Klei Aê Diê Blŭ: II Klei Yăl Dliê 23:20-21
Êlan kliăng: “Akâo kơ Khua Yang klei êđăp ênang brei kơ diih klei êđăp ênang nanao hlăm jih jang klei. Brei Khua Yang dôk mbĭt hŏng jih jang diih.”(II Têsalônik 3:16)
Klei êmuh ksiêm mĭn: Hlei phung atăt mtao Y-Jôas kơ sang mtao? Ya boh tŭ mâo tơdah Mtao Y-Jôas kiă kriê? Si ih ngă čiăng bi knal klei êđăp ênang Khua Yang dôk kiă kriê hlăm ai tiê ih?
Tơdah leh arăng bi mđua đuôn mtao mjing Y-Jôas jing mtao, leh anăn arăng bi mdjiê leh H’Athali, snăn phung khua kahan, phung arăng mpŭ, phung khua kiă kriê phung ƀuôn sang leh anăn jih jang phung ƀuôn sang mgrông Mtao Y-Jôas atăt kơ sang mtao brei dôk gŭ ti jhưng mtao. Ti knhal tuč mtao sĭt jing mtao leh, leh anăn pô plah mă jhưng mtao tŭ klei arăng bi mdjiê.
Mtao mniê H’Athali kiă kriê čar Yuđa năm thŭn (II Klei Yăl Dliê 22:12). Jih ênuk ñu kiă kriê, ñu mčhur phung ƀuôn sang lui wir Aê Diê, brei kkuh mpŭ kơ yang Baal. Mơ̆ng klei čih hlăm Klei Yăl Dliê kơ ênuk H’Athali kiă kriê bŏ hŏng klei jhat ƀai, bi huĭ leh anăn bi mdjiê, klei hdĭp bruă kđi čar leh anăn klei đăo čar Yuđa mâo klei rŭng răng nanao, phung ƀuôn sang Aê Diê amâo lŏ čiăng hdĭp ti gŭ klei pô plah jhưng mtao kiă kriê ôh, digơ̆ čiăng ƀuh sa čô mtao sĭt mơ̆ng găp djuê Mtao Y-Đawit tui si klei Aê Diê ƀuăn leh srăng kiă kriê phung ƀuôn sang Ñu. Kyuanăn truh hruê Aê Diê, digơ̆ sa ai ngă tui si hdră Khua ngă yang Y-Jêhôiđa dăp leh, mdlưh mtao mniê jhat ƀai anei leh anăn mjing sa čô pô năng brei jing mtao.
Boh tŭ mơ̆ng bruă mjing Y-Jôas jing mtao tui si klei Aê Diê ƀuăn leh jing “jih jang phung ƀuôn sang hlăm čar hơ̆k mơak”. Lu blư̆ hdruôm hră Klei Yăl Dliê blŭ djŏ kơ klei phung Israel hơ̆k mơak tơdah Aê Diê ngă bi sĭt klei Ñu čiăng (I Klei Yăl Dliê 29:9; II Klei Yăl Dliê 29:36). Hdruôm hră čih msĕ mơh kơ phung ƀuôn sang Aê Diê mâo klei êngiê, klei hơĭt, klei êđăp ênang tơdah digơ̆ ngă tui si klei Aê Diê čiăng (I Klei Yăl Dliê 4:40; 22:9; II Klei Yăl Dliê 14:4-5). Phung ƀuôn sang amâo lŏ kkuh mpŭ kơ rup yang Baal ôh, hŏng klei hơ̆k mơak digơ̆ kkuh mpŭ kơ Aê Diê hdĭp leh anăn mâo klei êđăp ênang. Klei anăn bi êdah klă kơ Aê Diê brei klei jăk jĭn kơ digơ̆ tơdah sa čô mnuih Aê Diê ruah sĭt jing mtao kiă kriê ƀuôn ala mtao.
Drei msĕ mơh dôk hdĭp hlăm ênuk lăn ala mâo lu klei rŭng răng hlăm lu mta klei, klei bi blah ngă, êngĭn êbŭ, êa lip, klei ruă tưp…Knŏng tơdah Yang Krist, Khua kơ klei êđăp ênang, mŭt dôk sĭt ti jhưng mtao ai tiê grăp čô drei snăn kơh drei dưi mâo “klei êđăp ênang Aê Diê êgao hĭn kơ jih jang klei thâo săng” kiă kriê ai tiê leh anăn klei mĭn drei (Philip 4:7). Tơdah drei brei klei uêñ hnĭng, klei dleh dlan klei hdĭp anei bi bŏ hlăm ai tiê klei mĭn drei, snăn Khua Yang jing Khua kơ klei êđăp ênang amâo dưi jing khua kơ klei hdĭp drei sĭt ôh. Jao bĕ kơ Khua Yang jih jang klei drei uêñ hnĭng (I Y-Pêtrôs 5:7) čiăng dưi bi knal klei êđăp ênang Ñu brei (II Têsalônik 3:16).
Yang Krist, Mtao kơ jih jang mtao mŭt dôk sĭt leh ti jhưng mtao ai tiê drei mơ̆?
Wah lač: Ơ Khua Yang, kâo jao jih klei kâo uêñ hnĭng kơ Ih čiăng mâo klei êđăp ênang hlăm ai tiê leh anăn klei mĭn măng ai ya klei truh dưn. Akâo kơ Ih Khua kơ klei êđăp ênang mŭt dôk hlăm ai tiê kâo leh anăn jing Khua kơ klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
