II Kevcai 28:58-68
Nqe cim:
“Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tsum tau sau raws li tej uas nyias tseb. Tus uas tseb tej uas neeg lub siab nyiam, tus ntawd yeej yuav tau sau kev ploj kev taug raws li tej uas nws tseb. Tiamsis tus uas tseb tej uas Vaj Ntsujplig nyiam, tus ntawd yuav tau sau txojsia ntev dhawv mus ibtxhis.”(Kalatias 6:7-8)
Lus nug rau sawvdaws xav:
– Thaum twg Tus Tswv tej lus foom tsis zoo uas txaus ntshai los raug Nws haiv neeg?
– Tus Tswv ceebtoom ua ntej rau Nws haivneeg kom yuav tsum ua neej li cas thaum mus nyob hauv lub tebchaws coglus tseg?
– Zaj kawm no qhia kom peb yuav tsum ua neej nrog tus Tswv zoo li cas?
Ntu Vajluskub hnub no hais txog zaj uas peb twb tau hnov dua lawm, uas yog cov Yixalayees tsis ua raws li tus Tswv txoj kevcai, tsis hwm tus Tswv lub npe thiab qhov uas txaus ntshai yog lawv “tus Tswv uas yog Vajtswv” yuav tso tej kev txomnyem los raug lawv. Vajtswv yuav ua rau lawv raug tej kev mob txaus ntshai uas Nws twb ua rau cov neeg Iziv, thaum Nws coj lawv tawm nram tebchaws ua cev qhev los. Tus Tswv yuav tso tej kev mob thiab subtawg subntsha uas lawv tsis tau pom dua los raug Nws haiv neeg. Tsis yog li ntawd xwb, cov neeg Yixalayees tseem yuav tawg ri sua mus rau txhua qhov thoob lub ntiajteb no, ua neej nyob tsis muaj kev kaj siab, yog lub tsamthawj txhawj ntshai kawg. Lawv sab ntsujplig yuav qaug zog zis, sab nqaij tawv los yuav puas zuj zus mus.
Cov lus foom saud lub ntsiab tsis zoo yuav ua rau cov uas hnov ntshai kawg nkaus li. Vim cov Yixalayees saib tsis taus lawv tus Vajtswv, tsis mloog tus Tswv tej lus hais, tej ntawd thiaj los raug tagnrho lawv haivneeg, tej tsevneeg thiab tej tus neeg, tsis tseg ib tug kiag li. Vim ua neej tsis mloog Vajtswv lus, Vajtswv thiaj qhia rau cov Yixalayees meej txog kev foom tsis zoo thiab lub keebtiv uas lawv yuav raug foom tsis zoo, ua ntej mus nyob hauv lub tebchaws coglus tseg. Qhov ntawd qhia paub hais tias Vajtswv yog tus kav txhua yam, muaj hwjchim tswj saum ntuj thiab hauv ntiajteb no, tej uas yuav muaj tshwm los raug Vajtswv haivneeg. Txawm Vajtswv haiv neeg yuav zoo thiab tsis zoo los lawv twb tau tus Tswv ceebtoom ua ntej meej lawm, zaum no nyob ntawm lawv xaiv ua xwb. Lub tebchaws coglus tseg yog lub tebchaws uas zoo qoob loo, Vajtswv coglus muab pub rau Nws haivneeg mus nyob. Thaum Vajtswv haivneeg mus nyob lub tebchaws ntawd, yuav tsum coglus nrog Vajtswv ua ntej, yog ua ncaj ncees rau Vajtswv ces tau koob hmoov thiab ntxeev siab rau Vajtswv ces raug rau txim. Cov Yixalayees kev ua neej yuav txais koob hmoov lossis raug foom tsis zoo yog nyob txij ntawm lawv kev ua neej mloog lus lossis tawv ncauj tsis mloog lus xwb.
Peb sawvdaws yeej xav kom yus tau lub neej kaj siab hauv tus Tswv, tiamsis peb yuav tsum nco ntsoov hais tias, tau koob hmoov lossis raug foom tsis zoo, tsis yog txoj hmoo tiamsis yog qhov kev ua neej tawm tsam Vajtswv lossis mloog Vajtswv lus. Vajtswv yog tus muaj kev hlub, Nws yeej pub txhua yam koob hmoov zoo rau Nws haiv neeg, tiamsis qhov teebmeem yog peb puas ua lub neej raws li Vajtswv Txojlus qhia. Koob hmoov zoo lossis lus foom tsis zoo nyob txij ntawm qhov peb xaiv ua neej nrog tus Tswv txhua hnub zoo li cas, rau qhov “tseb dab tsi yuav tau sau yam ntawd”.
Thov Vajtswv:
Vajtswv, Koj yog tus uas pub koob hmoov thiab yog tus uas tso tej subtawg subntsha los raug nyuam yaus lub neej. Thov Koj pab kom nyuam yaus niaj hnub ua raws li Koj Txojlus qhia, kom nyuam yaus tau txais lub neej kaj siab nyob hauv Koj. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb yuav ua neej mloog tus Tswv lus lossis yuav tawv ncauj rau tus Tswv?
Nyeem Vajluskub hauv peb lub xyoo: Henplais 12
Kênh Youtube BHKTHN:
