Pajlug 7:10-20
Nqe cim:
“Ua koj lub neej li kuv qhia, koj thiaj yuav muaj sia ua neej nyob. Koj yuav tsum ua tib zoo mloog kuv tej lus qhia ib yam li koj txuag koj ob lub qhovmuag” (Pajlug 7:2)
Lus nug rau sawvdaws xav:
– Niam ntiav tes haujlwm thiab tus yamntxwv yog li cas?
– Niaj hnub nimno tej yam ntawd muaj tshwm li cas?
– Peb tau ceebtoom txog yam dabtsi rau kev ua neej hauv txhua hnub?
Niam ntiav tes haujlwm xubthawj yog nws xwb tim tawm mus nrhiav (nqe 10). Tus tub hluas tsis mus nrhiav tiamsis yog tus niam ntiav cimciv tuaj nrhiav txog tus tub hluas. Niaj hnub nimno muaj coob tus tsis ceevfaj, xav hais tias yus twb sawv khov lawm, tos nco tib pliag ntshis xwb twb poob rau kev nkauj nraug lawm. Lawv tsis nco qab hais tias dab Ntxwgnyoog yeej tsis nyob tos lawv mus mag nws lub vojhluas kev nkauj nraug, tiamsis nws yuav siv cov uas yog nws tug los nrhiav thiab dag ntxias lawv (1Petus 5:8). Yuavtsum ua tib zoo saib thiab zeem paub thiaj hla dhau kev dag ntxias.
Niam ntiav rub tus tub hluas lub siab los ntawm pom kev zoo nkauj sab nraud “tus niam ntiav ntawd hnav tsoos zoo zoo kom ntxim nyiam” (nqe 10). Tus pojniam no twb muaj txiv lawm (nqe 19) tiamsis tsis hnav tsoos tsho kom lwm tus zeem paub hais tias yog ib tug neeg laus, nws hnav tsoos tsho npog tsis tas nws lub cev kom rub tau tej txiv neej lub siab ntshaw, yog saib ces yuav ntxias kom peb mus ua kev txhaum. Yog li ntawd cov txiv neej uas ntseeg Vajtswv yuavtsum ceevfaj rau cov pojniam uas hnav tsoos tsho npog tsis tas nws lub cev thiab cov pojniam uas ntseeg Vajtswv yuavtsum hnav tsoos tsho kom npog tas yus lub cev thiaj tsis poob rau kev dag ntxias lwm tus ua txhaum.
Niam ntiav yog tus uas “npaj tej tswvyim dag ntxias” (nqe 10). Tus niam ntiav no nws khav nws lub cev rau neeg ntsia, tiamsis nws ho zais tej tswvyim phem rau hauv siab. Vajntxwv Xalumoos ntuas nws cov menyuam yuavtsum ua neeg txawjntse thiab khaws nws tej lus ntuas cia rau hauv siab (nqe 2) thiaj yuav pab tau lawv tawm ntawm tus pojniam uas “npaj tej tswvyim dag ntxias” txhais tes. Tus pojniam no txawm yog nws muaj txiv lawm los, nws yeej tsis ua neej phim li ib tus pojniam muaj cuab yig, nws tsim kev kub ntxhov, nws nrhiav nrw lwm tus deev (nqe 11-12). Ib tug pojniam ntseeg yuavtsum yog ib tug pojniam paub hwm tus Tswv (1Petus 3:1-4) thiaj tsis mag dab ntxwgnyoog lub vojhluas, thiab thiaj tsis ua rau lwm tus yuam kev ua txhaum.
Niam ntiav yog tus neeg ntsejmuag ncaj siab nkhaus. Tus pojniam ntawd hais txog kevcai tua tsiaj fij theej txhoj (nqe 14) kom dag tau tus tub hluas, tsis yog mus ua kev nkauj kev nraug xwb tiamsis tseem muaj ib pluag noj pluag haus qab heev. Vim hauv kevcai tua tsiaj theej txhoj tsuas fij ib feem tsawg rau Vajtswv xwb, cov nqaij uas seem muab rau cov neeg uas pehawm Vajtswv (Levis Kevcai 3 thiab 7). Vim nws tus txiv tsis nyob hauv tsev lawm nws thiaj dag ntxias tus tub hluas hais tias “Cia li nrog kuv mus! Wb yuav sib puag pw zoo siab ib hmos kaj ntug” (nqe 18-19). Ntawd yog tus cwjpwm ntawm tus neeg ntsejmuag ncaj siab nkhaus. Niaj hnub nimno kev ntseeg Vajtswv yuavtsum qhia tshwm los ntawm tes haujlwm; kev ua phoojywg, nrhiav nyiaj, khwv noj khwv haus … uas ncaj ncees rau Vajtswv. Yuavtsum nco ntsoov hais tias, Vajtswv xav kom peb muab peb lub cev fij dawbhuv pub rau Vajtswv thiab haum Vajtswv siab (Loos12:1). Peb txhua tus yuavtsum mloog raws li Vajtswv tej lus qhia, peb thiaj yuav hla dhau kev sim siab thaum uas ntsib kev dag ntxias.
Thov Vajtswv:
Vajtswv, thov pub nyuam yaus txawjntse ceevfaj dab ntxwgnyoog txoj kev dag ntxias, thiab thov pab nyuamyaus paub mloog Koj lus thiab khaws Koj tej lus qhuab ntuas cia kom nyuam yaus tawmtsam yeej kev dag ntxias tsis ua txhaum rau Koj. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Yuav ua li cas thiaj zeem paub tus neeg uas dag ntxias thiab ceevfaj tau?
Nyeem Vajluskub hauv peb lub xyoos: Teev Npe 29
Kênh Youtube BHKTHN:
