Pajlug 20:5; Yaxayas 11:1-5
Nqe cim:
“Tej uas neeg lub siab xav, zoo ib yam li cov dej uas nyob hauv lub qhovtshij uas tob tob, tiamsis tus muaj tswvyim yuav qhia rau sawvdaws paub” (Pajlug 20:5).
Lus nug rau sawvdaws xav:
– Vim li cas tus neeg phem kev xav piv zoo li lub qhovtshij tob tob?
– Tus neeg phem tej kev xav yuav tau txais dab tsi?
– Ua cas tej uas cov neeg phem ua thiab xav tau raug muab qhia tshwm?
Hauv Pajlug 20:5, Vajntxwv Xalumoos qhia tibneeg tej kev xav hauv nruab siab. Xalumoos hais txog ob yam kev xav sib txawv “tibneeg siab xav” thiab qab hau ntawm“tus muaj tswvyim”. Neeg kev xav zoo li lub qhovtshij tob tob, yog hais txog yam tsis yoojyim ncav cuag, tsis yoojyim kho thiab txaus ntshai, qhov no tau muab piv txog tej uas tibneeg xav hauv siab tsis paub txog ntawm cov neeg siab phem. Ntsejmuag sab nraud ces saib zoo li luag ntxhi yog neeg zoo, tiamsis hauv siab muaj kev xav phem kawg. Cov neeg muaj lub siab xav phem tsis yog nws yuav muaj kev pab lwm tus, tiamsis nws tsuas nrhiav ua li nws xav tau. Kom npog tej yam uas nws xav phem hauv nruab siab, tus neeg phem yeej ua tib zoo zais txhua yam, hais lus dag kom tsis muaj leejtwg paub nws tes haujlwm.
Lo lus “qhia rau sawvdaws” hauv lus Henplais hais tias; “muab tawm los qhia tshwm rau sawvdaws pom”, txhais hais tias, dej yuav nyob tob npaum twg, tus neeg muaj tswvyim yeej yuav muab tau tawm los. Txawm yuav zais kev txhaum zoo npaum li cas los, tej yam xav phem yeej yuav tshwm tawm, qhov tseeb yeej yuav tawm tuaj.
Tus cev lus Yaxayas hais txog Tswv Yexus hais tias: “Nws nyob kaj siab lug vim nws mloog Vajtswv lus. Nws yuav tsis txiav txim raws li nws lub qhovmuag pom lossis nws lub qhovntsej hnov, nws yuav txiav txim ncaj ncees rau cov neeg pluag thiab tsav cov neeg uas tsis muaj leejtwg pab cai. Nws lo lus zoo li rab qws uas ntaus lub ntiajteb no, thiab nws tej pa yuav tua cov neeg siab phem” (Yaxayas 11:3-4). Txhua yam kev ua phem yeej yuav raug txim. Txhob vam khom kev muaj fwjchim, kev txawj ntse lossis kev npluanuj los ua phem rau lwm tus. Ntuj nyob saib ntsoov txhua yam, tsis muaj ib yam kev txhaum twg uas yuav zais tau kom tsis pub Vajtswv pom, vim“Tus Tswv yeej saib ntsoov lub ntiajteb no” (II Xwmntxeej 16:9).
Thov tus Tswv ntuas peb paub ua lub neej ncaj ncees, zeem paub hais tias, txawm peb yuav xav phem, ntaus tswvyim phem tsis pub leejtwg paub los yeej zais tsis tau mus li, tej yam xav phem tibneeg tsis paub txog los, yeej zais tsis tau Vajtswv tus paub txhua yam. Tej yam uas peb xav phem ib hnub twg yeej yuav rau txim ntawm tibneeg thiab ntawm Vajtswv. Yog li ntawd, peb yuav tsum tso siab rau tus Tswv, zeem paub tus Tswv ntawm peb kev ua neej, tus Tswv yuav qhia peb ua neej thiab taw qhia peb paub cov neeg xav ua phem kom qaij dhau lawv lub vojhluas. Dhau ntawd kuj yuav tau tus Tswv hlub coj peb taug txojkev tseeb hauv lub neej, thiab nws yuav tshem tej kev nyuaj tawm ntawm peb hauv ntej mus (Pajlug 3:5-6).
Thov Vajtswv,
Tus Tswv, thov Koj zam nyuam yaus lub txim vim ntau zaug tsis ua qhov tseeb rau lwm tus, tau ua txhaum rau tus Tswv koj los ntawm lub siab xav, thiab ua tej yam kev txhaum uas zais khoos tsis muaj neeg paub. Thov pab kom nyuam yaus paub fwm koj thiab ua neej raws li Vaj Ntsujplig ua tus coj. Amees.
Hauv peb lub siab puas muaj tej yam kev xav uas zais tibneeg thiab zais tus Tswv?
Nyeem Vajluskub hauv peb lub xyoo: Mathais 25:31-26:25
Kênh Youtube BHKTHN:
