Pajlug 7:6-7
Nqe cim:
“Metub, koj nco ntsoov kuv tej lus thiab khaws kuv tej lus cia rau nruab siab” (Pajlug 7:1)
Lus nug rau sawvdaws xav:
– Leej txiv saib pom pab neeg twg?
– Pab neeg ntawd muaj tus cwjpwm zoo li cas?
– Vajntxwv Xalumoos qhia rau peb txog tej tswvyim twg thiaj qaij tau kev dag ntxias, tshwjxeeb yog kev dag ntxias ntawm kev nkauj nraug?
Vajntxwv Xalumoos sau 9 tshooj Pajlug xubthawj yog lus qhuab ntuas zoo li leej txiv qhuab ntuas nws cov menyuam, kom ceevfaj txog kev dag ntxias mus ua kev nkauj nraug ntawm ib tug hluas. Xub thawj leej txiv hais txog pab neeg uas raug dag ntxias, nws hu lawv ua “pab tub hluas uas tsis tau paub qab hau”, ntawd yog hais txog cov neeg uas tsis tau paub qab hau thiab tsis tau txawj xav. Qhov ntawd qhia pom hais tias pab hluas no lawv yeej qhib dav rau kev xaiv, tsis muaj kev txwv rau ib qhov twg thiab thaum twg los lawv pheej xav hais tias yuavtsum tshawb nrhiav kev ua neej, yuav tsum sim kom paub. Pab neeg hluas no yog cov uas tsis txais yuav tej lus qhuab ntuas, tsis tswj tus kheej ua raws li kevcai thiab tej lus samhwm, tiamsis thaum twg twb xav nrhiav yam tshiab xwb. Pab neeg no muaj tus cwjpwm yog; cov hluas, tsis paub qab hau, tsis txhij txhua, tiamsis yog cov tso siab heev hais tias lawv paub tas txhua yam, thiab yuav tswj tau txhua yam huv tibsi.
Thiab “pab tub hluas uas tsis tau paub qab hau … muaj ib tug yog tus ruam tshaj cov”. Tus tub hluas ntawd tsis muaj kev totaub nws thiaj ua phoojywg nrog pab neeg uas tsis paub qab hau. Vim “tus tub hluas” ntawd “tsis muaj kev totaub” nws thiaj mus nyob nrog pab tub hluas uas tsis paub qab hau lossis nws ib txwm nrog pab hluas ntawd nws thiaj li dhau mus ua ib tug neeg ruam li ntawd. Tej zaum puavleej yog hais txog vajntxwv Lehaunpau-as cov phoojywg, lawv yog cov uas txo nws lub neej thiab lub tebchaws uas nws txiv tseg cia (1Vajntxwv 12:8-11). Qhov uas vajntxwv Xalumooos ntshaw, yog nws cov menyuam mloog lus, khaws nws tej lus qhuab ntuas cia thiab xaiv cov neeg txawjntse ua phoojywg, tiamsis qhov tseeb Lehaunpau-as tsis mloog li leej txiv qhia, nws mus xaiv pab neeg hluas, neeg khavtheeb thiab tsis paub qab hau los ua phoojywg.
Peb pom 3 zaj kawm tseemceeb lossis 3 lub tswvyim uas hla dhau kev sim siab thaum raug kev dag ntxias. Tim ib, muaj tej yam tsuas yog cov neeg uas twb ntsib lawm thiaj saib pom xwb. Leej txiv tsis yog pom ib pab neeg hluas xwb tiamsis nws tseem zeem paub hais tias lawv yog ib pab neeg ruam thiab tsis paub qab hau dabtsi li. Leej txiv tsis yog saib pom txoj kev uas lawv mus xwb tiamsis tseem paub hais tias txoj kev lawv mus ntawd coj mus rau kev tuag. Vim li ntawd, mloog cov uas paub Vajtswv thiab hwm Vajtswv lus yog qhov tseemceeb kawg nkaus. Tim 2, yuavtsum ua neej txo hwjchim rau qhov tus neeg khavtheeb yuav tsis txawj mloog lus thiab nws yuav tsis muaj sijhawm mloog tau lwm tus lo lus ceebtoom. Tus txiv puas txo hwjchim los mloog yus tus pojniam lolus ceebtoom txog yus cov phoojywg ib ncig ntawm yus? Txhob xav hais tias kev dag ntxias tsuas muaj rau cov hluas xwb, kev dag ntxias yuav muaj tagnrho rau cov laus thiab cov hluas ib yam nkaus, tej zaum cov laus tseem yoojyim poob rau kev ruam no thiab. Tim 3, yuavtsum ua tib zoo thaum xaiv phoojywg (1Kauleethaus 15:33). Yog li ntawd, ciali ua phoojywg nrog cov tibneeg zoo thiab hwm Vajtswv xwb. Txhob lam ua phoojywg nrog txhua tus tibneeg.
Thov Vajtswv:
Vajtswv, thov pab nyuam yaus txo hwjchim mloog Koj lus thiab mloog cov uas hwm Vajtswv tej lus qhia, kom nyuam yaus muaj lub siab ntse ntsuav, khiav deb kev txhaum, kovyeej kev dag ntxias. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Puas muaj tej zaum peb xav hais tias yus paub tas txhua yam lawm?
Nyeem Vajluskub hauv peb lub xyoos: Teev Npe 28
Kênh Youtube BHKTHN:
