Klei Aê Diê Blŭ: Klei Mtô Mñă Klei Bhiăn 23:17-18, 21-23
Êlan kliăng: “Tơdah diih ngă sa klei kat asei ƀuăn kơ Yêhôwa Aê Diê diih, đăm krư̆i ôh bi sĭt gơ̆; kyuadah sĭt nik Yêhôwa Aê Diê diih srăng brei diih bi sĭt, tơdah amâo yŏng sĭt klei anăn srăng jing soh kơ diih” (Klei Mtô Mñă Klei Bhiăn 23:21)
Klei êmuh ksiêm mĭn: Ya jing bruă klam kơ phung ƀuôn sang Aê Diê tơdah kat asei ƀuăn leh hŏng Aê Diê? Si Aê Diê mtă kơ klei bi sĭt klei ƀuăn? Ya klei bi hriăm drei mâo kơ klei ƀuăn leh anăn bi sĭt klei ƀuăn?
Grăp čô phung Israel dưi kat asei ƀuăn hŏng Aê Diê sơăi, tăp năng klei ƀuăn anăn jing klei ƀuăn yuôm msĕ si sa mnơ̆ng myơr kơ Aê Diê čiăng bi mni kơ Aê Diê kyua klei bi mtlaih amâodah kyua klei jăk jĭn Aê Diê brei leh (Bruă Lêwi 7:16). Êngao kơ anăn, klei kat asei ƀuăn tăp năng jing klei ƀuăn ngă sa mta bruă kơ Aê Diê amâodah klei ƀuăn djŏ tuôm hŏng klei kăm ngă sa mta bruă čiăng bi mơak kơ Aê Diê. Jih jang klei kat asei ƀuăn leh anăn bi sĭt klei ƀuăn kluôm dhuôm hŏng klei čŏng čiăng, bi êdah klei huĭ mpŭ kơ Aê Diê leh anăn khăng bi êdah klă ti anăp jih jang mnuih msĕ si pô čih Klei Mmuñ Hđăp 116:14 lač leh: “Kâo srăng bi sĭt klei kâo ƀuăn kơ Yêhôwa, ti anăp jih jang phung ƀuôn sang Ñu.” Tơdah pô kat asei ƀuăn amâo yŏng bi sĭt ôh klei ñu ƀuăn leh hŏng Aê Diê klei anăn srăng jing soh kơ ñu pô (êlan 21). Hlăm êlan 17-18, wăt tơdah bruă klam kơ pô ƀuăn jing srăng bi sĭt klei ƀuăn dưn, ƀiădah amâo djŏ ôh kyua klei anăn snăn yua prăk duah hŏng klei amâo kpă čiăng bi sĭt klei ƀuăn hŏng Aê Diê. Aê Diê kăm khut khat amâo brei ôh êkei leh anăn mniê Israel ngă klei knhông hlăm sang kkuh mpŭ msĕ si klei mưng phung tue leh anăn yua ênoh mưn mơ̆ng klei ngă knhông anăn bi sĭt klei ƀuăn hŏng Aê Diê. Aê Diê bi êmut kheh kơ klei anăn. Kat asei ƀuăn ƀiădah amâo mâo bi sĭt amâodah kat asei ƀuăn ƀiădah bi sĭt hŏng prăk duah hŏng klei amâo kpă ôh knŏng bi čhŏ kơ Anăn Aê Diê, Pô Sĭt Suôr djă pioh nanao klei Ñu bi mguôp.
Mâo lu mnuih tơdah tuôm hŏng klei dleh dlan hlăm klei hdĭp amâodah akâo sa mta klei kơ Aê Diê ăt khăng kat asei ƀuăn mơh. Mâo pô sĭt suôr bi sĭt klei ƀuăn, hdơr knga bi mni kơ Aê Diê kyua Ñu wĭt lač kơ klei wah lač hŏng klei yuôm bhăn. Ƀiădah amâo ƀiă ôh mnuih tơdah leh Aê Diê đru diñu găn ênuk dleh dlan, mă tŭ leh klei diñu akâo snăn wơr bĭt hĕ kơ klei ƀuăn amâodah bi krư̆i hlăm klei bi sĭt klei ƀuăn anăn. Klei anei yap jing yua Anăn Aê Diê hơăi mang, kyuadah pô kat asei ƀuăn yua Anăn Aê Diê kwưh akâo kơ mnơ̆ng ñu čiăng. Grăp čô drei ƀuăn leh hlăm Klei Ƀơ̆ng Mnăm Sĭt Suôr srăng hưn klei Khua Yang djiê tơl Ñu lŏ hriê; ƀuăn bi khăp hơiêng đru bi răng kriê hlŏng kơ tuč klei hdĭp hlăm hruê bi kuôl, ƀuăn čiêm rông leh anăn bi hriăm anak tui si Klei Aê Diê Blŭ hlăm klei myơr anak, lu klei ƀuăn mkăn đa đa…Drei dôk hdơr mơ̆ amâodah wơr bĭt leh? Leh anăn si ngă drei bi sĭt leh klei ƀuăn? Klei ƀuăn kbiă hriê mơ̆ng ai tiê čŏng čiăng, leh anăn klei bi sĭt klei ƀuăn anăn jing knŏng sa klei lŏ bi klă kơ klei drei mâo mă tŭ leh, bi knal leh klei wĭt lač yuôm bhăn mơ̆ng Aê Diê, leh anăn anei mơh jing êlan drei hưn Anăn Khua Yang kơ pô riêng gah. Kyuanăn, ya klei drei ƀuăn leh hŏng Aê Diê brei drei bi sĭt hĕ klei ƀuăn anăn.
Mâo mơ̆ klei drei ƀuăn ka yŏng bi sĭt ôh hŏng Khua Yang?
Wah lač: Ơ Aê Diê, Pô sĭt suôr nanao hlŏng lar, pap brei kơ kâo kyuadah mâo lu blư̆ kâo ƀuăn leh anăn wơr bĭt bi sĭt klei ƀuăn hŏng Ih. Đru kâo sĭt suôr bi sĭt jih klei kâo ƀuăn leh hŏng Ih.
Dlăng Klei Aê Diê Blŭ hlăm tlâo thŭn: Rôm 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
