Klei Aê Diê Blŭ: Y‑Yêrêmi 31:1-4
Êlan kliăng: “Yêhôwa bi êdah leh kơ ñu mơ̆ng đưm, lač: “Kâo khăp leh kơ diih hŏng klei khăp hlŏng lar; kyuanăn kâo êwak diih hŏng klei jăk.” (Y‑Yêrêmi 31:3).
Klei êmuh ksiêm mĭn: Ya klei Aê Diê ƀuăn hŏng phung ƀuôn sang Ñu ăt dôk leh klei bi kmhal? Si Yêhôwa lŏ mñă wĭt klei Ñu khăp kơ phung ƀuôn sang Ñu? Ya klei drei hriăm kơ klei khăp Aê Diê mơ̆ng boh blŭ “Yêhôwa mơ̆ng đưm”?
Klei bi kmhal mơ̆ng Yêhôwa truh kơ phung ƀuôn sang Israel jing klei phung kahan êgar Dưr hriê blah diñu tơl diñu amâo dưi lŏ bi kdơ̆ng wĭt ôh. Hlăk êjai anăn klei Yêhôwa mtă mơ̆ng Khua pô hưn êlâo Y‑Yêrêmi brei diñu bi mŭt đao hlăm hrŭm leh anăn tŭ klei arăng mă tŭ ư nao jing mnă ti Ƀaƀilôn snăn klă sĭt diñu srăng dưi mâo klei pap brei leh anăn klei bi mrâo mơ̆ng Yêhôwa. Anei jing klei Aê Diê ƀuăn brei kơ diñu: “Phung ƀuôn sang tlaih djiê hŏng đao gưm mâo leh klei pap hlăm kdrăn tač ,tơdah kâo brei phung Israel mâo klei mdei” (êlan 2). Yêhôwa “lŏ mdơ̆ng” diñu, anei jing sa hlăm dŭm klei Aê Diê brei Khua pô hưn êlâo Y‑Yêrêmi thâo êlâo kơ mŭt hlăm bruă Khua Yang jao. Hlăk anăn, phung ƀuôn sang Aê Diê srăng dưi mtlaih mơ̆ng klei ênguôt hnĭng, hêñ leh jing mnă ti čar mkăn. Hĭn mơh, diñu srăng lŏ mâo klei mơak čiăng phung mniê êra hrông Israel dưi djă hgơr điêt leh anăn srăng nao kdŏ mbĭt hŏng phung ngă klei hơ̆k mơak (êlan 4).
Phung ƀuôn sang Israel găn dŭm thŭn mlan dleh dlan kyua tŭ klei kmhal kyua klei soh pô ngă. Ênuk anăn, diñu mâo klei găl thâo kral Pô bi kmhal diñu jing Aê Diê doh jăk, kpă ênô leh anăn ktang phĭt. Ƀiădah klei Khua pô hưn êlâo Y‑Yêrêmi lač Aê Diê mơ̆ng đưm bi êdah hŏng ñu, Aê Diê “khăp leh kơ diih hŏng klei khăp hlŏng lar; kyuanăn kâo êwak diih hŏng klei jăk” (êlan 3). Jing Aê Diê mơ̆ng ênuk đưm, mơ̆ng ênuk diñu dôk hlăm klei jing mnă, amâodah ară anei dôk hlăm klei găl dưi bi mrâo knŏng jing sa, Ñu jing Aê Diê bŏ hŏng klei khăp kơ diñu, leh anăn klei khăp anăn amâo srăng bi mlih ôh.
Klei sĭt nik Aê Diê khăp kơ phung ƀuôn sang Ñu hŏng klei khăp hlŏng lar jing klei brei drei hdơr, kyua Aê Diê drei kkuh mpŭ jing Aê Diê kluôm ênŭm leh anăn amâo srăng bi mlih ôh (Y‑Malaki 3:6; Hêbrơ 13:8). Wăt tơdah hdĭp hlăm ya klei mâo, drei ăt đăo knang kluôm ênŭm hlăm klei sĭt suôr Aê Diê amâo bi mlih. Leh anăn klei yuôm bhăn jing sĭt klei khăp Aê Diê brei kơ phung ƀuôn sang Ñu amâo bi mlih ôh, snăn Ñu srăng khăp kơ drei truh ti knhal tuč (Y‑Yôhan 13:1). Bi mni lač jăk kơ Aê Diê jing Pô hruê mbruê, hruê anei leh anăn truh hlŏng lar amâo bi mlih ôh.
Si ngă drei ƀuh klei khăp leh anăn klei pap Aê Diê mơ̆ng ênuk đưm truh ară anei?
Wah lač: Ơ Aê Diê bŏ hŏng klei khăp leh anăn klei pap! Kâo mơak snăk leh anăn bi mni kơ Ih leh mâo klei mñă Aê Diê kâo mơ̆ng đưm truh ară anei ăt kjăp leh anăn bŏ hŏng klei pap hŏng kâo. Akâo kơ Ih đru kâo đăo knang leh anăn răng kriê pô hŏng klei sĭt suôr Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 22:2 – 23:14
Kênh Youtube BHKTHN:
