Yelemis 31:1-4
Nqe cim:
“Kuv tuaj deb deb tshwm rau lawv pom. Cov Yixalayees, Kuv yeej ibtxwm hlub nej, Kuv yuav hlub nej mus ibtxhis” (Yelemis 31:3).
Lus nug rau sawvdaws xav:
- Vajtswv coglus li cas rau Nws haivneeg uas tseem tshuav nyob tom qab Nws rau txim rau lawv?
- Tus Tswv qhia rau Nws haivneeg paub hais tias Nws hlub lawv li cas?
- Nqe lus “Kuv tuaj deb deb tshwm rau lawv pom” qhia rau tus Tswv haivneeg thiab peb paub txog Nws txojkev hlub zoo li cas?
Tus Tswv rau txim rau haivneeg Yixalayees los ntawm qhov uas tso cov tubrog sab Qaumteb tuaj tua, ua rau lawv kov tsis yeej. Lub sijhawm ntawd tus Tswv kom tus cevlus Yelemis qhia kom lawv cia li muab ntaj ntsaws hauv hnab thiab lees swb, cia luag ntes lawv coj mus ua qhev nyob tebchaws Npanpiloos ces tsis ntev lawv yuav tau tus Tswv zam txim thiab coj rov los txhim kho dua. Ntawm no yog lo lus cog tseg rau lawv: “Kuv hlub cov Yixalayees uas seem tuag ntawm tiaj suabpuam. Thaum cov Yixalayees xav so” (nqe 2). Tus Tswv “yuav muab” lawv “hloov dua tshiab”, qhov no yog ib yam ntawm tej uas Vajtswv qhia rau tus cev lus Yelemis paub ua ntej thaum nws los ua nws tes haujlwm. Thaum ntawd, Vajtswv yuav cawm Nws haivneeg dim kev nyuaj siab, kev txajmuag vim raug ntes mus ua qhev rau lwm lub tebchaws. Dhau ntawd, lawv yuav muaj kev zoo siab npuaj lawv tej nruas, seevcev thiab zoo siab luag ntxhi (nqe 4).
Cov neeg Yixalayees nyob rau ncua sijhawm uas lawv raug kev nyuaj siab twb yog vim tej kev txhaum uas lawv tau ua. Lub caijnyoog ntawd, yog lub sijhawm zoo rau lawv paub hais tias tus uas rau txim rau lawv yog Vajtswv tus uas dawbhuv, ncaj ncees thiab ua nruj. Cov lus uas Yelemis qhia yog Vajtswv tus uas muaj kev hlub tej lus, Nws hais tias “kuv yeej ibtxwm hlub nej, kuv yuav hlub nej mus ibtxhis” (nqe 3). Txhais tau hais tias tus Vajtswv tus uas muaj nyob puag thaum ub, tus Vajtswv uas muaj nyob thaum lawv raug ua cev qhev, thiab tus Vajtswv uas rov txhim kho lawv dua, yeej yog tib tug xwb ntag. Nws yog Vajtswv tus uas hlub lawv, thiab Nws kev hlub yuav nyob mus ibtxhis tsis hloov li.
Qhov tseeb uas hais tias Vajtswv hlub Nws haivneeg los ntawm txojkev hlub nyob mus ibtxhis, yog qhov uas peb yuavtsum cim nco. vim Vajtswv tus uas peb pehawm yog tus Vajtswv uas zoo kawg nkaus thiab tsis hloov (Malakis 3:6; Henplais 13:8). Txawm yuav nyob rau lub tsamthawj twg los xijpeem, peb yeej ntseeg khov kho hais tias tus Tswv yeej yuav ncajncees ua raws li nws tej lus cog tseg tsis hloov li. Thiab qhov tseemceeb yog thaum Vajtswv txojkev hlub Nws haivneeg tsis hloov, ces Nws yeej yuav hlub peb mus txog hnub kawg (Yauhas 13:1). Ua Vajtswv tsaug vim Nws yog tus uas nag hmo, hnub no, thiab nyob mus ibtxhis tsis txawj pauv hloov.
Peb paub txog Vajtswv txojkev hlub thiab kev ua siab ntev thaum ub los txog nimno zoo li cas?
Thov Vajtswv:
Tus Tswv uas muaj kev hlub thiab ua siab ntev! Nyuam yaus zoo siab thiab ua Koj tsaug thaum paub hais tias Koj yog nyuam yaus tus Vajtswv ibtxwm muaj nyob thaum ub los txog niaj hnub nimno, tseem hlub thiab ua siab ntev pub rau nyuam yaus. Thov Koj pab kom nyuam yaus cia siab ntsoov thiab nyob rawv hauv Koj txojkev hlub. Amees.
Nyeem Vajluskub hauv peb lub xyoo: I.Xwmtxheej Vajntxwv 22:2-23:14
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
