2 Xwmtxheej Vajntxwv 23:20-21
Nqe cim:
“Thov tus Tswv uas yog lub hauvpaus ntawm txojkev kaj siab, pub txojkev kaj siab rau nej txhua lub sijhawm thiab txhua qhov uas nej mus. Thov tus Tswv nrog nraim nej sawvdaws nyob” (2 Thexalaunikes 3:16).
Lus nug rau sawvdaws xav,
– Leejtwg coj Yau-as los rau hauv vajntxwv lub loog?
– Qabhau thaum Yau-as ua vajntxwv kav yog li cas?
– Yuav ua li cas thiaj muaj Vajtswv txojkev kaj siab nyob rau hauv yus lub neej?
Thaum uas Vajntxwv Yau-as tau ntoo lub mom kub, tsa los ua Vajntxwv, thiab tus poj Vajntxwv Athaliyas tau raug tua tuag lawd, cov thawj tub rog, cov nom tswv, cov tswv xeev thiab tagnrho tej pejxeem tau coj Vajntxwv tawm hauv lub tuamtsev mus rau hauv Vajntxwv lub loog, sawvdaws coj Yau-as mus zaum rau ntawm Vajnxwv lub zwmtxwv. Thaum kawg tus Vajntxwv uas tsimnyog kav, tau los kav lawm, tus uas txeeb ua Vajntxwv yeej raug puastsuaj mus.
Tug poj Vajntxwv Athaliyas tau los kav lub tebchaws Yudas 6 xyoo (2 Xwmtxheej 22:12). Nyob rau ntu caij nyoog ntawd, cov pejxeem raug dag ntxias mus pe tug mlom Npa-as ua rau lawv muab Vajtswv tso tseg. Phau ntawv Xwmntxeej Vajntxwv tau sau txog tiam uas poj Vajntxwv Athaliyas kav mas lub tebchaws Yudas muaj kev phem qias, sib ntaus sib tuas tebchaws tsis tiaj tus li, cov pejxeem yeej tsis xav ua neej nyob hauv tus poj Vajntxwv uas los txeeb kav ntawd kev tswjfwm, lawv xav pom tus Vajntxwv uas tseeb yog Daviv caj ceg li tus Tswv tau cog lus tseg los kav lawv. Vim li ntawd, thaum uas txog tus Tswv lub sijhawm, tagnrho sawvdaws thiaj koom siab nrog rau tus Povthawj Yehauyadas muab tus poj Vajntxwv rhuav tshem thiab tsa tus Vajntxwv tshiab uas tsimnyog los kav tebchaws.
Qabhau ntawm uas Vajntxwv Yau-as tau los kav tebchaws yog nws coj raws li tus Tswv tej lus cog tseg “Cov pejxeem sawvdaws zoo siab kawg, ces lub nroog nyob ntsiag to”. Phau ntawv Xwmntxheej Vajntxwv pheej hais txog Vajtswv haivneeg muaj kev zoo siab yog thaum uas Vajtswv pab lawv (1 Xwmtxheej 29:9, 2 Xwmtxheej 29:36). Ob phau ntawv no kuj hais txog txojkev sib haumxeeb, kev kaj siab uas Vajtswv haivneeg tau txais yog thaum uas lawv ua raws li Vajtswv lub siab nyiam (1 Xwmtxheej 4:20; 29:2, 2 Xwmtxheej 14:4-5). Cov pejxeem tsis pe tus mlom Npa-as lawm, lawv zoo siab pehawm Vajtswv tus uas muaj sia zees nyob thiab lawv tau kev ua neej ntsiag to. Tej ntawd qhia hais tias, Vajtswv tabtom foom koobhmoov rau lawv thaum lawv muaj tus Vajntxwv uas Vajtswv pub los kav.
Peb kuj tabtom ua neej nyob rau tiam uas lub ntiajteb niaj hnub ua yoj ua yees nrog rau tej kev sib ntaus sib tua, kev tshaib kev nqhis, kev mob kev nkeeg,… Tsuas yog Tswv Yexus, tus Tswv ntawm txojkev thajyeeb, kev kaj siab los nyob hauv peb txhua tus lub siab mas peb lub neej thiaj yuav muaj Vajtswv txojkev kaj siab (Filipis 4:7). Yog peb cia tej kev txhawj xeeb hauv ntiajteb los kav peb lubneej mas Vajtswv tus uas pub muaj kev kaj siab yuav tsis los kav thiab ua peb tus Tswv li. Cia li muab peb tej kev nyuaj siab tso plhuav rau tus Tswv (1 Petus 5:7) kom peb txais tau txojkev kaj siab uas Vajtswv pub (2 Thexalaunikes 3:16).
Thov Vajtswv
Tus Tswv, thov pab kom nyuam yaus txawj muab tej kev nyuaj siab tso plhuav rau Koj kom nyuam yaus txais tau txojkev kaj siab txawm hais tias lubneej yuav zoo li cas. Thov tus Tswv uas pub kev kaj siab niaj hnub kav hauv nyuam yaus lub siab thiab ua nyuam yaus tus Tswv. Nyuam yaus tuav Tswv Yexus lub npe thov Amees.
Tswv Yexus Khetos yog tus Vajntxwv ntawm txhua tus vajntxwv puas tseeb tabtom tseeb nyob hauv koj lub siab?
Nyeem Vajluskub 3 lub xyoos: Chivkeeb 11
Kênh Youtube BHKTHN:
