlăm klei mplư, ñu pia kơ phung anăn jing “phung mluk”, čiăng lač kơ phung kƀah klei thâo săng, kƀah klei ksiêm dlăng. Boh blŭ anei kbiă hriê mơ̆ng sa boh blŭ mblang jing “pŏk”, brei ƀuh phung hlăk ai anei phưi pŏk nanao jih klei diñu ruah, amâo mâo sa mta klei ƀuăn rơ̆ng ôh, leh anăn mĭndah diñu čiăng ksiêm duah klei hdĭp, brei lông čiăng thâo. Anei jing klei hngah kơ klei mtô lač, amâo mâo ƀuăn rơ̆ng ôh hŏng klei gưt klei bhiăn leh anăn klei mtă, ƀiădah knŏng čiăng tui duah klei mrâo nanao. Phung anei khăng mâo knuih msĕ snei: hđeh, mda, kƀah thâo săng, ƀiădah lĕ êbeh klei knang kơ diñu pô, yap kơ diñu thâo săng jih djăp mta klei, dưi ksiêm jih jang klei.
Leh anăn “hlăm phung mluk… sa čô êkei amâo mâo klei mĭn ôh”. Dưi ƀuh, mnuih “amâo mâo klei mĭn ôh” ngă mah jiăng hŏng “phung mluk” nanao yơh. Kyuadah “êkei hlăk ai” anei “amâo mâo klei mĭn ôh” snăn yơh ñu dôk mbĭt “hlăm phung mluk” amâodah kyua ñu dôk “hlăm phung mluk” snăn yơh mjing ñu mnuih “amâo mâo klei mĭn ôh”? Năng ai jih dua boh klei anăn jing djŏ sơăi! Djŏ mơ̆ anei jing phung mah jiăng mtao Y-Rôbôam, phung bi mguôp ngă bi rai klei hdĭp mtao wăt ƀuôn ala mtao ama jao brei kơ ñu (I Bruă Mtao 12:8-11). Klei Mtao Y-Salômôn hmăng hmưi leh anăn mtă mtăn kơ anak jing, mđing hmư̆ bĕ klei mtô lač mơ̆ng ñu leh anăn ruah phung thâo mĭn ngă mah jiăng, ƀiădah boh klei sĭt mtao Y-Rôbôam amâo čiăng mđing hmư̆ ôh, ñu ruah phung hlăk ai, mgao, leh anăn mluk ngă ƀĭng găp.
Drei ƀuh mâo tlâo klei hriăm yuôm leh anăn ăt jing hdră êlan čiăng dưi găn klei lông dlăng tơdah klei mplư truh. Tal sa, mâo đa đa mta klei knŏng phung thâo mĭn dưi thâo ƀuh. Ama amâo knŏng ƀuh phung hlăk ai, ƀiădah wăt thâo kral diñu jing phung mluk leh anăn kƀah klei thâo săng. Ama amâo knŏng ƀuh êlan diñu nao, ƀiădah wăt thâo kral srăng atăt truh kơ klei djiê. Kyuanăn, klei mđing hmư̆ mơ̆ng phung prŏng khue hlăm klei hdĭp mngăt leh anăn huĭ mpŭ kơ Aê Diê jing yuôm. Tal dua, hdĭp bĕ nanao hlăm klei luă gŭ. Phung mgao amâo srăng mđing hmư̆ ôh, leh anăn kyua klei anăn yơh bi luč mmông găl dưi hmư̆ klei hưn êlâo brei răng. Sa čô ung mâo djăp klei luă gŭ čiăng hmư̆ klei mô̆ ñu hưn êlâo brei răng kơ phung mniê jŭm dar ñu mơ̆? Đăm mĭn ôh anei knŏng jing klei mplư kơ phung hlăk ai, ƀiădah wăt kơ phung khua thŭn leh ăt ênưih mơh lĕ hlăm klei mluk anei. Tal tlâo, răng bĕ tơdah ruah mah jiăng (I Kôrantô 15:33). Ngă mah jiăng bĕ hŏng phung mnuih jăk leh anăn huĭ mpŭ kơ Aê Diê.
Drei tuôm mơ̆ mĭndah drei thâo jih djăp mta klei?
Wah lač: Ơ Khua Yang, akâo Ih brei kâo mâo ai tiê luă gŭ čiăng mđing hmư̆ Klei Aê Diê Blŭ leh anăn klei mtô lač mơ̆ng phung mnuih huĭ mpŭ kơ Ih, čiăng kơ kâo mâo klei thâo mĭn, ñĕ đuĕ kbưi kơ klei soh, dưi hĭn hŏng klei mplư. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
