Klei Aê Diê Blŭ: Klei Mtô Mñă Klei Bhiăn 28:58-68
Êlan kliăng: “Đăm brei arăng mplư diih ôh; arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh. Kyuadah hlei pô rah kơ kđeh ñu pô srăng wiă mơ̆ng kđeh ñu klei rai tuč; ƀiădah hlei pô rah kơ Yang Mngăt jăk srăng wiă mơ̆ng Yang Mngăt Jăk klei hdĭp hlŏng lar.” (Galati 6:7-8)
Klei êmuh ksiêm mĭn: Hbĭl klei tăm pah huĭ hyưt srăng truh hŏng phung ƀuôn sang Aê Diê? Si klei Aê Diê hưn brei răng kơ phung ƀuôn sang Ñu brei hdĭp tơdah mŭt hlăm Lăn Aê Diê ƀuăn? Si klei hriăm mñă kơ drei brei hdĭp hŏng Khua Yang?
Trăn Klei Aê Diê Blŭ hruê anei mñă klă klei mtô mưng hmư̆, anăn jing tơdah phung ƀuôn sang Israel amâo thâo răng hlue ngă klei bhiăn, amâo huĭ mpŭ kơ Anăn guh kơang leh anăn năng huĭ mpŭ jing “Yêhôwa Aê Diê” diñu snăn Ñu srăng tuh klei truh ênguôt hnĭng hĭn hlăm phung ƀuôn sang Ñu. Aê Diê srăng lŏ tuh klei ruă duam huĭ hyưt Ñu tuôm tuh leh hlăm phung ƀuôn sang Êjip hlăk bi mtlaih phung ƀuôn sang Israel mơ̆ng knông phung hlŭn tinăn. Boh nik, Ñu srăng tuh klei ruă leh anăn klei jhat diñu ka tuôm ƀuh ôh êlâo anăn. Amâo djŏ knŏng dŭm năn ôh, djuê ana Israel srăng bru bra truh knhal jih lăn ala, hdĭp sa klei hdĭp amâo êđăp ênang ôh, grăp mnĭt mmông hlăm boh klei rŭng răng, mngăt diñu êdu awăt, bi asei mlei luč jih ai ktang.
Boh phŭn kơ klei tăm pah klă sĭt ngă kơ grăp čô hmư̆ srăng ƀuh bŏ hŏng huĭ hyưt. Kyua anăn tơdah diñu dlăng kơ Aê Diê hơăi mang, amâo gưt asăp Aê Diê mtă, klei anăn srăng truh kơ sa djuê ana, kơ grăp gŏ sang leh anăn grăp čô amâo lui hlei pô ôh. Kyua hnơ̆ng yuôm bhăn mơ̆ng knuih hdĭp gưt asăp Aê Diê anăn Aê Diê mtă kơ phung ƀuôn sang Israel ƀhĭ klĭ kơ boh phŭn klei tăm pah leh anăn boh phŭn ngă kơ diñu tŭ klei tăm pah êlâo kơ diñu mŭt hlăm Lăn Aê Diê Ƀuăn. Klei anei brei ƀuh Aê Diê jing Pô kiă kriê, myang hĭn kơ jih jang, ya klei srăng truh kơ phung ƀuôn sang Aê Diê wăt tơdah jăk mơak amâodah tăm pah jing Aê Diê lač leh êlâo anăn hŏng klei klă mngač čiăng kơ phung ƀuôn sang Aê Diê thâo ruah knuih hdĭp. Lăn Aê Diê Ƀuăn jing krĭng bŏ hŏng êa ksâo leh anăn êa hnuê Aê Diê ƀuăn brei kơ phung ƀuôn sang Ñu tơdah mŭt hlăm krĭng, phung ƀuôn sang brei hdĭp hlăm klei bi mguôp hŏng Aê Diê, leh anăn hlăm klei bi mguôp anăn mâo klei pah mni, bi kmhal klă mngač mơ̆ng Pô kpă ênô. Klei hdĭp diñu srăng tŭ klei jăk mơak amâodah klei tăm pah tui hlue si knuih hdĭp gưt asăp amâodah amâo gưt asăp.
Grăp čô drei čiăng sơăi mâo sa klei hdĭp jăk mơak hlăm Aê Diê. Ƀiădah brei drei hdơr klei jăk mơak amâodah tăm pah amâo djŏ jing klei myun amâodah amâo myun ôh ƀiădah jing boh mơ̆ng knuih drei hdĭp hŏng Ñu. Aê Diê bŏ hŏng klei khăp čiăng brei nanao klei jăk mơak kơ phung ƀuôn sang Ñu, ƀiădah drei hdĭp djŏ tui si Klei Aê Diê Blŭ mtô čiăng tŭ mă amâodah tlaih đuč. Klei jăk mơak amâodah tăm pah tui hlue hlăm bruă drei ruah si knuih hdĭp hŏng Khua Yang grăp hruê “Kyuadah ya mjeh arăng rah, ñu srăng wiă boh anăn mơh”
Si knuih drei mâo hlăm klei mă bruă kơ Khua Yang leh anăn huĭ mpŭ kơ Anăn Ñu?
Wah lač: Ơ Khua Yang jing Pô brei klei jăk mơak ăt jing Pô tuh djăp klei truh hlăm klei hdĭp kâo. Akâo kơ Ih đru kâo hdĭp nanao hlue si hnơ̆ng mkă mơ̆ng Klei Aê Diê Blŭ čiăng kơ kâo thâo sa klei hdĭp jăk mơak hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
