Klei Aê Diê Blŭ: Klei Bi Hriêng 28:2
Êlan kliăng: “Hlăm čar mâo klei bi kdơ̆ng mâo lu phung khua kiă kriê mdê mdê, ƀiădah hŏng mnuih thâo mĭn leh anăn thâo săng čar srăng dôk kjăp sui” (Klei Bi Hriêng 28:2)
Klei êmuh ksiêm mĭn: Ya klei srăng truh tơdah sa boh čar amâodah sa čô mnuih ngă soh? Si khua kiă kriê ba klei dôk kjăp jing? Si drei bi êdah klei thâo mĭn Aê Diê hlăm bruă klam drei grăp hruê?
Êlan klei bi hriêng anei kñăm kơ klei bi klăk plah wah klei amâo dôk kjăp hŏng klei dôk kjăp. Tơdah sa boh čar lui klei kpă ênô, ngă klei soh, klei rŭng răng srăng truh, klei anăn atăt kơ klei bi mlih khua kiă kriê nanao đrông. Sa boh “čar” amâodah sa krĭng lăn amâo mâo klei ênuah ênô srăng lĕ hlăm klei bi blah ngă kyua khua kiă kriê kƀah klei thâo mĭn. Phung khua kiă kriê srăng bi kah mbha phung, êlan hdră kiă kriê amâo mâo klă ôh, ngă kơ klei rŭng răng lar hĭn êjai. Klei bi hmô klă, msĕ si Mtao Y-Ahap, Mtao Manasê ngă kơ lăn čar diñu lĕ hlăm klei knap mñai. Klei bi kdơ̆ng hŏng Aê Diê amâo djŏ knŏng bi rŭng hjăn kơ phung ƀuôn sang ôh ƀiădah bi rŭng wăt kơ klei hdĭp pô leh anăn kơ gŏ sang pô mơh.
Ƀiădah “hŏng mnuih thâo mĭn leh anăn thâo săng čar srăng dôk kjăp sui.” Kyuadah Aê Diê jing akŏ kơ klei thâo mĭn (Klei Bi Hriêng 2:6) kyuanăn klei thâo mĭn kbiă mơ̆ng Ñu ba hriê klei êngeh, hdră kiă kriê klă leh anăn dôk kjăp sui. Sa čô khua kiă kriê amâodah sa čô mnuih đăo tơdah duah klei sĭt nik Khua Yang leh anăn êbat hlăm êlan Ñu, srăng jing pô Khua Yang yua ba hriê klei êđăp ênang leh anăn klei hơĭt kơ phung ƀuôn sang. Klei thâo mĭn anei amâo djŏ knŏng hjăn klei thâo săng anak mnuih ôh, ƀiădah wăt mdơ̆ng ti dlông atur klei huĭ mpŭ kơ Aê Diê leh anăn gưt asăp kơ Ñu mơh. Klei bi hmô klă jing, msĕ si Mtao Yôsia, Mtao Hêsêkia lŏ bi kơrŭ leh lăn čar, bi mtlaih leh phung găp djuê diñu mơ̆ng phung roh, leh anăn lăn čar diñu dôk kjăp sui thŭn.
Jing phung đăo kơ Krist, Khua Yang mtă brei drei hdĭp hŏng klei thâo mĭn ti krah lăn ala soh jhat anei. Wăt ti krah gŏ sang, hlăm Phung Sang Aê Diê amâodah ti krah phung ƀuôn sang brei drei mtrang wĭt klei êđăp ênang Aê Diê hlăm klei hdĭp doh jăk, luă gŭ leh anăn sĭt suôr. Mngăt drei knŏng dưi dôk kjăp sĭt tơdah ai tiê drei dưm djŏ hlăm klei Aê Diê čiăng. Hlăm Khua Yang Yêsu Krist, drei dưi mă tŭ amâo djŏ knŏng klei bi mtlaih ôh ƀiădah mă tŭ wăt klei thâo mĭn mơh čiăng kơ drei hdĭp hŏng klei djŏ. Ksiêm bĕ kơ anôk drei bi hmăi, kơ gŏ sang, kơ Phung Sang Aê Diê amâodah anôk drei mă bruă. Duah bĕ klei thâo mĭn mơ̆ng Aê Diê grăp hruê hlăm Klei Ñu Blŭ leh anăn wah lač hŏng jih ai tiê. Akâo Khua Yang đru drei ngă bruă hŏng klei thâo săng leh anăn jing akŏ ba hriê klei dôk kjăp kơ jih jang mnuih jŭm dar drei.
Drei dôk đru ba klei êđăp ênang leh anăn klei dôk kjăp hĕ amâodah drei ngă klei bi rŭng hlăm gŏ sang, hlăm ƀuôn sang drei?
Wah lač: Ơ Ama hlăm adiê, Ih jing Aê Diê kơ klei djŏ pruê̆ leh anăn klei êđăp ênang. Pap brei kơ kâo tơdah kâo lui wir êlan Ih leh anăn ngă klei bi rŭng hlăm klei hdĭp. Brei bĕ kơ kâo klei thâo săng leh anăn klei thâo mĭn mơ̆ng Klei Ih Blŭ. Đru kâo hdĭp hŏng klei thâo mĭn leh anăn sĭt suôr čiăng ba klei dôk kjăp leh anăn klei êđăp ênang kơ phung riêng gah kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
